Abaroma 2 - Kinyarwanda Bibiliya Ntagatifu

Urubanza rw’Imana itabera

¹ Nuko rero nta cyo uzabona wireguza, wowe muntu uca urubanza, uwo uri we wese : kuko iyo ucira undi urubanza, uba witsindisha ubwawe, kuko ugenza utyo nawe wowe uca urubanza.

² Tuzi ko Imana izacira urubanza abagenza batyo ikurikije ukuri.

³ None se, muntu ucira urubanza abakora ibyo bintu kandi nawe ubikora, wibwira ko uzasimbuka ute urubanza rw’Imana?

⁴ Cyangwa se waba usuzugura impuhwe zayo zitabarika, ubwihangane n’ubugwaneza bwayo, ukirengagiza ko ubuntu bwayo bukureshya ngo wicuze?

⁵ Noneho rero, kuko wanangiye umutima wawe ukanga kwicuza, urihunikira uburakari bwa wa munsi w’uburakari Imana izahishura ko ica imanza zitabera,

⁶ Yo izitura buri wese ikurikije ibikorwa bye :

⁷ ubugingo bw’iteka ku batacogoye mu gukora ikiri cyiza bashakashaka ikuzo, icyubahiro n’ukutazapfa;

⁸ naho uburakari n’umujinya ku bivumbuye, ntibumve ukuri, bakayoboka inabi.

⁹ Impagarara n’ishavu birakokama buri mutima w’umuntu ukora ikibi, uhereye ku Muyahudi ukageza ku Mugereki;

¹⁰ naho ikuzo, icyubahiro n’amahoro kuri buri wese ukora icyiza, uhereye ku Muyahudi ukageza ku Mugereki.

¹¹ Kuko Imana itareba igihagararo cy’abantu.

¹² Koko rero, abazaba baracumuye nta mategeko, bazorama nta mategeko; naho abazaba baracumuye bazi amategeko, bazacirwa urubanza hakurikijwe amategeko.

¹³ Kuko abumva amategeko atari bo ntungane ku Mana, ahubwo abakurikiza amategeko ni bo bazagirwa intungane.

¹⁴ Iyo abanyamahanga bakora ku bwa kamere ibihuje n’amategeko, kandi nyamara batagira amategeko, bibera ubwabo amategeko, bo badafite amategeko.

¹⁵ Bagaragaza batyo ko icyo amategeko agamije cyanditswe mu mitima yabo. N’umutimanama wabo na wo ni intangamugabo hamwe n’imitima ibarwanamo, imwe ishinja, indi irengera.

¹⁶ Nk’uko nabivuze mu Nkuru Nziza yanjye, bizagaragara umunsi Imana izakoresha Yezu Kristu, Imana igacira urubanza ibyo abantu bahishahisha bakora rwihishwa.

Israheli ntiyumvira

¹⁷ Wowe rero witwa Umuyahudi, ukitwaza amategeko, ukiratana Imana,

¹⁸ wowe uzi kandi ugushaka kwayo, ukamenya guhitamo ikiruta ibindi kuko wigishijwe n’amategeko,

¹⁹ wowe wiyemera ngo ni wowe warandata impumyi, wamurikira abari mu mwijima,

²⁰ wahugura injiji, wakwigisha abana, ngo kuko wasanze mu mategeko hakubiyemo ubumenyi n’ukuri . . .

²¹ Ko wigisha abandi, ntiwiyigishe ubwawe; ko ubwiriza kutiba, nyamara ukiba;

²² ko ubuza gusambana, ugasambana; ko uzira ibigirwamana, kandi ugasahura amasengero yabyo;

²³ ko wiratana amategeko, ariko ugasuzuguza Imana urenga ku mategeko,

²⁴ nk’uko byanditswe ngo: «Izina ry’Imana bararituka mu mahanga ku mpamvu yanyu».

²⁵ Koko kuba waragenywe byagira akamaro ukurikije amategeko, naho niba ugomera amategeko, ukugenywa kwawe kwabaye ukutagenywa.

²⁶ Niba se utagenywe akurikije ibitunganiye amategeko, nta bwo se ukuba atagenywe bizaba bihwanye n’ukugenywa?

²⁷ Ndetse utagenywe umubiri, ariko agakurikiza amategeko, azagucira urubanza, wowe uzaba warenze ku mategeko witwaje ibyanditswe n’ukugenywa.

²⁸ Kuko Umuyahudi ntumubwirwa n’ibigaragara, n’ukugenywa si uko ku mubiri ahagaragara;

²⁹ ahubwo Umuyahudi nyakuri ni uri we muri kami ye, n’ukugenywa nyakuri ni uk’umutima muri roho bitari mu nyandiko. Uwo ntakura ishimwe rye ku bantu, ahubwo ku Mana.