1 Abakorinto 13 - Kinyarwanda Bibiliya Ntagatifu

¹ N’aho navuga indimi z’abantu n’iz’abamalayika, ariko singire urukundo, naba ndi nk’icyuma kibomborana cyangwa inzogera irangira.

² N’aho nagira ingabire y’ubuhanuzi, ngahishurirwa amayobera yose n’ubumenyi bwose; n’aho nagira ukwemera guhambaye, kumwe gushyigura imisozi, ariko ndafite urukundo, nta cyo mba ndi cyo.

³ N’aho nagabiza abakene ibyo ntunze byose, n’aho nahara umubiri wanjye ngo utwikwe, ariko nta rukundo mfite, nta cyo byaba bimariye.

⁴ Urukundo rurihangana, rwitangira abandi, ntirugira ishyari; urukundo ntirwirarira, ntirwikuririza;

⁵ nta cyo rukora kidahwitse, ntirurondera akari akarwo, ntirurakara, ntirugira inzika;

⁶ ntirwishimira akarengane, ahubwo ruhimbazwa n’ukuri.

⁷ Urukundo rubabarira byose, rwemera byose, rwizera byose, rukihanganira byose.

⁸ Urukundo ntiruteze gushira. Ubuhanuzi se? Buzashira. Indimi zo se? Zizaceceka. Ubumenyi se? Buzayoka.

⁹ Koko ubumenyi bwacu buracagase, kimwe n’uko ubuhanuzi bwacu bucagase.

¹⁰ Igihe rero ibyuzuye bizahinguka, iby’igicagate bizazimira!

¹¹ Mu gihe nari umwana, navugaga ay’abana, ngatekereza nk’abana, nkazirikana nk’abana; aho mbereye umugabo, nikuyemo ibya rwana byose.

¹² Ubu ngubu turasa n’abarebera mu ndorerwamo, ku buryo budafututse, ariko hari igihe tuzarebana imbonankubone. Ubu ngubu ibyo nzi biracagase, ariko icyo gihe nzamenya nk’uko nzwi.

¹³ Kugeza ubu, ukwemera, ukwizera n’urukundo uko ari bitatu, birabangikanye; ariko icy’ingenzi muri byo ni urukundo.