Saint Luc 1 - Féké Testament 1947

¹ Mono, baï ko̱ njoukouli nyèta mi dé takarata baï to̱ko̱na none fènli bon tangta, ko̱ mi tèn kala ka babaï an woro na,

² mahana ko̱ klime sa hi na, kli on ko̱ ba njou‐sana bongbaïli ko̱ mi ko̱ko̱ ka none kli jinguèl ka titilikè, da ba njou‐bakarali a baïnjaka;

³ da mème ndé ko̱ on bèl moni ta kéng, baï déna takarata mane ka bongkè hi mo, bèla Théophile, baï ko̱ mème ti foul fal fèn aïnli bon tou, ka saonkè;

⁴ mono on, an mome tou fèn aïnli ko̱ klime to̱ko̱ hi mo jinguèl ba babaï.

⁵ Jinguèl, ka name a Hérode, nanjoukaou a Judée, sacrificateur hana mbéo makaou, ling‐è ba Zacharie ka sarang a Abia; da waïn nè ba mèran goune waïnli a Aaron, da ling‐è ba Élisabeth.

⁶ Kli séré bon mi kaou guédék an nona Ouone. Kli sé tangta ka mboro bina baïnjaka guingna, ka nding dofènli a Nanjou bon ka rongo.

⁷ Goune kli tane tiya, baï ko̱ Élisabeth ba waïn tou; da kli séré bon mi po̱ko̱ro̱ tou.

⁸ Da baï mi gui mahana ka on ko̱ Zacharie mi pane ndingna pina sacrificateur an nona Ouone, ka sarang amè,

⁹ mahana ka do pina sacrificateur on ba baï nè, baï rina sé bil temple a Nanjou baï soungna yombo.

¹⁰ Ko̱ kème yé soungna yombo, ro̱kè njoukouli bon mi kaou kala ka hiou Ouone.

¹¹ Da ange a Nanjou mi tèn gui monè, ka o mboro wonron ndo̱ko̱ autel yombo.

¹² Da ko̱ Zacharie mi ko̱ nè monè hou mbi, da waou mi i nè ta.

¹³ Da ange mi sa hi nè: Mo ngou waou ya Zacharie; baï ko̱ Ouone mi la sana jojo no tou, da yé waïn no Élisabeth ma mboung ba goune wonron hi mo, da mo ma bi ling‐è ba Jean.

¹⁴ Da mo ma jangndaï ka wal maïya, da yé njoukouli nyèta ma jangndaï ka name mboungna nè.

¹⁵ Baï ko̱ yé kè ma gui loukou an nona Nanjou. Kème tane njo vin tèn njèran vone ya, da kè ma mba ka Saint‐Esprit, bo̱l ka titilikè an bila ma nè.

¹⁶ Da kè ma ki go̱ra goundi a Israël nyèta guè mona Nanjou Ouone kli.

¹⁷ Da kè ma sé an nona Ouone jing esprit da njèran Élie, baï kina go̱ra babali guè mona goundi, da an njou‐fana njakali mi sé mboro cho̱kna a njou?-?guédéki, baï mossona mèran njoukou mbéo kora Nanjou ko̱ go̱ro̱ kli mi ji lana nè.

¹⁸ Da Zacharie mi sa hi ange: Yé mè tou fèn aïn ka mboro hane dé? Baï ko̱ mème tèn hona njoukou tou, da waïn ni mi ndé po̱ko̱ro̱ tou kéng.

¹⁹ Da ange mi féré sa, ka sa hi nè: Mè ba Gabriel ko̱ o bèl mona Ouone; mè gui ba mboro pina baï sana hi mo, ka to̱ko̱ bèlabaï aïn hi mo.

²⁰ Da mo ko̱, yé mo ma féré tèn mbo, mo ba sana baï tane tiya, bo̱l tèn name on ko̱ fèn aïnli mi tèn kala, baï ko̱ mo tane ga la bilaou baïnjaka nili ya, ko̱ yé ma tèn kala ka babaï ka namkèli.

²¹ Da njoukouli mi voro Zacharie, laou kli mi sé siya baï ko̱ kème kaou bongkè dita on an bil temple.

²² Da ko̱ kème tèn kala kè lé baï sana baï hi kli pélé, da klime toutou ba kème ko̱ fèn mahana ka lo̱la an bil temple tou; kè to̱ko̱ ba ndo̱kè hi kli ka tane sa baï ya.

²³ Da baï mi gui mahana ka on, ko̱ name bakara nèli mi mabongkè tou, kème féré sé guè voulè.

