Amaganya 3 - Kinyarwanda Bibiliya Ntagatifu

INDIRIMBO YA GATATU Alefu

Alefu

¹ Ndi umuntu wamenyeranye n’umubabaro; nywutewe n’inkoni y’uburakari bwe.

² Yaranshoreye anyuza mu mwijima, aho kungendesha mu rumuri.

³ Ni jye jyenyine acyamuriraho ikiganza cye, akabigira iminsi yose.

Beti

Beti

⁴ Yanyoshye buhoro buhoro umubiri wanjye, amagufa yanjye arayajanjagura;

⁵ yanzengurukijeho urukuta rurangota, ankikizaho ibitotezo n’ibyago;

⁶ antuza mu mwijima mbese nk’abapfuye bo mu bihe bya kera.

Gimeli

Gimeli

⁷ Yarankingiranye sinashobora gusohoka, ambohesha iminyururu iremereye.

⁸ Naratakambye ndanatabaza, ariko isengesho ryanjye ararizinzika.

⁹ Inzira zanjye yarazizitiye n’amabuye abajije, aho nanyuraga arahazibira.

Daleti

Daleti

¹⁰ Amereye nk’ikirura cyubikiye cyangwa nk’intare irekereje;

¹¹ yayobagije amayira yanjye, aranshwanyaguza; ansiga ndi igiterashozi.

¹² Yafoye umuheto we maze angira nk’intego y’umwambi we.

He

He

¹³ Yampinguranyije impyiko n’imyambi yo mu mutana we.

¹⁴ Umuryango wanjye wose wampinduye urw’amenyo, barantaramana igihe cyose.

¹⁵ Yampagije indurwe, anyuhira ibinyobwa bisharira.

Vawu

Vawu

¹⁶ Yampekenyesheje umusenyi, andisha ivu.

¹⁷ Umutima wanjye nta mahoro ukiranganwa, sinkibuka icyitwa amahirwe!

¹⁸ Nuko ndavuga nti «Imbaraga zanjye zarayoyotse, kimwe n’icyizere nari mfitiye Uhoraho.»

Zayini

Zayini

¹⁹ Ibuka umubabaro wanjye n’agahinda kanjye, umenye indurwe n’uburozi wanyuhiye!

²⁰ Ndabizirikana maze umutima wanjye ugashenguka;

²¹ ariko kandi nzakomeza nibuke n’ibi ngibi bintera icyizere:

Heti

Heti

²² ni koko, imbabazi z’Uhoraho ntizirashira, urukundo rwe ntirugira iherezo,

²³ ahubwo ineza ye ayivugurura uko bukeye, ubudahemuka bwe ntibugira urugero!

²⁴ Ubwo ndavuga nti «Uhoraho ni we munani wanjye, ni cyo kintera kumwiringira.»

Teti

Teti

²⁵ Uhoraho ni mwiza ku bamutegereje, anezeza umutima w’abamushakashaka.

²⁶ Ni byiza ko umuntu yategereza mu ituze umukiro uzaturuka kuri Uhoraho,

²⁷ akanikorera umuzigo we, akiri muto.

Yodi

Yodi

²⁸ Ni byiza ko umuntu yakwicara ahiherereye agatuza, mu gihe umutwaro w’Uhoraho ukimuremereye;

²⁹ ajye yunama akoze umunwa mu mukungugu: ahari byamuviramo kwizera!

³⁰ Nategere umusaya umukubita, maze yemere guhazwa n’ibitutsi,

Kafu

Kafu

³¹ kuko Uhoraho nta we atererana buheriheri.

³² Ni koko, arahana ariko akagira imbabazi, akurikije impuhwe ze zitagira urugero;

³³ ntanezezwa no gucyaha abantu cyangwa ngo agambirire kubababaza.

Lamedi

Lamedi

³⁴ Iyo bakandamiza imbohe zose z’igihugu,

³⁵ bagahinyura uburenganzira bw’ikiremwamuntu mu maso y’Umusumbabyose,

³⁶ bakarenganya umuntu mu rubanza, ubwo se Uhoraho yaba atabibona?

Memu

Memu

³⁷ Ni nde uvuga ijambo rimwe, ibyo avuze bikabaho? Uhoraho se, si we utegeka?

³⁸ Mu kanwa k’Umusumbabyose se, si ho haturuka amakuba n’amahirwe?

³⁹ Noneho se muntu yakwinubira iki, niba akiriho, kandi ari n’umunyabyaha?

Nuni

Nuni

⁴⁰ Nidusuzume inzira zacu, tuzigenzure maze tugarukire Uhoraho;

⁴¹ twerekeze ibiganza byacu ejuru, imitima yacu ihugukire Imana iri mu ijuru.

⁴² Ni koko, twaracumuye turigomeka, naho wowe, wanga kutubabarira!

Sameki

Sameki

⁴³ Wimiramijeho uburakari bwawe, uraduhiga, maze uradutsemba nta mbabazi;

⁴⁴ wikingiriza igicu cyawe kugira ngo isengesho ryacu ritakugeraho,

⁴⁵ uduhindura ibiseswa n’umwanda rwagati mu bihugu.

Pe

Pe

⁴⁶ Abanzi bacu bose baratwasamiye;

⁴⁷ umugabane dusigaranye ni ubwoba n’urwobo, amakuba n’ukurimbuka;

⁴⁸ none amaso yanjye arasesa amarira adakama, kubera ukurimbuka k’umwari w’umuryango wanjye.

Ayini

Ayini

⁴⁹ Amaso yanjye ararira ubudatuza, kandi nta na rimwe ajya ahwema,

⁵⁰ kugeza ubwo Uhoraho azunama, akarebera aho ari mu ijuru.

⁵¹ Amaso yanjye arambaga kubera agahinda natewe n’abakobwa bose bo mu Mugi wanjye.

Sade

Sade

⁵² Abanyanga nta mpamvu barantoteza, bakampiga nk’inyoni;

⁵³ baroshye ubugingo bwanjye mu rwobo, bangerekaho ibuye;

⁵⁴ amazi andenga ku mutwe, ni ko kuvuga nti «Ndahejeje!»

Kofu

Kofu

⁵⁵ Uhoraho, natakambiye izina ryawe, ndi ikuzimu mu rwobo;

⁵⁶ umva ijwi ryanjye rigutakira, rigira riti «Wikwima amatwi imiborogo n’induru byanjye.»

⁵⁷ Waranyegereye umunsi nagutakambiraga, maze uravuga uti «Wigira ubwoba!»

Reshi

Reshi

⁵⁸ Uhoraho, mu rubanza banciraga, wambereye umuvugizi, ugobotora ubugingo bwanjye;

⁵⁹ Wabonye ukuntu bampohoteraga, Uhoraho, ngwino undenganure.

⁶⁰ Wabonye uko bashishikajwe no kwihorera, n’imigambi yose mibi bamfitiye.

⁶¹ Uhoraho, wumvise ibitutsi byabo, n’uko bahihibikanira kungambanira;

⁶² mu byo bavuga no mu byo bongorerana abanzi banjye ntibahwema kundenguriraho.

⁶³ Bitegereze: baba bicaye, baba bahagaze, ni jye bataramana.

Tawu

Tawu

⁶⁴ Uhoraho, na bo uzabiture ukurikije ibikorwa byabo;

⁶⁵ umutima wabo uzawukomeze nk’ibuye, ube ari wo muvumo ubavumye.

⁶⁶ Uzabakurikirane wuzuye uburakari, ubatsembe mu nsi y’ijuru ryawe, Uhoraho.