Saint Luc 18 - Féké Testament 1947

¹ Da Jésus sa ébèlbaï hi kli, baï to̱ko̱na hi kli an mi mabongkè an klime hiou Ouone guèbassoko, ka tan ya.

² Da kè sa: Njou‐walabaï makaou an bil pou hana mbéo, ko̱ mi tane ga ngou waou nona Ouone ya, da kè tane ga ènrèn njoukouna mbéo ba baï nonè ya.

³ Da waïn soré hana makaou an bil pou on, da kè guè monè bo̱ko̱ ro̱ko̱ta, ka sa: Mo wal baï hi mi guédék kira bakèo̱ jing mi.

⁴ Da kè tane ga ji bo̱ko̱kè gata ya, da afal da, kè sa ka bo̱ko̱ go̱rè: Mono, mè tane ga ngou waou nona Ouone ya, da tane ga ènrèn njoukouna mbéo ba baï nonè ya,

⁵ da baï ko̱ waïn soré aïn mi to̱ko̱ssé hi mi, yé mè wal baï hi nè guédék, maléba kè ma mba njaka ni baï ko̱ kè laïbi guina guèbassoko.

⁶ Da Nanjou mi sa: Oui la baï on ko̱ njou‐walabaï ko̱ nding fèn maï maï mi sa.

⁷ Da koukoulion Ouone mi wal baï hi kli on ko̱ kème sane kli tèn kala bon, ko̱ sa jo̱jo̱ nè ka mbiléou, ka séssé da ka hangnachoung, da mono, kè pa monè nyèta jing kli ya lé?

⁸ Mè sa hi oui, ko̱ kè ma wal baï hi kli guédék koukoulion. Da ko̱ Goune a Njoukou mi gui kè ma ko̱ tounassaon a koukoula aïn lé?

⁹ Da kè ndé sa ébèlbaï aïn kéng hi kli on ko̱ mi bi hang kli toul mone kli fèn kli, ko̱ kli ba guédék, da kli ko̱ garakèli yé ba kli ti ba fèna ya.

¹⁰ Njoukouli séré mi hé sé njaka temple baï hiouna Ouone; aïn mbéo ba pharisien, da kènkè ba njou‐mangna l’impôt.

¹¹ Da pharisien on mi o baï hiouna Ouone mahana ka on, guè toulè fènè: Ouone, mè kaou koukoula hi mo baï ko̱ mème tane ga ti mahana ka njoukou afékéli ya, kli on ko̱ ba njou‐sènafènli, maléba njou‐vaïnafènli maléba njou‐maïnli, maléba mahana ka njou‐mangna l’impôt aïn ya.

¹² Mè chang laka bo̱ko̱ séré an bil semaine mbéo, da mè hi díme toul fènli bon ko̱ mème jing.

¹³ Da njou‐mangna l’impôt mi o amè fal dita, da kè tane ji baï bina nonè guè siya guè nonkala ya; da kè dou goudi nè, ka sa: Ouone mo nding haïo hi mi, mè ba béké njoukou.

¹⁴ Mè sa hi oui, njoukou aïn ko̱ mi diri sé guè bil voulè, gui guédék ta kènkè on. Baï ko̱ njoukouna on ko̱ mi ji ba an ling‐è fènè mi ti, yé kè ma è, da njoukouna ko̱ bou monè guè koukoula yé ling‐è ma ti.

¹⁵ Da kli fan joï goune klili kéng guè monè, baï an kème da kli. Da ko̱ njou‐séna bongli, mi ko̱ fèn on, kli to kli on ko̱ mi ya joï goundi on gui.

¹⁶ Da Jésus mi di kli, ka sa: Oui yèng lélé goundi an klime gui moni, ka tane dèn kli ya; baï ko̱ bilkaou a Ouone ba baï a kli on ko̱ mi mahana ka lélé goundi.

¹⁷ Babaï, mi mè sa hi oui, njoukouna ko̱ tane ga ya bilkaou a Ouone mahana ka ba lélé goune ya, yé kè ba rina bilkè tane tiya.

¹⁸ Da zaworo hana mbéo mi oui nè, ka sa: Bèla njou‐to̱ko̱nafèn, yé mème nding ba fèn an mème ya pélé yana kambèlè lé?

