1 Ngoma 26 - Kinyarwanda Bibiliya Ntagatifu

Imitwe y’abanyanzugi

¹ Dore imitwe y’abanyanzugi: Muri bene Kore ni Meshelemiyahu mwene Kore wa Ebiyasafu.

² Meshelemiyahu yabyaye abahungu, ari bo Zekariyahu w’imfura, Yediyayeli uwa kabiri, Zebadiyahu uwa gatatu, Yatinyeli uwa kane,

³ Elamu uwa gatanu, Yehohanani uwa gatandatu, na Elihonayi uwa karindwi.

⁴ Obededomu yabyaye abahungu, ari bo Shemaya w’imfura, Yehozabadi uwa kabiri, Yowa uwa gatatu, Sakari uwa kane, Netaneli uwa gatanu,

⁵ Amiyeli uwa gatandatu, Isakari uwa karindwi, Pewuletayi uwa munani, kuko Imana yari yaramuhaye umugisha.

⁶ Umuhungu we Shemaya yabyaye abahungu babaye abatware b’inzu yabo kuko bari abagabo b’intwari.

⁷ Bene Shemaya ni Otini, Refayeli, Obedi, Elizabadi n’abavandimwe babo, Elihu na Semakiyahu, bari abagabo b’intwari.

⁸ Abo bose bari bene Obededomu; hamwe n’abahungu babo n’abavandimwe babo bari abagabo b’intwari kubera umwete bagaragazaga ku murimo wabo. Bene Obededomu bose ni mirongo itandatu na babiri.

⁹ Meshelemiyahu yari afite abahungu n’abavandimwe; bari abagabo b’intwari cumi n’umunani.

¹⁰ Hosa wo muri bene Merari yari afite abahungu: ni Shimuri — ntiyari imfura, ariko se yamugize umutware kubera ubutwari bwe —,

¹¹ Hilikiyahu ni uwa kabiri, Zebadiyahu uwa gatatu, Zekariyahu uwa kane. Abahungu n’abavandimwe ba Hosa bose bari cumi na batatu.

¹² Abagize iyo mitwe y’abanyanzugi hamwe n’abatware babo, bagombaga kwifatanya n’abavandimwe babo kugira ngo batunganye imirimo yo mu Ngoro y’Uhoraho.

¹³ Kuva ku muto kugera ku mukuru bakoresheje ubufindo bakurikije amazu yabo kugira ngo bamenye abazarinda buri rugi.

¹⁴ Iburasirazuba, ubufindo bugwa kuri Shelemiyahu. Umuhungu we Zekariyahu wari umujyanama w’umuhanga, ubufindo bumwegurira urugi mu majyaruguru.

¹⁵ Obededomu ahabwa urw’amajyepfo, naho abahungu be bahabwa kurinda amazu y’ ububiko.

¹⁶ Shupimu na Hosa bahabwa kurinda iburengerazuba hamwe n’urugi rwa Shaleketi ku muhanda uzamuka. Dore uko baharindaga:

¹⁷ iburasirazuba habaga abalevi batandatu ku munsi, mu majyaruguru hakaba bane, mu majyepfo bane, no mu mazu y’ububiko babiri babiri.

¹⁸ Ahitwa i Parubari iburengerazuba hari abalevi bane ku muhanda, hakaba n’abandi babiri imbere ya Parubari.

¹⁹ Iyo ni yo yari imitwe y’abanyanzugi batoranyijwe muri bene Kore no muri bene Merari.

Indi mirimo yahawe abalevi bamwe

²⁰ Abalevi bamwe, abavandimwe babo, bari bashinzwe umutungo w’Ingoro y’Imana, n’umutungo w’amaturo matagatifu.

²¹ Bene Ledani, umuhungu wa Gerishoni, bari bafite Abayehiyeli ho abatware b’amazu ya Ledani wa Gerishoni.

²² Abahungu ba Yehiyeli, Zetamu na Yoweli umuvandimwe we, bari bashinzwe umutungo w’Ingoro y’Uhoraho.

²³ Mu mazu ya Amuramu, Yishari, Heburoni na Uziyeli,

²⁴ bahisemo Shebuweli wakomokaga kuri Gerishomu, mwene Musa, ngo abe umutware w’ububiko.

²⁵ Uretse Shebuweli, se Eliyezeri yabyaye na Rehabiyahu, wabyaye Yeshayahu, wabyaye Yoramu, wabyaye Zikuri, wabyaye Shelomiti.

²⁶ Uwo Shelomiti hamwe n’abavandimwe be, yari ashinzwe umutungo wose w’amaturo matagatifu, umwami Dawudi, abatware b’amazu, abatware b’abantu ibihumbi n’ab’amagana, n’abagaba b’ingabo, bari beguriye Imana.

²⁷ Koko bayeguriraga ibyo bavanye mu munyago wo mu ntambara, bagira ngo babitakishe Ingoro y’Uhoraho.

²⁸ N’ibyo Samweli umushishozi, na Sawuli mwene Kishi, na Abuneri mwene Neri, na Yowabu mwene Seruya, bari bareguriye Uhoraho byose byari bishinzwe Shelomiti n’abavandimwe be.

²⁹ Muri bene Yisehari, Kenaniyahu n’abahungu be bari bashinzwe iby’umubano mu Bayisraheli, bakabagira abanditsi n’abacamanza.

³⁰ Muri bene Heburoni, Hashabiyahu n’abavandimwe be, abagabo b’intwari igihumbi na magana arindwi, bari bashinzwe kugenzura Abayisraheli bo hakuno ya Yorudani, iburengerazuba, mu bibazo byose byerekeye Uhoraho n’umwami.

³¹ Muri bene Heburoni, Yeriya ni we wari umutware. Mu mwaka wa mirongo ine w’ingoma ya Dawudi bashakishije hose abakomoka kuri Heburoni, basanga i Yezeri y’i Gilihadi hari abagabo b’intwari bavuka muri iyo nzu.

³² Abavandimwe ba Yeriya bari abagabo b’intwari ibihumbi bibiri na magana arindwi, bakaba n’abatware b’amazu; nuko umwami Dawudi abashyiraho ngo bagenzure Abarubeni, Abagadi n’igice cya kabiri cy’umuryango wa Manase, mu bibazo byose byerekeye Imana n’umwami.