2 Ngoma 4 - Kinyarwanda Bibiliya Ntagatifu

¹ Salomoni yubakisha urutambiro rw’umuringa rufite uburebure bw’imikono makumyabiri, ubugari bw’imikono makumyabiri n’ubuhagarike bw’imikono cumi.

² Abumba ikizenga cy’amazi mu miringa iyagijwe; ubugari bwacyo kuva ku rugara rumwe kugeza ku rundi bwari ubw’imikono cumi, kandi cyari gikoze nk’uruziga. Cyari gifite ubuhagarike bw’imikono itanu kandi umuzenguruko wacyo wapimwa n’umugozi w’imikono mirongo itatu.

³ Mu nsi y’urugara rw’icyo kizenga hari hazengurutswe n’ibishushanyo by’impfizi bikurikiranye ku mikono mirongo itatu; byari bikikije rwose ikizenga. Ibyo bishushanyo byari ku mirongo ibiri igerekeranye kandi byari byakoranywe n’icyo kizenga.

⁴ Cyari giteretse ku mashusho y’ibimasa cumi n’abiri: bitatu byarebaga mu majyaruguru, bitatu mu burengerazuba, bitatu mu majyepfo, na bitatu mu burasirazuba. Ikizenga cyari giteretswe hejuru y’ibimasa kandi byari biteranye imigongo.

⁵ Umubyimba wacyo wanganaga n’intambwe imwe y’intoki, kandi urugara rwacyo rwari rubumbwe nk’urugara rw’ururabyo rwa lisi. Icyo kizenga cyashoboraga gusukwamo intango ibihumbi bitatu.

⁶ Salomoni acurisha imivure cumi; itanu ayishyira ibumoso, indi itanu ayishyira iburyo, kugira ngo bajye bayogerezamo: bogerezagamo ibikoresho bigenewe ibitambo bitwikwa, naho abaherezabitambo biyuhagiriraga mu kizenga cy’amazi cy’imiringa.

⁷ Abumba muri zahabu ibitereko cumi by’amatara nk’uko yari yabitegetswe, maze abishyira mu cyumba gitagatifu, bitanu iburyo, bindi bitanu ibumoso.

⁸ Abaza ameza cumi ayashyira mu cyumba gitagatifu, atanu iburyo, yandi atanu ibumoso. Abumba n’ibikombe ijana muri zahabu.

⁹ Yubaka urugo rw’abaherezabitambo, n’ikibuga kinini kandi inzugi zaho azisigaho umuringa.

¹⁰ Naho ikizenga cy’amazi agitereka mu ruhande rw’iburyo, ahagana mu majyepfo y’iburasirazuba.

¹¹ Huramu acura amabesani, ibitiyo n’inzuho. Arangiza atyo imirimo yose yagombaga gukorera umwami Salomoni mu Ngoro y’Imana;

¹² ari yo iyi: inkingi ebyiri, imitako y’imitwe ibiri yari hejuru y’inkingi, ibisa n’inshundura bibiri byo gutwikira iyo mitwe yari hejuru y’inkingi,

¹³ imbuto zitukura magana ane zo ku bisa n’inshundura, imirongo ibiri y’imbuto zitukura zo ku bisa n’inshundura bitwikiriye imitwe yari hejuru y’inkingi,

¹⁴ ibitereko cumi, imivure cumi yari ku bitereko,

¹⁵ ikizenga cy’amazi — cyari kimwe gusa — giteretse ku bimasa cumi na bibiri,

¹⁶ amabesani, ibitiyo, inzuho hamwe n’ibindi byose bigendana na byo. Ibyo byose Huramabi yabikoze mu muringa usennye, abikorera umwami Salomoni ngo bishyirwe mu Ngoro y’Uhoraho.

¹⁷ Umwami yabikoreshereje mu karere ka Yorudani hagati ya Sukoti na Sereda.

¹⁸ Salomoni yabikoresheje ari byinshi cyane, ku buryo batashoboraga kumenya uburemere bw’imiringa yabigiyeho.

¹⁹ Salomoni akoresha n’ibintu byose bigenewe Ingoro y’Imana, ari byo: urutambiro rwa zahabu, ameza ya zahabu yari agenewe gushyirwaho imigati y’umumuriko,

²⁰ ibitereko n’amatara yabyo yo gucana imbere y’icyumba gitagatifu nk’uko byari bitegetswe, bikozwe muri zahabu iyunguruye;

²¹ uburabyo, amatara, udufatisho, bikozwe muri zahabu iyunguruye;

²² ibyuma, inzuho, indosho, ibyotesho, bikozwe muri zahabu iyunguruye; irembo ry’Ingoro, inzugi z’imbere zireba icyumba gitagatifu rwose n’inzugi z’Ingoro zireba icyumba kinini, na byo bikozwe muri zahabu.