Filemoni 1 - Kinyarwanda Bibiliya Ntagatifu

Indamutso

¹ Jyewe Pawulo, infungwa kubera Kristu Yezu, n’umuvandimwe Timote, kuri Filemoni umufasha wacu dukunda, no kuri Afiya mushiki wacu,

² no kuri Arikipo twatabaranye ku rugamba, no kuri Kiliziya iteranira mu nzu yawe:

³ tubifurije ineza n’amahoro bituruka ku Mana Umubyeyi wacu no kuri Nyagasani Yezu Kristu.

Pawulo ashimira Imana akayitakambira kubera Filemoni

⁴ Mpora nkwibuka mu masengesho, ngashimira Imana yanjye,

⁵ kuko numva barata urukundo n’ukwemera ufitiye Nyagasani Yezu n’abatagatifujwe bose.

⁶ Ndagusabira kugira ngo uko kwemera kube gushingiye ku bikorwa, maze ugaragarize mu ruhame ibyiza byose twashobora kugirira Kristu.

⁷ Koko, muvandimwe, nagize ibyishimo bikomeye, kandi ndahozwa ku mpamvu y’urukundo rwawe, numvise ukuntu wahumurije imitima y’abatagatifujwe.

Pawulo ashingana Onezimi

⁸ Kubera ibyo, n’ubwo mfite uburenganzira bwose muri Kristu bwo kugutegeka ibyo ugomba gukora,

⁹ mpisemo kwiyambaza urukundo, jyewe Pawulo w’umusaza, nkubitiyeho no kuba ndi infungwa kubera Yezu Kristu ubu ngubu.

¹⁰ Ndagutakambira kubera umwana wanjye nabyariye mu buroko, Onezimi uwo nguwo,

¹¹ wakubereye imburamumaro, ariko noneho azatubera twembi ingirakamaro.

¹² Ubu ndamukugaruriye, we nkoramutima yanjye.

¹³ Nashakaga kumugumana hafi yanjye, kugira ngo ajye amfasha mu kigwi cyawe, muri ubu buroko nafungiwemo mporwa Inkuru Nziza.

¹⁴ Ariko nta cyo nashatse gukora utabyemeye, kugira ngo icyo gikorwa cyiza kitakubera agahato, ahubwo gituruke ku bwende bwawe.

¹⁵ Kandi wenda wamubuze igihe gito none arakugarukiye, kugira ngo uzamuhorane iteka.

¹⁶ Uzasanga atakiri umucakara, ahubwo atambutse umucakara, usange ari umuvandimwe wawe ukunda: jyeweho ni ko amereye rwose, nawe ni ko azakumerera ndetse arusheho, ari mu maso y’abantu, ari no mu maso ya Nyagasani.

¹⁷ Niba rero wemera ko ndi incuti yawe, uramwakire nk’uko wanyakira.

¹⁸ Kandi niba hari icyawe yatwaye cyangwa akaba akurimo umwenda, uzabimbaze.

¹⁹ Jyewe Pawulo ndabyiyandikiye ubwanjye: nzabyishyura . . . siniriwe mvuga ko nawe undimo umwenda, kandi uwo mwenda ni wowe ubwawe.

²⁰ Ngaho, muvandimwe, ungirire ubwo buntu muri Nyagasani, ushimishe umutima wanjye muri Kristu!

²¹ Nkwandikiye niringiye rwose ko uzanyumva; ndetse nzi neza ko uzakora ibitambutse ibyo ngusabye.

Imigambi no gutashya abavandimwe

²² Byongeye kandi, untegurire n’icumbi, kuko nizeye ko bazandekura nkabagarukira mbikesheje amasengesho yanyu.

²³ Aragutashya Epafurasi dufunganywe kubera Kristu Yezu.

²⁴ Na Mariko aragutashya, na Arisitariko, na Demasi, na Luka, abafasha banjye.

²⁵ Nimuhorane ineza ya Nyagasani Yezu Kristu!