1 Abatesalonike 5 - Kinyarwanda Bibiliya Ntagatifu

Mube maso mutegereje amaza ya Nyagasani

¹ Naho ku byerekeye igihe n’amagingo ibyo bizabera, bavandimwe, ntimukeneye ko tubibandikira.

² Ubwanyu muzi neza ko Umunsi wa Nyagasani uza nk’umujura wa nijoro.

³ Igihe rero bazaba bavuga ngo ’Mbega amahoro n’umutekano!» ni bwo icyorezo kizabatungura, nk’uko ibise bitungura umugore utwite, kandi nta mahungiro.

⁴ Ariko mwebwe, bavandimwe, ntimukiri mu mwijima ku buryo uwo munsi wabatungura nk’umujura;

⁵ mwese muri abana b’urumuri n’ab’amanywa; ntituri ab’ijoro n’ab’umwijima.

⁶ None rero, ntitugasinzire nk’abandi, ahubwo tube maso kandi twirinde gutwarwa n’irari.

⁷ Abashaka gusinzira, nijoro ni ho basinzira; n’abasinda, nijoro ni ho basinda;

⁸ naho twebwe, ubwo turi ab’amanywa, tujye twiramira, kandi twambare intwaro z’Imana, ukwemera n’urukundo bibe ikoti ry’intamenwa, amizero y’uko tuzakizwa abe nk’ingofero y’icyuma.

⁹ Erega Imana ntiyatugeneye kurimburwa n’uburakari bwayo, ahubwo yatugeneye kuronka umukiro dukesha Umwami Yezu Kristu

¹⁰ wadupfiriye kugira ngo, twaba bazima cyangwa twaba twarapfuye, duhore twunze ubumwe na we.

¹¹ Kubera iyo mpamvu, nimujye muhumurizanya kandi muterane inkunga nk’uko musanzwe mubigenza.

Andi mabwiriza

¹² Turabasaba kandi, bavandimwe, ngo mumenye abanyu babaruhira, bakaba bashinzwe kubayobora muri Nyagasani no kubagira inama;

¹³ mujye mububahana urukundo rwinshi, kubera ibyo babakorera. Namwe ubwanyu mubane mu mahoro.

¹⁴ Turabinginga, bavandimwe, ngo muhane inkorabusa, mukomeze umutima abacika intege, mushyigikire abatishoboye, bose mubihanganire.

¹⁵ Mumenye ntihakagire uwitura undi inabi, ahubwo muharanire iteka kugirirana ineza, ndetse muyigirire bose.

¹⁶ Mujye muhora mwishimye,

¹⁷ musenge ubudahwema,

¹⁸ mushimire Imana muri byose, kuko ari byo ibashakaho muri Yezu Kristu.

¹⁹ Muramenye ntimuzimye Roho w’Imana,

²⁰ ntimugahinyure ibyahanuwe;

²¹ ahubwo mujye mugenzura byose, ibyiza mubigumane,

²² naho ikibi cyose mucyirinde.

Gusezera

²³ Imana y’amahoro ubwayo nibatagatifuze binonosoye, kugira ngo izasange muri indahemuka mwese nta makemwa mufite ku mutima no ku mubiri, ku munsi Umwami wacu Yezu Kristu azaziraho.

²⁴ Ubahamagara ni indahemuka; azakora n’ibyo ngibyo.

²⁵ Bavandimwe, natwe mudusabire.

²⁶ Muramukanye n’abavandimwe bose mu muhoberano mutagatifu.

²⁷ Mbasabye nkomeje ku bwa Nyagasani, gusomera abavandimwe bose iyi baruwa.

²⁸ Muhorane iteka ineza y’Umwami wacu Yezu Kristu.