¹⁹ Da Jésus sa hi nè: Baïfèn da mome di mi ba bèlakè on lé? Bèla njoukouna mbéo tane tiya bo̱l ba Ouone ka ho̱kè.

²⁰ Mo toutou none bina baïnjaka guingnali lé? Mo nding maïn ya, mo i njoukou ya, mo ri fèn ya, mo sa bongbaï woko ya, mo dik baba no da ma no.

²¹ Da kè sa: Mè bou fal fèn aïnli ko̱ mème pane ka goune bo̱l tèn kassénaï.

²² Da ko̱ Jésus mi la baï aïn, kè sa hi nè: Fèn mbéo mi nak mo tou, mo sé ka jol fèn noli bon, ka wal hi foïna njoukouli, da yé mo ma kaou ka nguèra an nonkala, da mo gui ka sé fali.

²³ Da ko̱ zaworo on mi la baï aïn, go̱rè mi sé nè nyèta, baï ko̱ kè ba nguèra njoukou nyèta.

²⁴ Da ko̱ Jésus mi ko̱ nè, kè sa: On mi lata jing kli on ko̱ mi nguèrè ta baï rina sé guè bilkaou a Ouone.

²⁵ On laïya baï a chameau mi tèn loko tène ka lata baï an nguèra njoukou mi ri bilkaou a Ouone.

²⁶ Da kli on ko̱ la baï aïn, kli sa: Yé guème mabongkè baï kouna lé?

²⁷ Da Jésus mi féré sa: Fèna on ko̱ mbéya njoukouli mana bongkè tane tiya, mbéya Ouone fènli bon mabongkè.

²⁸ Da Pierre sa: Mo ko̱, na yèng fèn nali bon, da sé falo̱.

²⁹ Da Jésus sa hi kli: Babaï, mi mè sa hi oui, njoukouna ko̱ mi yèng voulè, maléba waïn nè, maléba yine nèli, maléba baba nè da ma nè, maléba goune nèli baï toul bilkaou a Ouone,

³⁰ da yé kè ma jing fènli nyèta ta ka name a koukoula aïn, da ka name ko̱ mi nding baï guina jing yana kambèlè.

³¹ Da Jésus ya kli mane botoulè‐séré guè monè, ka sa hi kli: Oui ko̱, an name hé sé guè pou Jérusalem, da yé none fènli bon toula Goune a njoukou ma wéré kon kala ko̱ mi dé ka mbora prophèteli.

³² Baï ko̱ yé kli ma souti nè hi gentili; da kli ma gaï nè ka sène nè ka san same kon nonè,

³³ da, afal ko̱ klime jo̱ nè, kli ma i nè; da name a saïkè kè ma tome.

³⁴ Da kli tane ga tou saon baï aïn mbéo ya; da baï aïn mi mou ndik ndik jing kli, da kli tane ga tou fèn ko̱ kème sa ya.

³⁵ Da baï mi gui mahana ka on, ko̱ Jésus hèdi pou Jéricho, njou‐foukoura none mbéo makaou an bèl domboro baï ndouna fèn.

³⁶ Da ko̱ kème la ro̱kè njoukouli mi ta, kè oui kli, guèli mi ta on lé.

³⁷ Da kli sa hi nè: Jésus a Nazareth mi ta.

³⁸ Da kè wan njaka, ka sa: Jésus mo goune a David, mo nding haïo hi mi!

³⁹ Da kli on ko̱ mi sé ti dambèl, kli to nè, kli sa hi nè an kème kaou ka njakè; da kè sa guè siya mingta: Mo goune a David, mo nding haïo hi mi.

⁴⁰ Da Jésus mi o ka sa, an klime ya nè gui monè. Da ko̱ kème hèdi bèl monè tou, Jésus oui nè:

⁴¹ Mo ji ba mè nding ba fèn jing mo lé? Da kè sa: Nanjou, mè ji baï ko̱na guèl.

⁴² Da Jésus mi sa hi nè: Mo ko̱ guèl, mbo̱l tounassaon no mi ko̱ kou mo tou.

⁴³ Da koukoulion kè ko̱ guèl, da kè sé fala Jésus, da kè jone Ouone, da njoukouli bon mi ndé jone Ouone kéng, ko̱ klime ko̱ fèn aïn.