Saint Matthieu 4 - Féké Testament 1947

¹ Da on, Saint‐Esprit mi lang Jésus sé woropa, an zabolo mi yak nè.

² Da afal ko̱ kème tane ga son laka ya mane séssé bongkè‐nèng tèn hangnachoung bongkè‐nèng, da nzala i nè ta.

³ Da njou‐yaknafèn mi gui, ka sa hi nè: Tokoré mome ba Goune a Ouone, mo sa hi kone aïnli an klime féré tèn ba mapa.

⁴ Da Jésus mi féré sa, ka sa: Mahana ko̱ mi dé: Yé njoukouna ma yan ba baï toula mapa ka ho̱kè ya, da ka ba baïnjaka bon ko̱ mi tèn ka njaka Ouone.

⁵ Da zabolo mi do̱li nè sé guè tangna fofoto pou, da bi nè toul gangna toul temple,

⁶ ka sa hi nè: Tokoré mome ba Goune a Ouone, mo mbame guè tiya; baï ko̱ mahana ko̱ mi dé: Yé kè sa bi njaka ange nèli baï no, Yè kli ma to̱li mo ka ndo̱ko̱ kli, Baï an bo̱ko̱ mi nda toul kone ya.

⁷ Jésus sa hi nè: Mahana ko̱ mi dé on kéng: Mo ma baï léna Nanjou, ko̱ ba Ouone no ya.

⁸ Da zabolo mi do̱li nè sé guè toul gangna souraguèl nyèta, da kè to̱ko̱ bilkaouli a koukoula hi nè bon jing jonafèn akli,

⁹ da kème sa hi nè: Tokoré mome lé bou koukoula ka hiou mi, yé mè hi fèn aïnli bon hi mo.

¹⁰ Da Jésus sa hi nè: Mo sé kaïn ni, Satan! Baï ko̱ mahana ko̱ mi dé: Mo hiou ba Nanjou, Ouone no, ka nding bakara hi ba kè ka ho̱kè.

¹¹ Da on zabolo yèng nè. Da mono, angeli mi gui ka nding bakara hi nè.

¹² Da ko̱ Jésus mi la ko̱ Jean mi kaou jo̱bo̱ tou, kè sé guè koukoula an guèl Galilée.

¹³ Da kè ourou an pou Nazareth, da gui ka kaou pou Capernaüm ko̱ na bèl loukou mbi, an njaka sél koukoula Zabulon da guèl Nephthali,

¹⁴ an tènrèn none baï ko̱ mi sa ka njaka prophète Ésaïe mi tèn kala ka babaï, ka sa:

¹⁵ Koukoula an guèl Zabulon da koukoula an guèl Nephthali, Ka mbora njaka loukou mbi, an hélé Jourdain, Guèl Galilée a gentili,

¹⁶ Njoukou aïnli ko̱ kaou an yilime, Klime ko̱ loukou takanafèn; Da kli on ko̱ kaou an bilkaou da bo̱ko̱ tétéme a houl, Takanafèn tèn gui mone kli tou.

¹⁷ Ka name o̱kèo̱ Jésus tissaon baï sana mboura, ka sa: Oui hèkè békéfèn abaï, baï ko̱ bilkaou a nonkala hèdi tou.

¹⁸ Da ko̱ Jésus sé vongna bèl mbi Galilée, kè ko̱ yindi séré, Simon, kè on ko̱ kène ling‐è ba Pièrre, da André, yine nè, ko̱ bou ri mbi an bil mbi; baï ko̱ kli ba njou‐nzana njouïli.

¹⁹ Da kème sa hi kli: Oui gui fali, yé mè ma mosso oui tèn ba njou‐nzana njoukouli.

²⁰ Da koukoulion, kli yèng ri aklili kon ka sé falè.

²¹ Da ko̱ kème sé gounfènakè ndit on, kè ko̱ yine afékéli séré, Jacques, goune a Zébédée, da Jean, yine nè. Kli kaou bil kombone jing Zébédée, baba kli sana ri akli, da kè di kli.

²² Da koukoulion kli yèng kombone bi jing baba kli, da kli sé falè.

²³ Da Jésus mi sèrè yan an guèl Galilée bon, ka to̱ko̱ fèn an bil synagogue aklili, da sa mboura bèlabaï a bilkaou, da haï mèrèn jangmali toutoul bon da mèrèn sétali toutoul bon an wora njoukouli.

²⁴ Da baï nè mi ti tèn guèl Syrie bon, da kli fan njou‐jangmali bon tèn njou‐sétali ko̱ jangma akli mi na toutoul guè monè, da njoukouli ko̱ kaou jing zabololi, da njou‐ndoïjoulouli, da njoukouli ko̱ mone klime houwè; da kè haï mone kli bon.

²⁵ Da ro̱kè njoukouli mi sé falè an guèl Galilée, da an guèl Décapole, tèn pou Jérusalem, da an guèl Judée, da an hélé Jourdain.