2 Samweli 1 - Kinyarwanda Bibiliya Ntagatifu

Dawudi amenyeshwa urupfu rwa Sawuli

¹ Sawuli amaze gupfa, ni bwo Dawudi yagarutse amaze gutsinda Abamaleki, amara iminsi ibiri i Sikilage.

² Ku munsi wa gatatu, haza umuntu aturutse mu ngando kwa Sawuli, imyambaro ye yatanyaguritse, kandi umutwe we wuzuyemo umukungugu. Nuko ngo agere kwa Dawudi amwikubita imbere aramupfukamira.

³ Dawudi aramubaza ati «Uraturuka hehe?» Aramusubiza ati «Nahunze mva mu ngando y’Abayisraheli.»

⁴ Dawudi aramubaza ati «Byagenze bite? Ngaho mbwira!» Undi aramubwira ati «Imbaga bayitsinze kandi hapfuyemo abantu benshi, ndese na Sawuli n’umuhungu we Yonatani bapfuye!»

⁵ Dawudi abaza uwo musore wari uje kumubikira, ati «Wamenye ute ko Sawuli yapfuye, kimwe n’umuhungu we Yonatani?»

⁶ Nuko uwo musore aramusubiza ati «Nari ndi ku musozi wa Gilibowa, nuko mbona Sawuli yishingikirije icumu rye, kandi amagare y’intambara n’abanyamafarasi bamusatiriye impande zose.

⁷ Arakebuka maze arambona, ni ko kumpamagara, ndamusubiza nti ’Karame.’

⁸ Arambaza ati ’Uri nde?’ Nuko ndamusubiza nti ’Ndi Umumaleki.’

⁹ Nuko arambwira ati ’Guma iruhande rwanjye ndabigusabye kandi unyice, kuko merewe nabi n’ubwo ngitera akuka bwose.’

¹⁰ Ni ko kumuguma iruhande maze ndamwica, kuko nari nzi neza ko namara gutsindwa atazaba akibayeho. Nuko mfata ikamba yari afite mu mutwe n’igitare yari yambaye ku kaboko, none mbizaniye umutegetsi wanjye hano.»

¹¹ Dawudi yadukira imyambaro ye arayishishimura, n’abari kumwe na we bose babigenza batyo.

¹² Nuko barababara, bararira kandi basiba kurya kugeza ku mugoroba kubera Sawuli na Yonatani umuhungu we, no kubera umuryango w’Uhoraho wose wa Israheli, kuko bari bamazwe n’inkota.

¹³ Dawudi abaza wa musore wamubikiye, ati «Uri uwa he?» Aramusubiza ati «Ndi umwana w’Umumaleki w’impunzi.»

¹⁴ Dawudi aramubaza ati «Wabitewe n’iki rero, kugira ngo ube utatinye kurambura ikiganza cyawe, ukica uwo Uhoraho yasize amavuta y’ubwami?»

¹⁵ Nuko Dawudi ahamagara umwe mu basore be, aramubwira ati «Mwegere maze umwice!» Nuko amutsinda aho.

¹⁶ Dawudi aravuga ati «Amaraso yawe abe ari wowe ahama, kuko wowe ubwawe wabyihamije uvuga ngo ’Ni jye wishe uwo Uhoraho yasize amavuta y’ubwami.’»

Amaganya ya Dawudi kubera Sawuli na Yonatani

¹⁷ Nuko Dawudi atera iyi ndirimbo y’amaganya, kubera urupfu rwa Sawuli n’umuhungu we Yonatani.

¹⁸ (Iyo «Ndirimbo y’Umuheto» yanditswe mu «Gitabo cy’Intungane», kugira ngo bajye bayigisha Abayuda.) Aravuga ati

¹⁹ «Yewe Israheli we, mbese icyubahiro cyawe cyaguye mu mpinga y’imisozi? Ab’intwari baraguye!

²⁰ Ntimubitangaze muri Gati, ntimubyamamaze mu mayira ya Ashikeloni, hato abakobwa b’Abafilisiti batanezerwa, n’abakobwa b’abatagenywe bagasabagizwa n’ibyishimo!

²¹ Misozi y’i Gilibowa, ntimugatonyangweho n’ikime cyangwa imvura, ntimukagire ukundi imirima irumbuka, kuko ari ho ingabo y’intwari yahindaniye! Ingabo ya Sawuli ntiyigeze isigwa amavuta,

²² uretse amaraso y’abishwe n’ibinure by’intwari; umuheto wa Yonatani ntiwasubiraga, n’inkota ya Sawuli ntitahe ubusa.

²³ Sawuli na Yonatani abakundwaga cyane, abatatandukanaga mu buzima no mu rupfu, abatebukaga kurusha kagoma; abanyembaraga kurusha intare!

²⁴ Bakobwa ba Israheli, nimuririre Sawuli, wabambikaga imihemba n’imirimbo y’amoko yose, wabahaga kandi imitako ya zahabu mugeretse ku myambaro yanyu.

²⁵ Intwari zaguye ku rugamba, Yonatani yiciwe mu mpinga y’imisozi!

²⁶ Mbega umubabaro ngufitiye, Yonatani muvandimwe! Nagukundaga byahebuje! Ubucuti bwawe bwambereye akataraboneka, bwasumbyaga ubwiza urukundo rw’abagore.

²⁷ Intwari zaraguye! Ingenzi ku rugamba zarashize!»