Amosi 2 - Kinyarwanda Bibiliya Ntagatifu

Mowabu n’umurwa wayo, Keriyoti

¹ Uhoraho avuze atya: Kabiri gatatu Mowabu icumura! Niyemeje kuyihana kandi sinzivuguruza! Kubera ko yatwitse amagufa y’umwami wa Edomu, ikayahindura ivu,

² nzatwika Mowabu, maze umuriro utsembe ingoro za Keriyoti, Mowabu izarimbuka habaye urusaku ruvanze n’induru n’impanda;

³ nzavana umwami wayo rwagati muri yo, maze mwicane n’abafasha be. Uwo ni Uhoraho ubivuze.

Yuda n’umurwa wayo, Yeruzalemu

⁴ Uhoraho avuze atya: Kabiri gatatu Yuda icumura! Niyemeje kuyihana kandi sinzivuguruza! Kubera ko basuzuguye inyigisho z’Uhoraho, ntibakurikize amategeko ye, kubera ko ibinyoma byabo byari byarabaroshye, ibyo binyoma ari na byo abasekuruza babo bakurikizaga;

⁵ nzatwika Yuda, maze ntsembe ingoro z’i Yeruzalemu.

Israheli n’umurwa wayo, Samariya

⁶ Uhoraho avuze atya: Kabiri gatatu Israheli icumura! Niyemeje kuyihana kandi sinzivuguruza! Kubera ko bagurana intungane amafeza, umukene bakamugurana umuguru w’inkweto,

⁷ kubera ko bakandamiza rubanda rugufi bakayobya abakene inzira, kubera ko umuhungu na se bahurira ku ihabara imwe ngo basebye izina ryanjye ritagatifu,

⁸ kubera ko imyambaro batwaye ho ingwate bayicuje urutambiro, no kubera divayi batwaye ho ingwate bakayinywera mu nzu y’Imana yabo . . .

⁹ Nyamara jyewe nari nabasenyaguriye Abahemori, bareshya n’ibiti by’amasederi bagakomera nk’ibiti by’imishishi! Nari natsotsobye imbuto zabo mpereye hejuru, ndandura n’imizi yabo mpereye hasi.

¹⁰ Naho mwebwe nabazamuye mu Misiri, mbayobora imyaka mirongo ine mu butayu kugira ngo mwigarurire igihugu cy’Abahemori.

¹¹ Natoye abahanuzi mu bana banyu, mu basore banyu ntoramo abanyiyegurira, si ko byagenze se, bana ba Israheli? Uwo ni Uhoraho ubivuze.

¹² Nyamara mwebwe mwanywesheje divayi abanyiyeguriye, abahanuzi mubaha iri tegeko ngo «Ntimugahanure».

¹³ . . . kubera ibyo byose ngiye kubanyukanyukira aho muri, nk’uko imashini bahurisha imyaka inyukanyuka imiba y’umusaruro;

¹⁴ umuntu w’ibakwe ntazashobora guhunga, umunyamaboko azabure ingufu ze, n’uw’intwari ntazacika ku icumu,

¹⁵ umuhanga w’umuheto ntazaba agishoboye kurinda, uw’impayamaguru ntazashobora guhunga, n’ugendera ku ifarasi ntazarokora ubugingo bwe,

¹⁶ n’umuntu warahiriwe ubutwari azahunga yambaye ubusa uwo munsi! Uwo ni Uhoraho ubivuze.