²⁴ Da afal ka name o̱kèo̱, waïn nè Élisabeth mi mbabil tou. Kè mou monè ma féou dioui, ka sa:

²⁵ Nanjou mi ko̱ nding on hi mi ka name on ko̱ kème ko̱ mi jinguèl, baï takana chonron ni guèfal an wora njoukouli.

²⁶ Ka féou an difala‐mbéokè, Ouone mi pi ange Gabriel guè bil pou mbéo a Galilée, lingkè ba Nazareth,

²⁷ guè mona tikila hana an bo̱ko̱ sél, ko̱ njoukou mbéo an voula David ling‐è ba Joseph mi baka nè bi, ling a tikila on ba Marie.

²⁸ Ange mi guè monè, ka sa: Mè name mo, Nanjou mi biwélé toulo̱, da jing mo, Ouone mi same mo tou an wora gara waïnli.

²⁹ Da ko̱ Marie mi la baï on, monè mi hou mbi, da kème kèrè ka laou‐è, namnafèn on ba fèn lé?

³⁰ Ange mi sa hi nè: Mo ngou waou ya Marie baï ko̱ Ouone mi ko̱ mo bèl monè ta.

³¹ Da mono, mo ma mbabil, ka mboung ba goune wonron, da mo ma bi ling‐è ba Jésus.

³² Yé kè ma tèn loukou njoukou, da kli ma bi ling‐è ba Goune a Sèkèrè Guèl Ndèk, da yé Nanjou Ouone ma hi kangala njaka bara a baba nè David hi nè.

³³ Kè ma na gangna toul voula Jacob kambèlè, da bilkaou nè ba tèna sèkèrèkè tane tiya.

³⁴ Da Marie mi sa hi ange: Yé fèn aïn mi gui ka mboro hani, ko̱ mè tane ga tou wonron njoukou ya lé?

³⁵ Ange mi féré sa, ka sa hi Marie: Saint‐Esprit ma gui to̱ulo̱, da tétéme njèran a Sèkèrè Guèl Ndèk ma goukou mo. Mono baï on ko̱ mo ma bi ling a Tangna‐fofoto fèn on ko̱ mo ma mboung nè ba Goune a Ouone.

³⁶ Da mo ko̱, Élisabeth, yine no, ko̱ ba po̱ko̱ro̱ waïn da kème ndé mbabil goune wonron kéng, kè ko̱ ba waïn tou da mbabil ma féou difala‐mbéo tou.

³⁷ Baï ko̱ baïnjaka on ko̱ mi gui ka Ouone tane na bo̱on tane njèran ya.

³⁸ Da Marie mi sa: Mè makaï ba waïn bakara Nanjou; dadaon an fèn aïn mi gui moni mahana ko̱ baïnjako̱ mi sa! Da ange mi ourou an monè tou.

³⁹ Ka name o̱kèo̱ Marie mi ourou siya gata, ka sé guè toul souraguèli an pou mbéo a Juda;

⁴⁰ kème ri sé bil voula Zacharie, da name Élisabeth.

⁴¹ Da baï mi gui mahana ka on, ko̱ Élisabeth mi la namnafèn a Marie, goune mi ourou an bilè, da Élisabeth mi mba ka Saint‐Esprit.

⁴² Da kème wan njaka guè siya mingta, ka sa: Ouone mi same mo tou an wora gara waïnli, da ndé same panran goune an bo̱ko̱ bilo̱.

⁴³ Mé ba fèn da an ma a Nanjou ni mi gui moni lé?

⁴⁴ Mo ko̱, ko̱ mème la namnafèn no, goune mi ourou ka jangndaï an bili.

⁴⁵ Da jangnandaï mi ba baï a kè on ko̱ mi la bilaou tou, baï ko̱ fènli on ko̱ Nanjou mi sa hi nè, yé nonkè ma tèn kala ka babaï.

⁴⁶ Da Marie mi sa: Laou ni mi jone Nanjou,

⁴⁷ Da esprit ni mi jangndaï ka bila Ouone, Njou‐yana‐baï‐toul ni,

⁴⁸ Baï ko̱ kème ko̱ foïnafèn ndingna waïn bakara nè. Mono mo, ko̱ bo̱l tèn kassénaï mèran njoukouli bon ma di mi ba waïn jangnandaï,

⁴⁹ Baï ko̱ kè on ko̱ njèrèn bon mi nding loukou fènli hi mi. Da ling‐è ba Tangna‐fofoto,

⁵⁰ Da kème nding haïo hi mèran njoukouli tèn mèran njoukouli, Hi kli on ko̱ mi waou nè.

⁵¹ Da kème nding njèran pina bassan nè tou; Da kème yaïli kli on ko̱ mi kèrè ndoïna gangna jing kèrafèn ka go̱ro̱ kli.

