3 Yohana 1 - Kinyarwanda Bibiliya Ntagatifu

Indamutso

¹ Nkoramutima yanjye Gayo, ndakwandikiye, jyewe Umukuru wawe, ugukunda mu kuri:

² ndakwifuriza kumererwa neza muri byose, kandi ngo uhorane ubuzima bwiza bw’umubiri, nk’uko ufite ubw’umutima.

Impamvu imutera kwishima

³ Nkoramutima yanjye, narishimye cyane igihe abavandimwe bamwe baje hano, nkabumva barata ukuri ugaragaza mu mibereho yawe, mbese ukuntu ugendera mu kuri.

⁴ Nta cyanshimishije kuruta ibindi nko kumva ko abana banjye bagendera mu kuri.

⁵ Nkoramutima yanjye, ugaragariza ukwemera kwawe mu byo ukorera abavandimwe, ndetse n’abaturutse ahandi.

⁶ Abo ni bo babaye abahamya b’iby’urukundo rwawe mu maso ya Kiliziya. Uzaba ugize neza kandi, nubashakira ibyabafasha mu gukomeza ubutumwa bwabo ku buryo bunyura Imana.

⁷ Koko rero bahagurukijwe no gukorera Kristu, ntibagira icyo bahabwa n’abatamwemera.

⁸ Twebwe rero tugomba gufasha abantu nk’abo, kugira ngo tugaragaze ko dufatanyije kogeza Ukuri.

Imigenzereze ya Diyotirefesi na Demetiriyo

⁹ Nandikiye Kiliziya akajambo, ariko rero Diyotirefesi ukunda gutegeka byose, yanze kutwumva.

¹⁰ Ni cyo gituma igihe nzazira, nzamagana mu ruhame iyo migenzereze ye, n’amagambo ye mabi yasakaye hose adusebya. Nyamara si n’ibyo gusa, yanze no kwakira abavandimwe; n’abashatse kubakira arabibabuza, ndetse akabaca mu Kiliziya.

¹¹ Nkoramutima yanjye, ntukigane ikibi, ahubwo wigane ikiri cyiza. Ukora icyiza aba akomoka ku Mana, naho ukora ikibi ntiyabonye Imana.

¹² Ku byerekeye rero Demetiriyo, abantu bose baramushima, ndetse n’Ukuri ubwako kurabihamya. Natwe kandi turamushima, kandi uzi ko ibyo duhamya ari ukuri.

Gusezera

¹³ Mfite byinshi nagombaga kukwandikira, nyamara sinshaka gukoresha wino n’ikaramu;

¹⁴ kuko nizeye ko tuzabonana bidatinze, maze tukaganira.

¹⁵ Gira amahoro! Incuti ziragutashya. Undamukirize kandi n’incuti zacu, buri muntu ukwe.