Abalewi 21 - Kinyarwanda Bibiliya Ntagatifu

Amategeko yerekeye imibereho bwite y’abaherezabitambo

¹ Uhoraho abwira Musa, ati «Dore ibyo uzamenyesha abaherezabitambo bene Aroni: Ntihazagire umuherezabitambo wegera intumbi y’umuntu wo mu muryango we, kuko byamuviramo kwandura.

² Cyakora uwo mupfu naba ari mwene wabo wa bugufi basangiye umubiri umwe, azamwegere. Ni ukuvuga nyina, se, umuhungu we, umukobwa we, cyangwa umuvandimwe we.

³ Mushiki we na we, iyo apfuye akiri isugi, umuherezabitambo ashobora kumwegera akemera akiyanduza, kuko nta wundi mugabo wigeze kumutunga, kandi akaba akiri muri bene wabo ba bugufi.

⁴ Umuherezabitambo ni we mutware mu muryango we, azirinde rero kwiyanduza kuko byamutesha icyubahiro.

⁵ Abaherezabitambo ntibaziyogosheshe amasunzu, ntibaziyogoshe uruziga, cyangwa ngo bicishe indasago ku mubiri.

⁶ Abaherezabitambo bazegurirwa Imana, ni bo bazatura Uhoraho igitambo cy’ibiribwa. Bityo rero, bazahore ari intungane, maze boye gusuzuguza izina ry’Imana yabo.

⁷ Kuko beguriwe Imana, abaherezabitambo bazirinde kurongora umugore w’indaya, uw’icyomanzi cyangwa uwasenzwe n’undi mugabo.

⁸ Umuherezabitambo ni we utura Imana yawe igitambo cy’ibiribwa, ugomba kumenya rero ko ari intungane. Na we kandi azakubere intungane kuko jyewe Uhoraho ndi intungane, kandi ni jye ubatagatifuza.

⁹ Umukobwa w’umuherezabitambo niyitesha agaciro akigira icyomanzi, bazamutwike kuko ari se aba akojeje isoni.

¹⁰ Umuherezabitambo mukuru, ni we userukira abavandimwe be bose; ni we wasizwe amavuta kandi yemererwa kwambara imyambaro mitagatifu. Kubera izo mpamvu rero, ntazatendeze imisatsi ye cyangwa ngo atabure imyambaro ye.

¹¹ Ntazagire intumbi n’imwe yegera, n’iyo yaba iya se cyangwa iya nyina, kuko byamuviramo kwandura.

¹² Kuko yasizwe amavuta, ntazasohoke mu Ngoro y’Uhoraho kugira ngo atayisuzuguza. Ndi Uhoraho.

¹³ Umuherezabitambo mukuru agomba kurongora umukobwa ukiri isugi.

¹⁴ Azirinde gushaka umupfakazi cyangwa uwasenzwe n’undi mugabo cyangwa umugore wigize icyomanzi akitesha agaciro. Ahubwo azarongore umwari wo mu muryango we.

¹⁵ Ibyo bizarinda umuryango we kuvukamo abuzukuru bahumanye. Ndi Uhoraho, kandi ni jye ubatagatifuza.»

Abadashobora kuba abaherezabitambo

¹⁶ Uhoraho abwira Musa, ati

¹⁷ «Dore ibyo uzamenyesha Aroni: Umuntu wo mu nkomoko yawe, naba afite ubumuga ku mubiri, azirinde gutura Uhoraho igitambo cy’ibiribwa. Ibyo kandi bizababere itegeko ridakuka kuva mu gisekuruza kugera mu kindi.

¹⁸ Koko rero, umuntu w’impumyi, ucumbagira, ufite izuru ribwataraye cyangwa amaboko yaremaye,

¹⁹ uwavunitse akaguru cyangwa akaboko,

²⁰ uhetse inyonjo, uwazonzwe, ufite ijisho ry’umuturi, urwaye ubuheri cyangwa amahumane, ufite inturugunyu zamenetse, mbese umuntu wese urangwaho inenge, ntashobora kwegera Uhoraho.

²¹ Nuko rero umuntu wo mu nkomoko y’umuherezabitambo Aroni, naba yaramugaye, ntazature Uhoraho igitambo cy’ibiribwa. Kuko nyine aba ari ikimuga, ntazigore atura Imana ye igitambo cy’ibiribwa.

²² Cyakora ibyo biribwa by’Imana ari yo maturo matagatifu, ashobora kubiryaho,

²³ ariko azirinde kwegera umubambiko cyangwa urutambiro. Abikoze kandi yaramugaye, yaba asuzuguje ingoro yanjye n’ibiyirimo, kuko ari jye Uhoraho ubatagatifuza.»

²⁴ Ibyo Musa yabimenyesheje Aroni n’abahungu be, hamwe n’Abayisraheli bose.