Ezira 5 - Kinyarwanda Bibiliya Ntagatifu

¹ Hashize iminsi abahanuzi Hagayi na Zakariya mwene Ido, batangira guhanurira Abayahudi bo mu gihugu cya Yuda n’ab’i Yeruzalemu, mu izina ry’Imana ya Israheli yari kumwe na bo.

² Ubwo Zorobabeli mwene Sheyalitiyeli, na Yozuwe mwene Yosadaki barahaguruka, batangira kubaka Ingoro y’Uhoraho i Yeruzalemu; bari kumwe n’abahanuzi b’Imana babateraga inkunga.

³ Bakibimenya haza Tatenayi, umutegeka w’ibihugu by’iburengerazuba bwa Efurati, na Shetari‐Bozenayi na bagenzi babo, barahabasanga, maze barababaza bati «Ni nde wabahaye uruhushya rwo kubaka iyi Ngoro no gusana iri sengero?»

⁴ Baranabategeka bati «Nimutubwire amazina y’abubatse iyi Ngoro!»

⁵ Ariko Imana irebana ubugwaneza abatware b’umuryango w’Abayahudi, ntibababuza gukomeza kubaka kugeza ubwo ibaruwa yohererezwa Dariyusi, hanyuma akazabasubiza akemura icyo kibazo.

Abayahudi baregwa ku mwami Dariyusi

⁶ Mu ibaruwa yohererejwe umwami Dariyusi, Tatenayi umutegetsi w’ibihugu by’iburengerazuba bwa Efurati, Shetari‐Bozenayi na bagenzi babo, mbese abategetsi bose bo hakuno y’uruzi,

⁷ bamwandikiye bagira bati «Umwami Dariyusi nahorane amahoro!

⁸ Umwami namenye ko twagiye mu gihugu cya Yuda kureba Ingoro y’Imana ikomeye. Irubakishwa amabuye abajwe, n’inkike zayo bazometseho imbaho, kandi uwo murimo urakoranwa umwete ku buryo butunganye.

⁹ Twabajije abakuru babo, tuti ’Ni nde wabahaye uruhushya rwo kubaka iyi Ngoro no gusana iri sengero?’

¹⁰ Hanyuma twabajije n’amazina yabo, ay’abatware babo turayandika kugira ngo tuzayakumenyeshe.

¹¹ Nuko baradusubiza bati ’Turi abagaragu b’Imana Nyir’ijuru n’isi, turongera kubaka Ingoro yari imaze imyaka myinshi yubatswe, ni na yo umwami ukomeye muri Israheli yari yarubatse akayuzuza.

¹² Ariko kubera ko abasokuruza bacu barakaje Imana Nyir’ijuru, yabagabije Nebukadinetsari w’Umukalideya, umwami wa Babiloni, asenya Ingoro kandi iyo mbaga ayijyana bunyago i Babiloni.

¹³ Nyamara mu mwaka wa mbere w’ingoma ye, Sirusi umwami wa Babiloni atanga itegeko ryo kubaka iyo Ngoro y’Imana.

¹⁴ Uretse n’ibyo, ibikoresho bya zahabu na feza by’Ingoro y’Imana, Nebukadinetsari yari yaranyaze mu Ngoro i Yeruzalemu kugira ngo abijyane mu ngoro y’imana ze i Babiloni, umwami Sirusi yabikuye muri iyo ngoro y’i Babiloni, abiha Sheshibasari yari yarashyizeho ngo abe umutware w’uwo muryango.

¹⁵ Aramubwira ati ’Akira ibi bikoresho, maze ugende uzabishyire mu Ngoro y’i Yeruzalemu, kandi Ingoro y’Imana izongere yubakwe aho yahoze.’

¹⁶ Bukeye, Sheshibasari uwo araza, ashinga imfatiro z’Ingoro y’Imana i Yeruzalemu. Guhera ubwo kugeza na n’ubu iracyubakwa, ariko ntiruzura.

¹⁷ None rero, niba umwami abyemeye, nibashakashake mu nzu y’ububiko bw’umwami aho i Babiloni, barebe niba umwami Sirusi yarategetse koko ko iyi Ngoro y’Imana yubakwa i Yeruzalemu, maze batwoherereze icyemezo cy’umwami kuri icyo kibazo.»