Ezekiyeli 30 - Kinyarwanda Bibiliya Ntagatifu

Umunsi Uhoraho azibasira igihugu cya Misiri

¹ Uhoraho ambwira iri jambo, ati

² «Mwana w’umuntu, hanura maze uvuge uti ’Dore uko Nyagasani Uhoraho avuze: Nimuboroge muvuga muti ’Mbega umunsi!’

³ Kuko umunsi wegereje, umunsi w’Uhoraho ukaba uri hafi. Uzaba umunsi ubuditse ibihu, icyo gihe amahanga azaba asakiwe.

⁴ Inkota izayogoza Misiri, igihugu cya Kushi kizashya ubwoba, igihe intumbi zizaba zararikwa mu Misiri, bakayinyaga ubukire bwayo n’imfatiro zayo zikarimburwa.

⁵ Kushi, Puti na Ludi, Arabiya yose, Kubi n’abatuye ibihugu byunze ubumwe bose bazicishwa inkota.

⁶ Dore uko Uhoraho avuga: Abari bashyigikiye Misiri bazacisha make, ubwirasi bushingiye ku mbaraga buyoyoke; guhera i Megidoli kugeza i Siyeni — uwo ni Nyagasani Uhoraho ubivuze — bazashirira ku nkota.

⁷ Bazarimburwa kimwe n’ibihugu byarimbuwe, imigi yabo ibarirwe mu yasenyaguritse.

⁸ Nuko bazamenye ko ndi Uhoraho, ubwo nzateza Misiri inkongi y’umuriro, n’abayishyigikiye bose nkabahashya.

⁹ Uwo munsi, nzohereza itumwa mu mato, zijye guhungabanya umutekano muri Kushi; abayituye bazashya ubwoba, kuri uwo munsi wa Misiri. Ni koko kandi, ngibi biregereje!

¹⁰ Dore uko Nyagasani Uhoraho avuga: Nzatsemba imbaga y’Abanyamisiri mbigirishije ukuboko kwa Nebukadinetsari, umwami wa Babiloni.

¹¹ We n’abantu be b’ababisha kurusha andi mahanga, bazazanwa no kuyogoza igihugu. Bazakura inkota barwanye Misiri, igihugu bacyuzuzemo intumbi.

¹² Nzakamya inzuzi za Misiri, igihugu nkigurishe n’abagome; ntsembe igihugu n’ibyo gitunze byose mbigirishije ukuboko kw’abanyamahanga. Jyewe Uhoraho ndabivuze.

¹³ Dore uko Nyagasani Uhoraho avuga: Ngiye gutsemba burundu ibigirwamana, mvaneho ibishushanyo by’i Nofu; ndetse nta n’igikomangoma kizongera kubaho ukundi mu gihugu cya Misiri. Ngiye guteza ubwoba igihugu cya Misiri.

¹⁴ Nzayogoza Patorosi, Sowani nyiteze inkongi y’umuriro, naho umugi wa No nywucire uruwukwiye.

¹⁵ Nzamarira uburakari bwanjye kuri Sini, ikigo gikomeye cyo mu Misiri; nzatsembe n’imbaga itabarika yo muri uwo mugi wa No.

¹⁶ Igihugu cya Misiri nzagiteza inkongi y’umuriro; i Sini bagire umubabaro ukomeye, umugi wa No nywucemo icyuho, naho Nofu amazi ayisenderemo.

¹⁷ Abasore b’i Oni n’i Pibezeti bazicishwa inkota, n’imigi ubwayo izatwarwe bunyago.

¹⁸ I Tafunesi umuseke ntuzakeba, igihe nzaba nakuyeho uburetwa bwa Misiri, n’ubwibone baterwa n’imbaraga zayo bukarangira. Igicu kizayibundikira, maze abakobwa bayo bajyanwe bunyago.

¹⁹ Nguko uko nzacira Misiri uruyikwiye, maze bazamenye ko ndi Uhoraho.»

²⁰ Nuko mu mwaka wa cumi n’umwe, ku munsi wa karindwi w’ukwezi kwa mbere, Uhoraho ambwira iri jambo, ati

²¹ «Mwana w’umuntu, navunaguye ukuboko kwa Farawo, umwami wa Misiri, none dore nta n’umwe watekereje komora igikomere cye ngo agipfuke, kugira ngo nibura yongere kugira imbaraga zo kurwanisha inkota.

²² Ni cyo gitumye Nyagasani Uhoraho avuga ati ’Dore ngiye kwibasira Farawo, umwami wa Misiri, muvunagure amaboko yombi, ukwari kuzima kimwe n’ukwavunitse, maze muteshe inkota iri mu kiganza cye, yiture hasi.

²³ Abanyamisiri nzabatatanyiriza mu mahanga, mbakwize imishwaro mu bindi bihugu.

²⁴ Nzakomeza amaboko y’umwami w’i Babiloni, nshyire inkota yanjye mu kiganza cye. Nzavunagura amaboko ya Farawo maze azacure umuborogo boshye ujya gupfa.

²⁵ Nzakomeza amaboko y’umwami w’i Babiloni, naho aya Farawo azacike intege; bityo bazamenye ko ndi Uhoraho, igihe nzaba nashyize inkota yanjye mu biganza by’umwami w’i Babiloni, akayibangura ngo arwanye igihugu cya Misiri.

²⁶ Abanyamisiri nzabatatanyiriza mu mahanga, mbakwize imishwaro mu bindi bihugu, maze bazamenye ko ndi Uhoraho.’»