Amosi 9 - Kinyarwanda Bibiliya Ntagatifu

Ibonekerwa rya gatanu: isenywa ry’urusengero

¹ Nuko mbona Nyagasani ahagaze ku rutambiro, avuga ati «Kubita inkingi yo ku muryango, inkomanizo zizanyeganyega; byose bisenyukire ku bari imbere bose, naho abasigaye nzabicisha inkota; nta n’umwe uzashobora guhunga, nta n’umwe uzacika ku icumu.

² Nibanarwanira kujya iku zimu, ikiganza cyanjye kizabavanamo; nibanazamuka mu ijuru, nzabakonkoborayo.

³ Nibihisha mu bitwa bya Karumeli, nzabashakashaka mbahanantureyo; nibanyihisha hasi mu nyanja, nzabategeza Ikiyoka kibarye.

⁴ Nibitegeza abanzi babo ngo babagire imbohe, nzabategeza inkota ibicire aho. Nzabagenzaho ijisho, atari icyiza mbashakira ahubwo ari ikibi.»

Uhoraho, Umutegetsi w’isi n’ijuru

⁵ Nyagasani Uhoraho, Umugaba w’ingabo, agera ku isi ikanyeganyega, n’abayituye bagacura imiborogo; uko yakabaye iratutumba nk’uruzi, ikika nka rwa ruzi rwo mu Misiri.

⁶ Ni we wubaka ingazi mu ijuru, akubaka igisenge cye hejuru y’isi. Ni we ukorakoranya amazi yo mu nyanja, akayasuka ku isi. Uhoraho ni ryo zina rye.

Igihano cy’abakosheje

⁷ Ku bwanjye, mumeze nk’Abanyakushi, bana ba Israheli, uwo ni Uhoraho ubivuze. Si jyewe se wazamuye Israheli nkayivana mu gihugu cya Misiri, Abafilisiti nkabavana muri Kafutori, n’abo muri Aramu nkabavana i Kiri?»

⁸ Dore Nyagasani Uhoraho yerekeje amaso ku gihugu cy’abanyabyaha avuga ati «Ngiye kubavana ku isi mbatsembe, ariko nta bwo nzarimbura buheriheri inzu ya Yakobo. Uwo ni Uhoraho ubivuze.

⁹ Ni koko, ngiye gutanga amategeko : mu mahanga yose ngiye kujegeza inzu ya Israheli, nk’uko bazunguza urutaro bagosora, ntihagire imbuto nzima n’imwe igwa hasi.

¹⁰ Abanyabyaha bo mu muryango wanjye bose bazicishwa inkota, bo bavuga bati «Ntuzatwegereze ikibi, ntuzatume kidushyikira.»

Israheli izabyuka

¹¹ Muri iyo minsi, nzegura inzu ya Dawudi yari igiye kugwa, nzasane ibyuho byayo, nzegure ahari harasenyutse; nzayihagarika nyisubize uko yahoze kera,

¹² ku buryo bazategeka udusigisigi twa Edomu n’utw’amahanga yose yamenye izina ryanjye. Ibyo ni Uhoraho ubivuze, ari na we uzabikora.

¹³ Ngiyi iminsi iraje — uwo ni Uhoraho ubivuze — maze umuhinzi n’umusaruzi bakurikirane, umwenzi w’imizabibu azakurikirane n’uyibiba, divayi iryoshye izakwira ku misozi, buri murenge uyiyame.

¹⁴ Nzagarura umuryango wanjye Israheli, bazubake imigi yari yarashenywe maze bayituremo, bazahinge imizabibu bayinywemo divayi, bahinge imirima maze barye ibyezemo,

¹⁵ nzabagarura iwabo bakomere, ntibazongera kuvanwa ukundi mu gihugu cyabo nabahaye. Uwo ni Uhoraho, Imana yawe, ubivuze.