Saint Marc 1 - Féké Testament 1947

¹ Titili bèlabaï a Jésus‐Christ Goune a Ouone.

² Mahana ka on ko̱ mi dé a takarata a prophète, Ésaïe: Mono, mè pi njou‐mboro pina ni an bèl nono, Ko̱ ma mosso domboro no.

³ Kè ba mbo̱ko̱kè on ko mi bouka an woropa ba: Oui mosso domboro Nanjou, Ka taka wo̱wo̱k mboro nèli tane ta.

⁴ Jean mi gui tou, ka nding baptême an woropa, da sa mboura yana baptême baï hèkèna békéfèn, baï jingna yèngna bi mboro békéfènli.

⁵ Da njoukouli bon an guèl Judée, tèn kli bon an pou Jérusalem mi guè monè; da kè nding baptême hi kli an bil mbi Jourdain, ko̱ klime hèkè békéfèn aklili bi kala.

⁶ Jean mi bou la pouran mona chameau ka gna ga bi kèrè, da laka sona nè ba guilali, da nome jourou woropa.

⁷ Kème sa mboura, ka sa: Njoukou mbéo ma gui fali o̱, kème ko̱ njèrèn ta mi bon. Da mè tane ga ma baï houkouna koukoula an mbèlè baï séla sal sabo̱ko̱ nè ya.

⁸ Ami, mè nding baptême hi oui ka ba mbi; da amè, yé kè ma nding baptême hi oui ka ba Saint‐Esprit.

⁹ Da baï mi gui mahana ka on, ka name o̱kèo̱ ko̱ Jésus ourou an pou Nazareth an guèl Galilée, ka gui, da Jean mi nding baptême hi nè an bil mbi Jourdain.

¹⁰ Da koukoulion, ko̱ kème yé tèna kala an bil mbi, kème ko̱ nonkala mi bourou tou, da Esprit mi diri gui da kaou laou toulè mahana ka nguédé.

¹¹ Da bounaka mi ba gui ka nonkala: Mo ba Goune ni, ko̱ mème sé hang‐o̱ nyèta, mo bi wélé touli ta.

¹² Da koukoulion Esprit mi lang nè sé woropa.

¹³ Da kème kaou an woropa ma name bongkè‐nèng, da Satan mi yak nè. Kème kaou jing naïnli a woropa, da angeli mi nding bakara hi nè.

¹⁴ Da afal ko̱ klime bou Jean jo̱bo̱ tou, Jésus mi sé an guèl Galilée, ka sa mboura bèlabaï a Ouone.

¹⁵ Da klime sa: Name mapélékè tou, da bilkaou a Ouone mi hèdi tou. Oui hèkè békéfèn baï, ka la bilaou bèlabaï.

¹⁶ Da ko̱ kème sèrè vongna bèl loukou mbi Galilée, kè ko̱ Simon kira André, yine a Simon ko̱ mi bou ri mbi an bil mbi on, baï ko̱ kli ba njou‐nzana njouïli.

¹⁷ Da Jésus mi sa hi kli: Oui gui fali, da yé mè ma mosso oui tèn ba njou‐nzana njoukouli.

¹⁸ Da koukoulion klime yèng ri an klili kon, ka sé falè.

¹⁹ Ko̱ kème sé rong di gounfènakè, kè ko̱ Jacques goune a Zébédée, tèn Jean yine nè, klime ndé kaou ba bil kombone kéng ka san rili.

²⁰ Da koukoulion kème di kli; da kli yéng baba kli Zébédée an bil kombone jing njou‐bakarali, da sé falè.

²¹ Da klime sé guè pou Capernaüm da koukoulion Jésus mi ri guè bil synagogue ka name sabbat, da to̱ko̱ fèn hi njoukouli.

²² Laou kli mi sé siya baï toul to̱ko̱nafèn nè; baï ko̱ kème to̱ko̱ hi kli mahana ka bina baïnjakè tou, da tane ti mahana ka njou‐to̱ko̱na bong guingnali ya.

