1 Ngoma 20 - Kinyarwanda Bibiliya Ntagatifu

Dawudi yigarurira umugi wa Raba

¹ Nuko ngo umwaka utahe, igihe abami batabaye, Yowabu azana ingabo ze atera igihugu cy’Abahamoni. Hanyuma agota Raba, naho Dawudi akaba yasigaye i Yeruzalemu. Yowabu atsinda Raba arayisenya.

² Nuko Dawudi yambura Milikomu ikamba ry’ubwami, asanga rifite uburemere bw’italenta imwe ya zahabu, kandi ririmo n’ibuye ry’agaciro. Nuko Dawudi atamiriza iryo kamba, kandi muri uwo mugi ahavana iminyago myinshi cyane.

³ Naho abaturage b’aho, arabajyana kugira ngo bajye bakoresha inkero, amapiki n’intorezo. Uko ni ko Dawudi yagenjereje imigi yose y’Abahamoni. Hanyuma Dawudi n’ingabo ze zose basubira i Yeruzalemu.

Dawudi arwana n’Abafilisiti

⁴ Nyuma y’ibyo, i Gezeri habaye intambara irwanya Abafilisiti. Ni bwo Sibekayi w’i Husha yanesheje Sipayi, umwe mu bana b’Abarefayimu, maze Abafilisiti barabagaragira.

⁵ Hongera kuba intambara irwanya Abafilisiti. Ni bwo Elihanani mwene Yayiri yishe Lahumi umuvandimwe wa Goliyati w’i Gati; uruti rw’icumu rye rukaba rwanganaga n’igiti baboheraho imyenda.

⁶ Hongera kuba intambara i Gati. Hari umugabo w’igihangange wari ufite intoki esheshatu ku biganza, n’amano atandatu ku birenge, byose hamwe bikaba makumyabiri na bine. Na we yakomokaga ku Barefayimu.

⁷ Nuko agasuzugura Abayisraheli, ariko Yonatani mwene Shimeyi umuvandimwe wa Dawudi aramwica.

⁸ Abo bantu bakomokaga kuri Rafa w’i Gati, bishwe na Dawudi n’abagaragu be.