Ezekiyeli 19 - Kinyarwanda Bibiliya Ntagatifu

Amaganya atewe n’ibikomangoma bya Israheli

¹ Naho wowe rero, uririmbe indirimbo y’amaganya atewe n’ibikomangoma bya Israheli.

² Uzavuge uti «Nyoko yari nde? Yari intare y’ingore mu zindi ntare, ikiryamira hagati y’ibyana byayo, ikanabyonsa.

³ Nuko irera kimwe mu byana byayo kiba intare y’igisore, kimenya guhiga ndetse no kurya abantu.

⁴ Abanyamahanga baza kumenya iby’iyo ntare, barayitega maze igwa mu mutego wabo, bayikururisha inkonzo bayijyana mu gihugu cya Misiri.

⁵ Nyina irategereza iraheba, isanze nta cyizere igifite, ni ko gufata ikindi mu byana byayo, irakirera na cyo kiba igisore.

⁶ Kikazerera mu zindi ntare, na cyo gihinduka koko intare y’igisore, kimenya guhiga ndetse no kurya abantu.

⁷ Nuko irimbura ingoro z’abantu, isenya n’imigi yabo, igihugu n’abagituye bakuka umutima, kubera urusaku rw’umutontomo wayo.

⁸ Abanyamahanga bahegereye, baturuka mu bihugu byabo baje kuyirwanya, barayitega maze igwa mu mutego wabo.

⁹ Bayikuruza inkonzo bayishyira mu rudandi, bayishyikiriza umwami w’i Babiloni ayifungira mu buvumo, kugira ngo umutontomo wayo utazongera kumvikana mu misozi ya Israheli.

¹⁰ Byongeye kandi, nyoko yari ameze nk’umuzabibu watewe ku nkengero y’amazi. Wararumbukaga kandi ukagira amababi menshi, ubikesha ko wabonaga amazi ahagije,

¹¹ ukagira amashami akomeye, avamo inkoni z’abami, uburebure bwawo bugera rwagati mu bicu, bugatangarirwa kimwe n’ubwinshi bw’amashami yawo.

¹² Ariko waranduranye uburakari bawutura hasi, umuyaga w’iburasirazuba wumisha imbuto zawo, igihimba cyawo gikomeye kiravunika maze kiruma, umuriro uragitwika.

¹³ Dore noneho watewe mu butayu, mu gihugu cyumiranye, kitakigira amazi.

¹⁴ Umuriro uhinguka mu gihimba cyawo, utwika amashami yawo n’imbuto zawo. Ntuzongera ukundi kugira ishami rikomeye, ryashobora kuvamo inkoni y’umwami.» Uwo ni umuvugo, waririmbwe nk’amaganya.