1 Abakorinto 15 - Kinyarwanda Bibiliya Ntagatifu

Izuka rya Kristu

¹ Bavandimwe, ndabibutsa Inkuru Nziza nabagejejeho, ari yo mwakiriye kandi mukaba muyihambiriyeho,

² ikaba ari na yo izabakiza niba muyikomeyeho nk’uko nayibigishije; naho ubundi ukwemera kwanyu kwaba ari impfabusa.

³ Koko rero icya mbere cyo nabagejejeho, ni icyo nanjye nashyikirijwe: ko Kristu yapfuye azize ibyaha byacu, nk’uko byari byaranditswe.

⁴ Ko yahambwe, ko yazutse ku munsi wa gatatu, nk’uko byari byaranditswe.

⁵ Ko yabonekeye Kefasi, hanyuma akabonwa na ba Cumi na babiri.

⁶ Hanyuma yongeye kubonwa n’abavandimwe magana atanu icya rimwe; abenshi muri bo baracyariho, abandi barapfuye.

⁷ Hanyuma yabonekeye Yakobo, nyuma abonekera intumwa zose icyarimwe.

⁸ Ubw’imperuka, nanjye arambonekera, jye umeze nk’uwavutse imburagihe.

⁹ Koko jyewe ndi uwa nyuma mu ntumwa zose; sinkwiriye no kwitwa intumwa, kuko natoteje Kiliziya y’Imana.

¹⁰ Ariko uko ndi kose, mbikesha ingabire y’Imana, kandi iyo ngabire ntiyambayemo impfabusa. Ahubwo ndetse nakoreye kubarusha bose; nyamara si ku bwanjye, ni ku bw’ingabire y’Imana indimo.

¹¹ Uko biri kose, yaba jye, cyangwa bo, ngibyo ibyo twamamaza, kandi ari na byo mwemeye.

Izuka ry’abapfuye

¹² Ubwo hamamazwa ko Kristu yazutse mu bapfuye, bishoboka bite ko bamwe muri mwe bavuga ko abapfuye batazazuka?

¹³ Niba abapfuye batazazuka, Kristu na we ubwo ntiyazutse.

¹⁴ Niba kandi Kristu atarazutse, ibyo twigisha nta shingiro, n’ukwemera kwanyu gufashe ku busa.

¹⁵ Bikaba ndetse twaba abahamyabinyoma b’Imana, kuko twemeje ko yazuye Kristu, kandi itaramuzuye, niba ari byo ko abapfuye batazuka.

¹⁶ Koko niba abapfuye batazuka, na Kristu ubwo ntiyazutse.

¹⁷ Kandi niba Kristu atarazutse, ukwemera kwanyu ni amanjwe, mukaba mukiri mu byaha byanyu.

¹⁸ Bityo rero, n’abapfuye bizeye Kristu barayoyotse.

¹⁹ Niba kwizera Kristu kwacu guhagarariye kuri ubu bugingo gusa, twaba dukwiye kubabarirwa bitambukije abandi bose.

²⁰ Oya kandi, Kristu yazutse koko mu bapfuye, aba umuzukambere mu bapfuye bose.

²¹ Nk’uko kandi urupfu rwakuruwe n’umuntu umwe, ni na ko izuka ry’abapfuye ryazanywe n’umuntu umwe.

²² Kimwe n’uko bose boramye bitewe na Adamu, ni na ko bose bazasubizwa ubugingo biturutse kuri Kristu;

²³ nyamara buri wese mu rwego rwe: uw’ibanze ni Kristu, nyuma hateho abamuyobotse, igihe azazira.

²⁴ Nuko byose bizarangire, igihe azegurira Ubwami Imana se, amaze gusenyagura icyitwa ubuhangange, ubutegetsi n’ububasha cyose.

²⁵ Kuko agomba kwima ingoma kugeza ko azashyira abanzi be bose mu nsi y’ibirenge bye.

²⁶ Umwanzi w’imperuka uzarimburwa, ni urupfu,

²⁷ kuko byanditswe ngo «byose yabishyize mu nsi y’ibirenge bye.» Igihe rero Kristu azavuga ati «Byose biranyeguriwe», birumvikana ko hatabariwemo Uwabimweguriye byose.

²⁸ Nuko rero igihe byose bizaba bimaze kumuyoboka, ubwo Mwana na we aziyegurire Se wamweguriye byose, kugira ngo Imana ibe byose muri bose.

²⁹ Bitabaye ibyo, ababatirizwa abapfuye baba bashaka kugera ku ki? Niba koko abapfuye batazuka, ni iki gituma bababatirizwa?

³⁰ Natwe ubwacu kuki twahora twishyira mu makuba?

³¹ Buri munsi ruhora rungera amajanja! Simbeshya, bavandimwe, mwe kuzo ryanjye muri Kristu Yezu Umwami wacu.

