Habakuki 2 - Kinyarwanda Bibiliya Ntagatifu

¹ Jyewe rero ngiye gukomera ku izamu ryanjye, nkomeze mpagarare hejuru y’inkike; nzagenzure kugira ngo numve icyo Imana izambwira, mbese igisubizo izampa kuri aya magambo yanjye.

Igisubizo cy’Imana: intungane izabaho

² Nuko Uhoraho ansubiza, agira ati «Andika iby’iri bonekerwa, ubishyire ku tubaho, maze babashe kubisoma neza.

³ Gusa iby’iri bonekerwa bizaza mu gihe cyagenwe, ni bwo byose bizuzuzwa nta kabuza; n’aho ryatinda kandi uzaritegereze, kuko rizaza ku gihe cyaryo nta gihindutse!

⁴ Ni koko, azarimbuka umuntu wuzuye ubwirasi, naho intungane izabeshwaho n’ubudahemuka bwayo.»

II. ABASAHUZI BARAKAVUMWA

⁵ Ni ukuri koko, ubukungu bukabije buvamo kurimbuka! Umuntu wikuza ntajya aguma hamwe, ahubwo umuhogo we awagura nk’ukuzimu, akamera nk’urupfu rutigera ruhaga! Akoranyiriza amahanga yose iruhande rwe, n’imiryango yose akayiyegereza!

⁶ Uwo muntu se, abandi ntibazamuciraho imigani, bose bakamusekera icyarimwe, bagira bati: Ariyimbire, uwigwizaho ibitari ibye, (ariko se azageza ryari?) akikungaharisha ibintu bitabarika yatseho amakoro!

Imivumo itanu

⁷ Aho abo ubereyemo umwenda ntibagiye guhaguruka bwangu, abagukura umutima na bo bagakanguka? Nyamara ntuzabava mu nzara!

⁸ Nk’uko wasahuye amahanga atagira ingano, abasigaye bose b’iyo miryango bazagusahura; kuko wamennye amaraso y’abantu, ugahungabanya igihugu, umurwa n’abawutuye bose.

⁹ Ariyimbire ushyingura mu nzu ye ibyo yambuye, agatekereza kwarika icyari cye hejuru cyane, kugira ngo azahungireyo icyago!

¹⁰ Ibyo wiyemeje ni urukozasoni rw’umuryango wawe: igihe warimburaga amahanga atagira ingano, wikururiye ibyago wowe ubwawe.

¹¹ Ni ukuri koko, ibuye ryubatse urukuta rizatabaza, maze rizasubizwe n’igiti cyo mu gisenge cy’inzu.

¹² Ariyimbire uwubaka umugi hejuru y’amaraso, agashingira umurwa ku bugome!

¹³ Mbese ye, ibi ntibyaturutse kuri Uhoraho, Umugaba w’ingabo, igihe avuze ati «Ibihugu biragokera umuriro n’amahanga aravunwa n’ubusa»,

¹⁴ kuko isi yose izasakarwamo n’ubumenyi bw’Uhoraho, nk’uko amazi asendera inyanja.

¹⁵ Ariyimbire unywekesha mugenzi we, akavanga inzoga n’uburozi kugeza ko amusindisha, agashimishwa no kumureba yambaye ubusa!

¹⁶ Wihagije ibikozasoni aho kwiha ikuzo, ubu rero ni igihe cyawe cyo gusinda ukiyambika ubusa, kuko inkongoro iri mu kiganza cy’iburyo cy’Uhoraho none ikaba igiye kugucubanurirwaho, maze ikuzo ryawe rikaguhindukiramo ikimwaro!

¹⁷ Ni ukuri koko, urugomo wagiriye Libani ruzakugaruka, no kuba wararimbuye inyamaswa zayo, uzabiryozwe, bitewe n’uko wamennye amaraso y’abantu, ugahungabanya igihugu, umurwa n’abawutuye bose.

¹⁹ Ariyimbire ubwira ingiga y’igiti, ati «Haguruka», akabwira ibuye ritavuga, ati «Kanguka», nyamara ntibigire icyo bimusubiza! Yego na none, bisize zahabu na feza, ariko nta mwuka ubirimo!

¹⁸ Rimaze iki, ishusho ribajwe n’umunyabukorikori, cyangwa iricuzwe mu muringa, rigahanura ibinyoma? Uwayakoze yashobora ate kuyiringira, kandi ari ibigirwamana bitavuga?

²⁰ Nyamara Uhoraho ari mu Ngoro ye ntagatifu: isi yose niceceke imbere ye!