Amosi 5 - Kinyarwanda Bibiliya Ntagatifu

Ukuririra Israheli

¹ Nimwumve iri jambo, iyi ndirimbo y’amaganya ibumvishe, nzu ya Israheli !

² Ngaha araguye umwari wa Siyoni, ntazongera kweguka ukundi, arambaraye hasi adafite umwegura.

³ Nyagasani Uhoraho avuze atya : Umugi wajyaga ujyana abantu igihumbi ku rugamba uzasigarana ijana gusa; naho umugi wajyaga ujyana ijana, uzasigarana icumi gusa.

Nimudahinduka, nta gakiza muteze

⁴ Uhoraho abwiye inzu ya Israheli atya : Nimunshakashake, muzaronka ubugingo,

⁵ ariko ntimunshakashakire i Beteli, ntimwinjire i Giligali, ntimuce i Berisheba, kuko Giligali yose izatwarwa ho umunyago, Beteli igahinduka inzu y’impfabusa.

⁶ Nimushakashake Uhoraho, muzaronka ubugingo. Naho ubundi, azagwa gitumo inzu ya Yozefu nk’inkongi y’umuriro, ayihindure umuyonga, kandi i Beteli nta muntu wo kuyizimya uzahaboneka.

⁷ Bariyimbire abahumanyije ubutabera, birengagiza gukiranura abandi.

⁸ Uwaremye urujeje rw’inyenyeri z’ibihangange n’izitwa Oriyoni, we uhindura umwijima mo igitondo gitangaje, agahindura umunsi mo ijoro ryijimye, agahamagara amazi yo mu nyanja ngo ayasandaze ku isi; izina rye ni Uhoraho!

⁹ Ni we utuma abanyamaboko bamburwa, agatuma n’umugi usahurwa.

¹⁰ Banga uwibutsa ubutabera mu rukiko, uvuga ukuri bakamwanga urunuka.

¹¹ Ubwo rero muryamira umutindi mukamutwara umugabane we w’ingano, ayo mazu mwubakishije amabuye abaje, ntimuzayabamo; iyo mizabibu myiza mwateye ntimuzanywa divayi yayo.

¹² Kuko nzi umubare utabarika w’ibicumuro byanyu, n’ububi bw’ibyaha byanyu, mwe murenganya intungane, mukakira indishyi z’amahugu, mugatera ijanja abakene babatakambiye mu rukiko.

¹³ Ni yo mpamvu umuntu uzi ubwenge yakwicecekera mu gihe nk’iki, kuko ari igihe cy’amakuba.

¹⁴ Nimushake ikiri icyiza, ikibi mukireke, kugira ngo mushobore kubaho, maze Uhoraho, Umugaba w’ingabo, azabane namwe, uko mubivuga.

¹⁵ Nimwange ikibi, mukunde icyiza, nimusubize ubucamanza umwanya wabwo mu rukiko, wenda ahari Uhoraho, Umugaba w’ingabo, yazababarira agasigisigi ko mu muryango wa Yozefu.

¹⁶ Uhoraho, Imana Umugaba w’ingabo, Nyagasani avuze atya: Ku karubanda hose bazarira, mu mayira yose bavuge bati «Mbega ishyano! Mbega ishyano!» Bazatumira umuhinzi ngo yirabure, n’abamenyereye imiborogo ngo barire.

¹⁷ Mu mizabibu yose hazaba icyunamo igihe nzanyura muri mwe rwagati. Uwo ni Uhoraho ubivuze.

Umunsi w’Uhoraho

¹⁸ Bariyimbire abarambirije ku munsi Uhoraho azaziraho! Bimaze iki? Umunsi w’Uhoraho uzaba umeze ute ku bwanyu? Uzaba ari umunsi w’umwijima, si uw’urumuri.

¹⁹ Ni nk’umuntu uhunze intare, hanyuma agahura n’indi nyamaswa y’inkazi, yagera iwe akishingikiriza ku rukuta, nuko inzoka ikamurya!

²⁰ Si byo se, umunsi w’Uhoraho ntuzaba ari umwijima aho kuba umucyo, umwijima w’icuraburindi uzira icyezezi?

Uhoraho ahakanye ingirwabitambo bya Israheli

²¹ Nanga urunuka kandi nkagaya ingendo mukora muje kundamya, sinshobora gushimishwa n’amakoraniro yanyu,

²² igihe muntura ibitambo bitwikwa, no mu maturo yanyu nta na rimwe rinshimisha; sinduha ndeba n’ibitambo byanyu by’ibimasa.

²³ Igiza kure urusaku rw’indirimbo zawe, n’umurya w’inanga zanyu sinshobora kuwumva.

²⁴ Ahubwo uburenganzira nibudendeze nk’amazi, n’ubutabera butembe nk’umugezi udakama!

²⁵ Hari ubwo se mwigeze kuntura ibitambo n’amaturo mu butayu, muri ya myaka mirongo ine, muryango wa Israheli?

²⁶ Ahubwo muzaheka Sakuti umwami wanyu, n’inyenyeri ya Kewani, ikigirwamana cyanyu, ayo mashusho mwikoreye ubwanyu.

²⁷ Nzabajyana bunyago mbarenze Damasi! Uwo ni Uhoraho ubivuze, izina rye ni Imana Umugaba w’ingabo.