²³ Da koukoulion njoukouna makaou soko an bil synagogue akli ko̱ mi jing esprit dakame, kème wan njaka guè siya,

²⁴ ka sa: Fème ko̱ mbèl mo jing na lé Jésus an Nazareth? Mome han gui tou baï sèkèra na lé? Mè toutou nono, kong mo ba guè: Njou‐tangna fofoto a Ouone.

²⁵ Da Jésus mi ba baï hi nè, ka sa: Mo tou njako̱ bi rou, ka tèn kala an bila njoukou aïn.

²⁶ Da esprit dakame mi youkouri njoukou on ming ta, da kème wan njaka ming ta guè siya, ka tèn kala an bila njoukou on.

²⁷ Laou kli bon mi sé siya, da kli oui hana, ka sa: Fèn aïn ba fèn lé? Féké to̱ko̱nafèn lé? Ka njèran kè bi njaka esprit dakamli, da klime la baï nè!

²⁸ Da koukoulion tiri baï nè mi ti mane pouli bon an guèl Galilée.

²⁹ Da ko̱ klime tèn kala koukoulion an bil synagogue, kè da Jacques tèn Jean mi sé guè bil voula Simon kira André.

³⁰ Da ma a waïn a Simon, mi na jangma, monè ko̱ mba hèlè ta; da koukoulion klime sa baï a waïn on hi Jésus.

³¹ Da Jésus mi dong guè bèl monè, da kè ba ndo̱kè ka ko̱ko̱ nè bi siya, da koukoulion hèlè monè vo tou da kème nding bakara hi kli.

³² Ka bèlaléou ko̱ séssé mi ri tou, klime fan njou‐jangmali bon gui monè, tèn njoukouli on ko̱ mi jing zabololi.

³³ Da njou‐pouli on bon mi ndoï an njaka mboro aïn.

³⁴ Da kème haï jangma a njoukouli nyèta toutoul toutoul, ka ni zabololi nyèta tèn kala, da kème gna bi njaka zabololi an klime tane sa baï ya, baï ko̱ klime ti toutou nè tou.

³⁵ Ka toulapélé chout ambèl ko̱ guèl mi dèrè kon koukoula, Jésus mi ourou siya da sé guè woropa, ka hiou Ouone an ndourou.

³⁶ Da Simon tèn kli on ko̱ kaou jing nè mi guè falè, baï nzana nè;

³⁷ da ko̱ klime jing nè tou, kli sa hi nè: Njoukouli bon mi nza mo.

³⁸ Da kè sa hi kli: Oui gui an name do̱li sé guèl aféké tèn bil ndo̱ko̱ pou afékéli, baï an mème ndé sa mboura an ndourou kéng; baï ko̱ ba baï baï on mi ko̱ mè gui tou.

³⁹ Da kème sé ka sa mboura an bil synagogue klili an bil pouli bon an guèl Galilée, ka ni zabololi tèn kala.

⁴⁰ Da njou‐ndo̱wè mbéo mi guè mona Jésus, ka houkou ka njaka toukè guè koukoula, da sa jo̱jo̱ nè, ka sa: Tokoré mome jiji mo ma baï mossona mi tang ta.

⁴¹ Da Jésus mi ko̱ né passé ta, da kè ndara ndo̱kè ka da nè, da sa hi nè: Mè ji bo̱ko̱kè, mo gui tang ta.

⁴² Da koukoulion ndowè mi fé guèfal an monè, da monè mi tèn tang ta.

⁴³ Da koukoulion Jésus mi gna bi njakè, ka pi nè tèn sé kala,

⁴⁴ ka sa hi nè: Mi bo̱l bilo̱, ka mo tane sa hi njoukouna mbéo ya; da mo sé, ka to̱ko̱ mono hi ba sacrificateur da hi fènli on ko̱ Moïse mi sa bi njakè, baï an mome gui tang ta, ko̱ ba sana bongbaï hi kli.

⁴⁵ Da njoukou aïn mi tèn kala da tissaon baï sana bongkè ka sèrè jing baïnjaka on an nona ro̱kè manguèl, mono on ko̱ Jésus mi tane ma baï tèna nona ro̱kè baï rina bil pou ba aféké ya, da kème kaou an woropa, da klime ourou ma?-?nguèli bon, ka guè monè.