1 Timoteyo 2 - Kinyarwanda Bibiliya Ntagatifu

Gusabira abantu bose

¹ Ndasaba rero nkomeje ko mbere ya byose mwakwambaza Imana, mukavuga amasengesho, mugatakamba kandi mugashimira Imana, mubigirira abantu bose.

² Dukwiye gusabira abami n’abandi bategetsi bose, kugira ngo tubone kubaho mu ituze n’amahoro, turangwa n’ubusabane ku Mana kandi dutunganiwe.

³ Ngicyo ikintu gikwiye kandi kinogeye Imana Umukiza wacu,

⁴ Yo ishaka ko abantu bose bakira kandi bakamenya ukuri.

⁵ Koko rero, Imana ni imwe rukumbi, n’umuhuza w’abantu n’Imana akaba umwe: ni Kristu Yezu, umuntu nyirizina,

⁶ witanze ngo abe incungu ya bose. Ngicyo icyemezo cy’ugukizwa kwacu cyatanzwe igihe cyabigenewe kigeze,

⁷ kandi nanjye ubwanjye nkaba naratorewe kuba intumwa yo kubyamamaza no kubyogeza. Ndavuga ukuri simbeshya, ndi umwarimu w’amahanga mu byerekeye ukwemera n’ukuri.

Imyifatire ibereye abagabo n’abagore mu makoraniro

⁸ None rero ndashaka ko abagabo bajya basenga, aho bari hose, bakerekeza ku ijuru ibiganza bizira inenge, nta mwaga cyangwa intonganya.

⁹ Abagore na bo bagomba kugira imyifatire ikwiriye bakarimbana ubwiyoroshye, nta kurata ubukire, nta kuboha imisatsi, nta mitako ya zahabu, nta masaro cyangwa imyambaro y’igiciro,

¹⁰ ahubwo bakihunda ibikorwa byiza, bya bindi bibereye abagore biyemeje kuyoboka Imana.

¹¹ Igihe hari inyigisho itangwa, umugore agomba guceceka, agacisha make rwose.

¹² Sinemereye umugore kwigisha cyangwa guha itegeko umugabo: najye ahama hamwe, aceceke.

¹³ Koko rero, Adamu ni we waremwe bwa mbere, hanyuma hakurikiraho Eva.

¹⁴ Kandi Adamu si we wemeye gushukwa, ahubwo umugore ni we wemeye gushukwa, maze aracumura.

¹⁵ Nyamara ariko azakizwa no kuba umubyeyi, apfa gusa guhorana ubwiyoroshye kandi akaba indacogora mu kwemera, mu rukundo no mu butungane.