1 Ngoma 9 - Kinyarwanda Bibiliya Ntagatifu

Abaturage b’i Yeruzalemu

¹ Abayisraheli bose barabaruwe kandi bandikwa mu gitabo cy’abami ba Israheli. Abayuda bajyanywe bunyago i Babiloni kubera gucumura kwabo.

² Bamaze kwemererwa gutaha mu migi yabo no gusubira mu masambu yabo, mu Bayisraheli, abatashye mbere ni abaherezabitambo, abalevi n’abahereza bo mu Ngoro.

³ I Yeruzalemu hari hatuye bamwe mu Bayuda, mu Babenyamini, mu Befurayimu no mu Bamanase.

⁴ Mu Bayuda ni Utayi mwene Amihudi, mwene Omari, mwene Imiri, mwene Bani umwe mu bahungu ba Peresi w’Umuyuda.

⁵ Mu Bashelani ni Asaya w’imfura n’abana be.

⁶ Muri bene Zera ni Yehuweli. Hamwe n’abavandimwe babo, ni magana atandatu na mirongo urwenda.

⁷ Mu Babenyamini ni Salu, mwene Meshulamu, mwene Hodaviya, mwene Hasenuwa;

⁸ Yibuneya mwene Yerohamu; Ela mwene Uzi, mwene Mikiri; Meshulamu mwene Shefatya, mwene Rehuweli, mwene Yibuniya.

⁹ Hamwe n’abavandimwe babo uko ibisekuru byari biri ni magana urwenda na mirongo itanu na batandatu. Abo bantu bose bari abakuru b’amazu mu miryango yabo.

¹⁰ Mu baherezabitambo ni Yedaya, Yehoyaribu, Yakini,

¹¹ Azariya mwene Hilikiya, mwene Meshulamu, mwene Sadoki, mwene Merayoti, mwene Ahitubu umutware w’Ingoro y’Imana;

¹² Adaya mwene Yerohamu, mwene Pashehuru, mwene Malikiya; na Masayi mwene Adiyeli, mwene Yahuzera, mwene Meshulamu, mwene Meshilemiti, mwene Imeri,

¹³ hamwe n’abavandimwe babo, abakuru b’amazu, ni igihumbi na magana arindwi na mirongo itandatu, abagabo b’intwari bakora umurimo wo mu Ngoro y’Imana.

¹⁴ Mu balevi, ni Shemaya mwene Hashubu, mwene Azirikamu, mwene Hashabiya wo muri bene Merari;

¹⁵ hari kandi Bakubakari, Hereshi, Galali na Matanya mwene Mika, mwene Zikiri, mwene Asafu;

¹⁶ Obadiya mwene Shemaya, mwene Galali, mwene Yedutuni; na Berekiya mwene Asa, mwene Elikana wari utuye mu nsisiro z’Abanetofati.

¹⁷ Abanyanzugi ni Shalumi, Akubu, Talimoni na Ahimani. Shalumi yari umutware wabo,

¹⁸ kandi kugeza uyu munsi ni we ucyemererwa gufata igihe ku rugi rw’umwami iburasirazuba. Ni bo bari abanyanzugi mu ngando za bene Levi.

¹⁹ Shalumi mwene Kore, mwene Ebiyasafu, mwene Kore n’abavandimwe be bo mu nzu y’Abakore, bari bashinzwe umurimo wo kurinda umuryango w’Ihema, mbese nk’uko ba sekuruza babo barindaga irembo ry’ingando y’Uhoraho.

²⁰ Kera bategekwaga na Pinehasi mwene Eleyazari; Uhoraho nabane na we!

²¹ Zekariya mwene Meshelemiya yari umunyarugi w’irembo ry’Ihema ry’ibonaniro.

²² Abari baratorewe kuba abanyanzugi bari bageze kuri magana abiri, nk’uko bari barabaruriwe mu nsisiro zabo. Ni Dawudi na Samweli Umushishozi babashyize kuri uwo murimo, kuko bari bazwiho kuba inyangamugayo.

²³ Bo n’abahungu babo bari bashinzwe kurinda inzugi z’Inzu y’Uhoraho, ari zo z’Ihema ry’ibonaniro.

²⁴ Abanyanzugi babaga ku nguni enye zayo, iburasirazuba, iburengerazuba, mu majyaruguru no mu majyepfo.

²⁵ Rimwe na rimwe abavandimwe babo bari mu nsisiro zabo bagombaga kuhabasanga bakamarana iminsi irindwi,

²⁶ ariko abanyanzugi bane b’abatware bo barahahoraga. Abalevi bamwe bari bashinzwe ibyumba n’umutungo by’Inzu y’Imana.

²⁷ Bararaga bakikije Inzu y’Imana kuko bagombaga kuyirinda, kandi bakayikingura buri gitondo.

²⁸ Abandi bari bashinzwe ibintu bikoreshwa mu mihango yo gusenga, bakajya babibara buri gihe babyinjije cyangwa babisohoye.

²⁹ Abandi bari bashinzwe inzabya, cyane cyane inzabya ntagatifu zabikwagamo ifu igogoye, divayi, amavuta, imibavu n’ibindi bihumura.

³⁰ Ariko abahungu b’abaherezabitambo ni bo bavangaga ibihumura.

³¹ Matitiya wo mu balevi, wari imfura ya Shalumi mwene Kore, yari ashinzwe gutekesha imigati.

³² Mu bavandimwe babo b’Abakehati, bamwe bari bashinzwe gutegura imigati y’umumuriko ya buri Sabato.

³³ Abaririmbyi, abatware b’amazu y’abalevi, bacumbikirwaga mu byumba kandi ntibagire undi murimo bakora, kuko umurimo wabo bawutunganyaga umunsi n’ijoro.

³⁴ Abo ni bo batware b’amazu y’abalevi, hakurikijwe ibisekuruza byabo. Bari batuye i Yeruzalemu.

Inkomoko ya Sawuli

³⁵ I Gibewoni hari hatuye uwitwa Yeweli, ari na we washinze Gibewoni, umugore we akitwa Mahaka.

³⁶ Yari ahaturanye na Abudoni imfura ye, na Suri, Kishi, Behali, Neri, Nadabu,

³⁷ Gedori, Ahiyo, Zekariya na Mikuloti.

³⁸ Mikuloti abyara Shimeyamu. Na bo, kimwe n’abavandimwe babo, bari batuye i Yeruzalemu.

³⁹ Neri abyara Kishi, Kishi abyara Sawuli, Sawuli abyara Yonatani, Malekishuwa, Abinadabu na Eshibehali.

⁴⁰ Mwene Yonatani ni Meribehali. Meribehali abyara Mika.

⁴¹ Bene Mika ni Pitoni, Meleki, Tahureya.

⁴² Ahazi abyara Yara, Yara abyara Alemeti, Azimaveti na Zimiri, Zimiri abyara Mosa,

⁴³ Mosa abyara Bineya, wabyaye Refaya, wabyaye Eleyasa, wabyaye Aseli.

⁴⁴ Aseli abyara abana batandatu, amazina yabo ni aya: Azurikamu, Bokuru, Ismaheli, Sheyariya, Obadiya na Hanani. Abo ni bene Aseli.