Abagalatiya 3 - Kinyarwanda Bibiliya Ntagatifu

Ingabire ya Roho Mutagatifu iva he?

¹ Mbega ngo muraba abapfu, Banyagalati ! Ni nde wabararuye kandi mwareretswe uko Kristu yabambwe ?

² Ndifuza ko mumenyesha iki cyonyine: ari ukuzuza amategeko, ari no kwakira ukwemera, icyabahesheje Roho ni ikihe ?

³ Mbese mwabaye abapfu bigejeje aho ? Mwatangiye ibintu mufashijwe na Roho, none mwibwiye ko bizuzurizwa mu ruhu rw’umubiri?

⁴ Mbega kuruhira ubusa? Ubonye n’iyo biba ku busa nyine!

⁵ Mbese nyine, Ubaha Roho, akabakoramo ibitangaza, abigirira ko mwujuje amategeko cyangwa ko mwakiriye ukwemera?

Abrahamu yasezeranyijwe ko amahanga azarokorwa hatagombye amategeko

⁶ Nk’uko Abrahamu yemeye Uhoraho bigatuma aba intungane,

⁷ mubimenye rero: abemera ni bo bana ba Abrahamu.

⁸ Ibyanditswe byabibonye kare ko Imana izatagatifuza amahanga ku mpamvu y’ukwemera, byo byahanuriye Abrahamu ngo «Imiryango yose y’isi izaguherwamo umugisha.»

⁹ Bityo rero, abemera bahabwa umugisha hamwe na Abrahamu w’umwemezi.

¹⁰ Naho abitwaza ibikorwa by’amategeko, bikururira umuvumo kuko byanditswe ngo «Arakaba ikivume utuzuza ibyanditswe byose mu Gitabo cy’Amategeko.»

¹¹ Ni ikintu kigaragara kandi ko mu maso y’Imana, nta muntu n’umwe waba intungane abikesha amategeko kuko «intungane izabeshwaho n’ukwemera.»

¹² Amategeko kandi ntahuje.» n’ukwemera yo avuga ngo «umuntu uzubahiriza ibyo, bizamubeshaho

¹³ Kristu yadukijije umuvumo w’amategeko, yihindura umuvumo ari we, ari twe agirira, kuko byanditswe ngo «Umanitse ku giti wese ni umuvumo.»

¹⁴ Ibyo ari ukugira ngo umugisha wa Abrahamu usesekare ku mahanga muri Kristu Yezu, kandi duhabwe mu kwemera Roho twasezeranijwe.

Urubyaro rwa Abrahamu: ni Kristu n’abemera

¹⁵ Bavandimwe, mvuge mpereye ku mico y’abantu: indagano umuntu akoze, nta wundi uyisesa cyangwa ngo agire icyo ayongeraho.

¹⁶ Abrahamu rero ni we wahawe amasezerano, we n’urubyaro rwe. Ntibavuga imbyaro ze nk’aho ari nyinshi: ahubwo ni nk’aho ari urubyaro rumwe rukumbi: «n’urubyaro rwawe», ari rwo Kristu.

¹⁷ Icyo nshaka kuvuga rero ni iki: indagano ihamye y’Imana nta bwo yaseswa n’itegeko ryashyizweho hashize imyaka magana ane na mirongo itatu; bibaye ibyo, iyo ndagano yaba ibaye ubusa.

¹⁸ Kuko iyaba umurage watangwaga ku bw’itegeko, ntibyaba bikibaye ku bw’isezerano. Nyamara ineza Imana yagiriye Abrahamu, yayigiriye isezerano.

¹⁹ Itegeko rero ni iry’iki? Ryongereweho hanyuma ngo rijye rigaragaza uwacumuye, kuzageza igihe hazahinguka urubyaro rwagenewe isezerano. Itegeko ryatangajwe n’abamalayika barishinga umuhuza.

²⁰ Nyamara umuhuza ntiyabaye uw’umwe. Imana yo ni imwe rukumbi.

²¹ Noneho se, itegeko ryaba ritambamiye amasezerano y’Imana? Oya ntibikabe! Iyaba koko haratangajwe itegeko ritanga ubugingo, ubutungane buba mu by’ukuri buriturukaho.

²² Ahubwo rero Ibyanditswe byabohesheje byose ingoyi y’icyaha kugira ngo isezerano rizuzurizwe abemera Yezu Kristu.

²³ Mbere y’uko igihe cy’ukwemera kigera, twari nk’imfungwa turinzwe n’amategeko, dutegereje uko kwemera kwagombaga guhishurwa.

²⁴ Bityo rero, amategeko yaradushoreye adushyikiriza Kristu kugira ngo tuzahabwe ubutungane tubikesha ukwemera.

²⁵ Ubu rero, kuva aho haziye ukwemera, ntitugishorewe,

²⁶ kuko mwese muri abana b’Imana mubikesha kwemera Kristu Yezu.

²⁷ Kandi ni koko, mwebwe mwese ababatijwe muri Kristu, mwambaye Kristu.

²⁸ Nta Muyahudi ukiriho, nta Mugereki, nta mucakara, nta mwigenge, nta mugabo, nta mugore, kuko mwese muri umwe muri Kristu Yezu.

²⁹ Ubwo rero muri aba Kristu, noneho ni mwe rubyaro rwa Abrahamu, ni mwe rero muzegukana umurage wasezeranywe.