³² Biba byaramariye iki kurwanya inyamaswa zo muri Efezi, iyo nza kuba niringiye ubu bugingo gusa? Niba abapfuye batazuka nimwemere koko «twirire kandi twinywere, kuko ejo tuzapfa!»

³³ Ntimukishuke: kubana n’ababi byonona imigenzo myiza.

³⁴ Nimwice ku businzi burundu, mwirinde gucumura. Kuko muri mwe harimo abatazi Imana na busa, ibyo mbivugiye kubakoza isoni.

Abapfuye bazazuka bate?

³⁵ Ubwo ntihabuze uwibaza ati «Abapfuye bazazuka bate? Bazahingukana umubiri uteye ute?»

³⁶ Mbega injiji! Ese icyo ubibye ntikibanza gushanguka ngo kibyare ubuzima!

³⁷ Kandi icyo ubibye gitandukanye n’urubuto ruzaza; ni akabuto gasa k’ingano cyangwa k’ikindi kindi.

³⁸ Nyuma Imana ikakihera imisusire uko ishaka, buri rubuto ku buryo bwihariye.

³⁹ Nta kinyabuzima gihuje kamere n’ikindi: abantu batandukanye n’inyamaswa, n’inyoni, n’amafi.

⁴⁰ Hari ibyagenewe kuba mu kirere, n’ibyagenewe kuba ku isi; ariko byose ntibinganya umucyo.

⁴¹ Ububengerane bw’izuba butandukanye n’ubw’ukwezi, n’ubw’inyenyeri; ndetse nta n’inyenyeri ishashagira nk’indi.

⁴² Ni na ko bimeze mu kuzuka kw’abapfuye: umubiri ujyira mu gitaka gushanguka, ukazukira mu budashanguka;

⁴³ ushyirwa mu gitaka ari nta kamaro, ukazukana ikuzo; ushyirwa mu gitaka ari nta ntege, ukazukana ibakwe;

⁴⁴ hahambwa umubiri usanzwe wa muntu, hakazuka umubiri wahinduwe na Roho. Ubwo koko habaho imibiri ya kamere gusa, hashobora no kubaho n’imibiri yahinduwe na Roho.

⁴⁵ Ni na ko byanditswe ngo: Muntu wa mbere, Adamu, yagabiwe ubuzima bw’umubiri, ariko Adamu wa kabiri, ugizwe na Roho, atanga ubuzima.

⁴⁶ Cyakora habanza ubuzima bw’umubiri, hagakurikiraho ubuzima bwa Roho.

⁴⁷ Muntu wa mbere wavuye mu gitaka ni umunyagitaka; Muntu wa kabiri, we, aturuka mu ijuru.

⁴⁸ Uko umunyagitaka yabaye, ni na ko abanyagitaka bameze; uko uwaturutse mu ijuru ameze, ni na ko abagenewe ijuru bazaba.

⁴⁹ Nk’uko twabayeho mu misusire ya Muntu w’umunyagitaka, ni na ko kandi tuzagira imisusire y’Uwaturutse mu ijuru.

⁵⁰ Icyo nemeza cyo, bavandimwe, ni uko muntu, ku bw’umubiri n’amaraso, adashobora kwironkera umugabane mu Ngoma y’Imana, kimwe n’uko ubushanguke butakwigeza ku budashanguka.

⁵¹ Ngiye noneho kubahishurira ibanga. Twese ntituzapfa; ahubwo twese tuzahindurwa ukundi,

⁵² mu kanya gato, nk’uhumbije ijisho, akarumbeti k’imperuka kavuze. Koko akarumbeti kazavuga maze abapfuye bazukire kudashanguka, nuko natwe duhindurwe ukundi.

⁵³ Ni ngombwa ariko ko uyu mubiri wagenewe kubora ugezwa ku budashanguka, kandi uyu mubiri wagenewe gupfa ukagabirwa ukutazapfa.

⁵⁴ Igihe rero uyu mubiri ugenewe kubora uzagezwa ku budashanguka, kandi uyu mubiri ugenewe gupfa ukagabirwa ukutazapfa, ubwo ngubwo ibyanditswe bizaba byujujwe ngo «Urupfu rwaburijwemo n’umutsindo.

⁵⁵ Rupfu we! Ugutsinda kwawe kuri he? Urubori rwawe ruri hehe, wa Rupfu we?»

⁵⁶ Koko rero urubori rw’urupfu ni icyaha, naho ububasha bw’icyaha buturuka ku mategeko.

⁵⁷ Dushimire Imana yaduhaye gutsinda ku bw’Umwami wacu Yezu Kristu.

⁵⁸ Nuko rero, bavandimwe nkunda, nimukomere, mwe guhungabana, mukomeze gukorera Nyagasani, muzi neza ko kuruhira Nyagasani bitazabapfira ubusa.