Abacamanza 1 - Kinyarwanda Bibiliya Ntagatifu

Abayisraheli batura muri Kanahani

¹ Yozuwe amaze gupfa, Abayisraheli babaza Uhoraho, bagira bati «Ni nde muri twe uzazamuka bwa mbere akajya gutera Abakanahani kugira ngo abarwanye?»

² Uhoraho arabasubiza ati «Yuda ni we uzazamuka bwa mbere. Dore maze kwegurira igihugu mu biganza bye.»

³ Yuda abwira Simewoni umuvandimwe we, ati «Tuzamuke tujye mu mugabane wanjye, maze turwanye Abakanahani. Hanyuma nanjye nzajyana nawe mu mugabane wawe.» Nuko Simewoni ajyana na we.

⁴ Yuda arazamuka, maze Uhoraho yegurira Abakanahani n’Abaperizi mu biganza byabo. I Bezeki bahatsinda abantu ibihumbi cumi muri bo.

⁵ Aho i Bezeki, bahasanga Adoni‐Bezeki baramurwanya; batsinda Abakanahani n’Abaperizi.

⁶ Adoni‐Bezeki arahunga, ariko baramukurikira baramufata, maze bamuca ibikumwe by’ibiganza n’iby’ibirenge.

⁷ Adoni‐Bezeki aravuga ati «Abami mirongo irindwi bari baraciwe ibikumwe by’ibiganza n’iby’ibirenge, batoraguraga ibisigazwa byo mu nsi y’ameza yanjye. Ibyo nabakoreye, Imana irabinyituye.» Bamuzana i Yeruzalemu, ari na ho yaguye.

⁸ Bene Yuda batera Yeruzalemu maze barayigarurira, bamarira ku nkota abahatuye kandi umugi barawutwika.

⁹ Nyuma y’ibyo, Bene Yuda baramanuka kugira ngo barwanye Abakanahani bari batuye mu karere k’imisozi miremire, n’i Negevu no mu karere k’imisozi migufi.

¹⁰ Hanyuma Yuda atera Abakanahani bari batuye i Heburoni — icyo gihe yitwaga Kiriyati‐Haruba — maze batsinda Sheshayi, Ahimani na Talimayi.

¹¹ Yuda ava aho ajya gutera abaturage b’i Debiri — icyo gihe yitwaga Kiriyati‐Seferi —.

¹² Kalebu ni ko kuvuga ati «Umuntu uzatsinda Kiriyati‐Seferi maze akayigarurira, nzamushyingira Akisha, umukobwa wanjye.»

¹³ Otiniyeli mwene Kenazi, umuvandimwe wa Kelebu w’umuhererezi, yigarurira umugi, maze Kalebu amushyingira Akisha, umukobwa we.

¹⁴ Nuko akihagera, Akisha yoshya umugabo we gusaba sebukwe umurima. Bukeye, Akisha amanuka ku ndogobe ye, maze Kalebu aramubaza ati «Icyo wifuza ni iki?»

¹⁵ Undi aramusubiza ati «Ngirira ubuntu. Ubwo wampaye isambu i Negevu, umpe n’ibizenga by’amazi». Nuko Kalebu amuha ibizenga bya ruguru n’iby’epfo.

¹⁶ Abahungu ba wa Mukeniti, sebukwe wa Musa, bazamukana na Bene Yuda, bava mu mugi w’Imikindo berekeza mu butayu bwa Yuda bwari mu majyepfo ya Aradi. Nuko baraza babana n’abahatuye.

¹⁷ Yuda ajyana na Simewoni, umuvandimwe we, batsinda Abakanahani bari batuye i Sefati, umugi wose barawutsemba, maze bawita Horima (ari byo kuvuga «itsembwa»).

¹⁸ Yuda yigarurira umugi wa Gaza n’intara yawo, uwa Ashikeloni n’intara yawo, uwa Ekironi n’intara yawo.

¹⁹ Uhoraho yari kumwe na Yuda, ubwo yigaruriraga akarere k’imisozi miremire. Nyamara ntibashoboye kwirukana abatuye mu kibaya, kuko bari bafite amagare y’ibyuma.

²⁰ Nk’uko byari byarategetswe na Musa, Heburoni bayigabira Kalebu, ayinyaga abahungu batatu ba Anaki.

²¹ Naho Abayebuzi bari batuye i Yeruzalemu, Bene Benyamini ntibabanyaze, ahubwo Abayebuzi bakomeje guturana na Bene Benyamini i Yeruzalemu kugeza na n’ubu.

²² Abo mu nzu ya Yozefu na bo barazamuka, batera Beteli, kandi Uhoraho yari kumwe na bo.

²³ Inzu ya Yozefu ijya gutata umugi wa Beteli, wahoze witwa Luzi.

²⁴ Nuko intasi zibona umugabo usohotse mu mugi, maze ziramubwira ziti «Twereke aho twakwinjirira mu mugi, maze tuzabikwiture.»

²⁵ Uwo mugabo arahabereka, maze umugi wose bawumarira ku nkota, naho we baramureka arigendera n’abe bose.

²⁶ Uwo mugabo ajya mu gihugu cy’Abaheti, ahubaka umugi awita Luzi, ari na ko ukitwa kugeza na n’ubu.

²⁷ Manase ntiyashoboye gutsinda abaturage b’i Betishani, Tanaki, Dori, Yibileyamu, Megido, habe n’abo mu midugudu ihakikije, maze Abakanahani bakomeza gutura muri icyo gihugu.

²⁸ Nyamara aho Israheli ikomereye, yakoresheje imirimo y’uburetwa Abakanahani, ariko ntiyashobora kubirukana.

²⁹ Efurayimu ntiyashoboye kwirukana Abakanahani bari batuye i Gezeri, nuko Abakanahani bakomeza guturana na Bene Efurayimu i Gezeri.

³⁰ Zabuloni ntiyashoboye kwirukana abaturage b’i Kitironi kimwe n’ab’i Nahaloli; Abakanahani baturana na Bene Zabuloni, ariko baragoka bakoreshwa uburetwa.

³¹ Asheri ntiyashoboye kwirukana abaturage b’i Ako kimwe n’ab’i Sidoni, ab’i Ahilavi, ab’i Akizibu, ab’i Heluba, ab’i Afiki n’ab’i Rehobu.

³² Bene Asheri baturanye n’Abakanahani bari batuye igihugu, kubera ko batashoboye kubirukana.

³³ Nefutali ntiyashoboye kwirukana abaturage b’i Betishemeshi kimwe n’ab’i Betanati, nuko baturana n’Abakanahani bari batuye igihugu, ariko abaturage b’i Betishemeshi n’ab’i Betanati bakoreshwa imirimo y’uburetwa.

³⁴ Abahemori baheza Bene Dani mu karere k’imisozi miremire, ntibabakundira kumanuka ngo bagere mu kibaya.

³⁵ Abahemori bakomeza gutura i Hari‐Heresi, i Ayaloni n’i Shalivimu, ariko inzu ya Yozefu imaze gukomera, ibakoresha imirimo y’uburetwa.

³⁶ Igihugu cy’Abahemori cyaheraga ku muzamuko w’i Karabimu, kuva ahitwa ku Rutare, maze ugakomeza ukazamuka.