Abaroma 11 - Kinyarwanda Bibiliya Ntagatifu

Imana ntiyaciye Israheli buheriheri

¹ Reka mbaze rero: mbese Imana yaba yaraciye umuryango wayo? Oya ntibikabe! Nanjye ndi Umuyisraheli wo mu rubyaro rwa Abrahamu, mu nzu ya Benyamini.

² Nta bwo Imana yaciye umuryango wayo kandi ari wo yari yaratoye. Cyangwa se ntimuzi icyo Ibyanditswe bivuga aho Eliya arega Israheli ku Mana, agira ati

³ «Nyagasani, bishe abahanuzi bawe, basenya intambiro zawe, none nsigaye ndi jyenyine kandi nanjye barahigira amagara yanjye!»

⁴ Mbese Imana imusubiza iki? «Nsigaranye abantu ibihumbi birindwi batapfukamiye Behali.»

⁵ Bityo rero no muri ibi bihe, hari agasigisigi katoranijwe ku buntu.

⁶ Ubwo rero ari ku buntu, ntibikiri ku bw’ibikorwa, naho ubundi ubuntu ntibwaba bukiri bwo.

⁷ Bite rero? Ko icyo Israheli yashakashakaga itagishyikiriye! Nyamara abatowe bo baragishyikiriye, naho abandi baranangira,

⁸ nk’uko byanditswe ngo «Imana yabahaye umutima uhumye, n’amaso atabona, n’amatwi atumva, kugeza na n’ubu.»

⁹ Na Dawudi aravuga ati «Ameza yabo arakababera umutego, urushundura, urutsitariro n’igihano bikwiriye!

¹⁰ Amaso yabo arakijima boye kubona n’umugongo wabo ube umuheto iteka ryose.»

¹¹ Reka nongere mbaze: batsitariye kugwa ngo bahere hasi? Oya, ntibikabe! Ahubwo ugutsitara kwabo kwatumye uburokorwe bugera ku banyamahanga kugira ngo bibatere ishyari.

¹² Ubwo se ugutsitara kwabo kwakungahaje isi, n’ukugwa kwabo kugakungahaza amahanga, ntibizahebuza nibagera ku burokorwe bwuzuye?

¹³ Mwebwe abanyamahanga, dore icyo mbabwira: mu rugero jyewe ndi intumwa mu mahanga, nubahiriza ubutumwa nahawe,

¹⁴ nizera gutera ishyari abo dusangiye ubwoko ngo ngire bamwe muri bo ndokora.

¹⁵ Kuko niba ugucibwa kwabo kwararonkeye isi kwiyunga n’Imana, ukugarurwa kwabo kuzacura iki kitari ukuzuka kw’abari barapfuye?

¹⁶ Iyo ifu y’umuganura ari ntagatifu, n’irobe ni ko riba; n’iyo imizi ari mitagatifu, amashami na yo ni ko aba.

¹⁷ Niba amwe mu mashami yaratemwe, maze wowe, n’ubwo wari ishami ry’agasozi, ukahagemekwa maze ugasangizwa amakakama azamurwa n’umuzi w’umuzeti,

¹⁸ ntukitere hejuru wigamba kuri ya mashami. Niba witeye hejuru, wibuke ko atari wowe uhagaritse umuzi, ko ahubwo ari umuzi uguhagaritse.

¹⁹ Ahari wavuga uti «Batemye amashami kugira ngo ngemekwe.»

²⁰ Ni byo koko. Yatemwe ku mpamvu y’ukutemera, naho wowe uhahagaritswe n’ukwemera. Ntukitere hejuru rero, ahubwo tinya.

²¹ Kuko ubwo Imana itasoneye amashami ya kamere, nawe ntizagusonera.

²² Irebere nawe ubugwaneza n’ubutabera by’Imana: ku baguye ikurikira ubutabera, kuri wowe igira ubuntu, niba ariko ugumye muri ubwo bugwaneza, naho ubundi nawe izagukorora.

²³ Nyamara na bo umunsi bemeye, bazongera bagemekwe: kuko Imana ishobora kongera kubagemeka.

²⁴ Ko wowe watemwe ku giti cy’agasozi muhuje ubwoko, maze ukagemekwa ku muzeti mwiza mudahuje ubwoko, nkanswe bo bazagemekwa ku muzeti wabo bwite bahuje ubwoko!

Amaherezo Israheli yose izakizwa

²⁵ Koko rero, bavandimwe, sinshaka ko muyoberwa iri banga hato mutazirata: igice kimwe cya Israheli kizanangira umutima kugeza igihe abanyamahanga bose bazaba bakoranyijwe.

²⁶ Bityo rero Israheli yose izarokorwa nk’uko byanditswe ngo «Umucunguzi azaturuka i Siyoni, yamaganire kure ya Yakobo icyitwa ubugomeramana.

²⁷ Ngiryo isezerano nzagirana na bo, maze kubakuraho ibyaha byabo.»

²⁸ Kuba batakiriye Inkuru Nziza, babaye abanzi b’Imana, naho kuba baratowe, ni abatoni bayo babikesha abasekuruza.

²⁹ Koko rero igihe Imana imaze gutanga no gutora, ntiyisubiraho.

³⁰ Nk’uko namwe kera mutumviraga, none ubu ngubu mukaba mwaragiriwe impuhwe ku mpamvu y’ukutumvira kwabo,

³¹ bityo na bo ubu ngubu banze kumvira kugira ngo mugirirwe impuhwe, mu gihe cyabo na bo bazazigirirwe.

³² Imana yakoranirije abantu bose mu bwigomeke kugira ngo bose hamwe ibagirire imbabazi.

³³ Mbega ukuntu ubukungu n’ubuhanga n’ubwenge by’Imana birengeje urugero! Mbega ukuntu imigambi yayo ari inshoberabantu, n’inzira zayo zikaba urujijo!

³⁴ «Koko rero, ni nde wamenye igitekerezo cya Nyagasani, cyangwa ni nde wamubereye umujyanama,

³⁵ cyangwa se wabanje kugira icyo amuha ngo azagombe kumwitura?»

³⁶ Ko byose bikomoka kuri We bikabeshwaho na We, bikaberaho We. Nahabwe ikuzo iteka ryose! Amen.