Abalewi 2 - Kinyarwanda Bibiliya Ntagatifu

Ikoro ry’ibihingwa

¹ «Nihagira umuntu uzanira Uhoraho ikoro ry’ibihingwa, rizabe ari ifu azasukamo amavuta y’imizeti, kandi ayishyiremo ububani,

² ayishyikirize abaherezabitambo ari bo bene Aroni. Kuri iyo fu ivanze n’amavuta, umuherezabitambo azayoreho incuro y’urushyi by’umuhango, abitwikire ku rutambiro. Iryo ni ituro ry’ibiribwa rikongotse burundu, kandi rifite impumuro yurura Uhoraho.

³ Ibisagutse kuri iryo turo, bizabe ibya Aroni n’abahungu be. Ni umugabane mutagatifu rwose, kuko ari ibyasagutse ku maturo y’ibiribwa byakongokeye Uhoraho burundu.

⁴ Nuzana ikoro ry’umutsima watetswe mu ifuru, rizabe rigizwe n’utugati tw’ifu tudasembuye kandi twafunyangiwe mu mavuta, cyangwa ribe rigizwe n’udutsima tudasembuye dusize amavuta.

⁵ Nuzana ituro ry’ikintu cyatetswe ku ipanu, kizave mu ifu ivanze n’amavuta, kandi nta musemburo urimo.

⁶ Mbere yo kubitura, uzabe wabanje kubigabanyamo ibice no kubisukaho amavuta. Iryo ni ikoro.

⁷ Nuzana ituro ryakaranzwe ku ipanu, rizave mu ifu yavuganywe n’amavuta.

⁸ Uzazana iryo turo ryateguriwe Uhoraho rityo, urishyikirize umuherezabitambo, maze na we arijyane ku rutambiro.

⁹ Umuherezabitambo azagabanya kuri iryo turo iby’umuhango, maze abitwikire ku rutambiro. Icyo ni igitambo cy’ibiribwa bikongotse burundu, kandi bifite impumuro yurura Uhoraho.

¹⁰ Ibisagutse kuri iryo turo, bizabe ibya Aroni n’abahungu be. Ni umugabane mutagatifu rwose: kuko ari ibyasagutse ku maturo y’ibiribwa byakongokeye Uhoraho burundu.

¹¹ Ikoro ryose muzatura Uhoraho ntirizabe ari umutsima wavuganywe n’umusemburo. Koko rero, muramenye ntimuzagire umusemburo cyangwa ubuki mutwika mushaka ko biba ituro ry’ibiribwa bikongokeye Uhoraho.

¹² Cyakora, muzajya mubituraho ituro ry’umuganura, ariko ntimuzabijyane ku rutambiro mwibwira ko bifite impumuro yurura Uhoraho.

¹³ Ituro ryose uzazana, uzariminjireho umunyu. Ntuzibagirwe na rimwe gushyira ku ituro ryawe, umunyu w’Isezerano ry’Imana yawe. Buri turo ryawe ryose, uzajye uritura ririmo umunyu.

¹⁴ Nuzanira Uhoraho ituro ry’umuganura, rizabe ari iry’amahundo yokeje. Cyangwa ifu y’igiheri cy’imbuto nshyashya, ni yo uzazana, ibe ituro ry’umuganura.

¹⁵ Iryo turo uzarisukemo amavuta, unarishyireho ububani. Iryo ni ikoro.

¹⁶ Hanyuma, kuri iyo fu y’igiheri no kuri ayo mavuta, umuherezabitambo azagabanyeho iby’umuhango, maze abitwikane na bwa bubani bwose. Iryo ni ituro, igitambo cy’ibiribwa gikongokeye Uhoraho burundu.