Tite 2 - Féké Testament 1947

¹ Da amo, mo sa fènli bon ko̱ ma njèran to̱ko̱nafèn.

² Dadaon an hona njoukouli mi mang mone kli, mbonatoul, ho̱ko̱na, njèran jing tounassaon da sénahang tèn laïnabi.

³ Mono on, an hona waïnli mi ndé pèng mone kli kéng jing tangna go̱ro̱ fofoto an nona Ouone, tane ti ba njou‐poukouna fèn ya, da tane koï a vin ya, da ba waïn to̱ko̱nafènli bèlta.

⁴ Mono on, an klime wara tikilali an hang kli mi na toula wa klili, da an hang kli mi na toula goune klili,

⁵ mang mone kli, klime ba bako̱la wonron ya, klime nding pina bil voul klili bèlta, ka nding bèlafèn ta, da kaou bo̱ko̱ ndo̱ka wa klili, mono on an mi tane poukou baïnjaka Ouone ya.

⁶ Mono on, mo wara bala goundi an klime mang mone kli,

⁷ jing fènli bon mo nding mahana ka on, an klime ko̱ mo mahana ka mèrènkè a bèla pina bon, da ka mboro to̱ko̱nafèn no mo to̱ko̱ mborokè guédék da jing mbonatoul.

⁸ Jing njèran baïnjaka on ko̱ njoukou mi tane ma baï sana baï kon toulkè ya, mono on an chonron mi sé bakèo̱, da kè ma jing fèna bèlya baï sana kon toul ling na ya.

⁹ Mo wara njou‐koïli an klime la njaka njou‐onatoul klili, da klime nding fènli bon ko̱ mi bi wélé toul kli ta, klime tane fa baï ya.

¹⁰ Klime tane ri fèn ya, da klime to̱ko̱ ko̱ kli ba bèla njou‐bakara lodok, mono on, an klime bou fèn ling to̱ko̱nafèn a Ouone Njou‐yana‐baï‐toul ama jing fènli bon.

¹¹ Baï ko̱ ndingna mbo̱l a Ouone mi bi nonkè kala tou ko̱ mi gui jing yana‐baï‐toul hi njoukouli bon,

¹² da mi to̱ko̱ hi na an name njomo pongna Ouone tèn nzala a koukoula a saka naï, baï pèngna mona jing mbonatoul, da ndingna guédék, da baï pèngna bong njaka Ouone ka saka naï kassénaï.

¹³ Name voro baï ko̱na oliya on ko̱ mi hi jangnandaï, da guina ka jonafèn a loukou Ouone da Njou‐yana‐baï‐toul ama Jésus‐Christ,

¹⁴ kè on ko̱ mi hi monè fènè baï toula, baï an kème ma baï chona na an mboro séla guingna bon, da baï a kè fènè mi tourou mèran njoukou tang fofoto, baï tèna ba dodok njoukou nèli, ko̱ none mi sènta baï ndingna bèla pina bon.

¹⁵ Mo sa fèn aïnli ka wara fèn, da mo ba baï toul békéfèn a njoukouna bi kala, ka mboro bina baïnjaka. Mo yèng an njoukouna mbéo mi tane jèk mo ya.