1 Abakorinto 9 - Kinyarwanda Bibiliya Ntagatifu

Pawulo ahara ibyo afitiye uburenganzira

¹ Mbese jye simfite ubwigenge? Mbese sindi intumwa? Mbese jye sinabonye Yezu Umwami wacu? Mbese si mwe musaruro wanjye muri Nyagasani?

² Niba ku bandi ntari intumwa, nibura ndi yo kuri mwebwe, kuko ukuri k’ubutumwa Nyagasani yanshinze kubagaragariramo.

³ Dore icyo nsubiza abaninura.

⁴ Mbese twebwe ntitwagira uburenganzira bwo guhabwa ibyo kurya no kunywa?

⁵ Mbese twe ntitwashobora kugendana n’umugore duhuje ukwemera, nk’uko izindi ntumwa, n’abavandimwe ba Nyagasani, na Kefasi babigenza?

⁶ Cyangwa se tuzabe ari twe twenyine, jyewe na Barinaba, duhatirwa gukorera ibidutunga?

⁷ Ni iyihe ngabo yagiye ku rugamba, kandi igomba no kwigemurira? Ni nde wahinga umuzabibu, ntawuryeho imbuto? Cyangwa se ni nde wakorora ubushyo, maze ntanywe amata yabwo?

⁸ Ibyo se byaba bishingiye gusa ku matwara y’abantu, cyangwa ahubwo bishyigikiwe n’Amategeko y’Imana?

⁹ Koko mu Mategeko ya Musa haranditswe ngo «Ntuzahambire umunwa w’ikimasa kivungagura ingano.» Ubwo se Imana yaba koko ishishikajwe n’ibimasa?

¹⁰ Ahubwo si twebwe ibivugira? Ni koko, ibyo ni twebwe byandikiwe; kuko uhinga wese ahingana icyizere, n’uhura ingano akagira icyizere cyo guhabwa umugabane we.

¹¹ Ubwo twababibyemo imbuto z’Imana, murasanga bikabije ko dusarura ku byo mutunze?

¹² Niba abandi babafiteho ubwo burenganzira, twe twabuzwa n’iki kububagiriraho? Nyamara nta bwo twigeze tubwitwaza! Twihanganiye byose, ngo hato tudatera imbogamizi Inkuru Nziza ya Kristu.

¹³ Ariko se ntimuzi ko abakorera Ingoro y’Imana batungwa n’iyo Ngoro nyine, n’abahereza ku rutambiro, bagahabwa umugabane ku byo batuye?

¹⁴ Bityo rero, n’abogeza Inkuru Nziza, Nyagasani yabageneye gutungwa na yo.

¹⁵ Icyakora nta cyo nigeze nitwaza muri ibyo byose; kandi simbibandikiye ngo mukurizeho kugira icyo mumpa; ahubwo nahitamo gupfa, aho gucuzwa iryo shema n’ubonetse wese.

¹⁶ Kuba naramamaje Inkuru Nziza, si byo byatuma nirata, kuko ari umurimo ngombwa nashinzwe; ndiyimbire rero niba ntamamaje Inkuru Nziza!

¹⁷ Yabaye rero nabikoraga ku bwende bwanjye, nari nkwiye kubihemberwa; ariko ubwo mbitegetswe, ni umuzigo nahawe.

¹⁸ Ubwo se ishimwe ryanjye rishingiye he? Rishingiye mu kwamamaza Inkuru Nziza ku buntu, ntarambirije ku burenganzira mpabwa na yo.

¹⁹ N’ubwo nigenga kuri bose, nahisemo kwigira umugaragu wa bose, kugira ngo nigarurire benshi muri bo.

²⁰ Nigize Umuyahudi mu Bayahudi, kugira ngo nshobore gushyikira Abayahudi; kandi jyewe utakigengwa n’amategeko nemeye kumvira Amategeko nk’abayagenewe, ari ukugira ngo nigarurire abagengwa n’amategeko.

²¹ Kandi jyewe utabuze itegeko ry’Imana ringenga, kuko Kristu ari we ungenga, nigize nk’utagira amategeko, rwagati mu batagira amategeko, ari ukugira ngo mbigarurire na bo.

²² Nigize umunyantege nke mu banyantege nke, ngo niyegereze abanyantege nke. Nihwanyije na bose muri byose, kugira ngo ngire abo mbarokoramo.

²³ Ibyo kandi mbikorera Inkuru Nziza kugira ngo nzayigireho uruhare.

Urugero rw’abakinira kurushanwa

²⁴ Ntimuzi se ko abasiganwa ku kibuga cy’imikino biruka bose ariko igihembo kikegukana umwe? Ngaho rero nimwiruke namwe kugira ngo mwese mugitsindire.

²⁵ Urushanwa wese yigomwa byinshi, kandi aba aharanira ikamba rizayoka; naho twebwe iryo duharanira, ntirizashira.

²⁶ Nguko rero uko jye niruka, sinkora hirya no hino; nguko kandi uko ndwana, sinigera mpusha.

²⁷ Ahubwo umubiri wanjye ndawuhana nkawukandamiza kugira ngo ntazavaho mpigikwa, maze kwamamaza Inkuru Nziza mu bandi.