⁵² Kème gnèrèn gangnali an njaka bara klili tou, Da kè bi ling kli ti, ko̱ vomboï.

⁵³ Kè hi bèla fèn sona mba hi njoukouli ko̱ nzala mi i kli, Da kè pi njou‐nguèrali féré fal bo̱on.

⁵⁴ Kè lé mbèla njou‐bakara nè, Israël, An ndingna haïo nè mi tane hou laou‐è ya,

⁵⁵ Mahana ko̱ kème sa hi tangko nali, Hi Abraham tèn mèrèn nè baï kambèlè.

⁵⁶ Da Marie mi cho̱ro̱ jing Élisabeth hèdi féou saï, da afal kème féré sé guè pou nè.

⁵⁷ Da féou mboungna goune a Élisabeth mi tèn tou, da kème mboung ba goune wonron.

⁵⁸ Da ko̱ ndo̱ko̱ba nèli tèn yine nèli mi la ko̱ Nanjou mi nding haïo hi nè nyèta, klime jangndaï jing nè.

⁵⁹ Da baï mi gui mahana ka on, ka name an difala‐saïkè, mono, klime gui baï bina goune baï ina gassa, ka ji baï bina ling‐è ba Zacharie mahana yé ba ling a baba nè on.

⁶⁰ Da ma nè mi féré sa, ka sa: Haï tane ti on ya, dadaon an ouime bi ling‐è ba Jean.

⁶¹ Da klime sa hi nè: Njoukouna mbéo an wora yine noli mi tane ga bi ling mahana ka aïn ya.

⁶² Da klime kakala ndo̱ko̱ kli hi baba nè ka oui nè, ba kè ji bina ling‐è ba fèn lé?

⁶³ Da Zacharie mi oui kli baï takarata, ka dé on ka sa: Ling‐è ba Jean. Da laou kli bon mi sé siya.

⁶⁴ Da koukoulion njakè mi bourou tou, da léme sélè mi lang, da kè sa baï ka jone Ouone.

⁶⁵ Da waou mi ba njoukouli bon ko̱ kaou an bèl mone kli, da tiribaï aïn mi ti manguèl an toul souraguèli a Judée bon.

⁶⁶ Da njoukouli bon ko̱ la baï aïn, klime pèng baï aïn bi go̱ro̱ kli, ka sa: Da on, yé goune aïn ma nding ane dé? Baï ko̱ ndo̱ka Nanjou mi na toulè.

⁶⁷ Da baba nè Zacharie mi mba ka Saint‐Esprit, ka to̱ko̱ bong njaka Ouone, ka sa:

⁶⁸ Same Nanjou, Ouone a Israël, Baï ko̱ kème gui ka ko̱ da cho njoukou nèli tou.

⁶⁹ Kè hi bèla njèran Njou‐yana‐baï‐toul hi na. An bil voula David, njou‐bakara nè,

⁷⁰ Mahana ko̱ kème ti sa jinguèl ka tang ambèl ka njaka tangna fofoto prophète nèli,

⁷¹ Baï yana‐baï‐toula an ndo̱ka bakèo nali, da an ndo̱ko̱ kli on bon ko̱ jèk na;

⁷² Da baï ndingna haïo hi tangko nali, Ka bi laou‐è toul tangna fofoto bina go̱njakèli an none hana,

⁷³ Ka serment on ko̱ kème lou jing tangko na Abraham,

⁷⁴ Baï hina mboro hi na, baï ko̱ kème ya baï toula an ndo̱ka bakèo̱ nali tou, An name nding bakara hi nè tane waou,

⁷⁵ Ka mboro sèna ka tangna go̱ro̱ fofoto da ndingna guédék an nonè, ka name yana nali bon.

⁷⁶ Da mo goune, yé kli ma bi ling‐o̱ ba prophète a Sèkèrè Guèl Ndèk. Baï ko̱ yé mo ma sé ambèl an nona Nanjou baï mossona domboro nèli,

⁷⁷ Baï to̱ko̱na mboro yana‐baï‐toul hi njoukou nèli, Da mboro kona békéfèn klili pa,

⁷⁸ Mbo̱l ndingna bèla haïo a Ouone na, Mono ko̱ bèla séssé mi tèn an nonkala gui mona tou,

⁷⁹ Baï chana kon toula kli ko̱ mi kaou an bil yilime an bo̱ko̱ tétéme houl, Da baï mira bo̱ko̱ na sé guè mboro go̱ro̱ iki.

⁸⁰ Da joï goune aïn mi mbambi, ka gui njèrèn ka esprit. Da kème kaou woropa, bo̱l tèn name on ko̱ kème tèn kala an nona Israël.