Romainli 8 - Féké Testament 1947

¹ Mono on, kassénaï barabaï ba léna toula kli on ko̱ mi na an bila Jésus‐Christ tane tiya.

² Baï ko̱ guingna Esprit a yana ka bila Christ‐Jésus mi sél mi an guingna békéfèn da houl.

³ Baï fèn on ko̱ guingna mi tane ga ma baï ndingnakè ya, baï ko̱ njèran nè ka mboro naïn‐mone mi tane ga tiya, Ouone mi kon barabaï toul békéfèn an bil naïn‐mone, ko̱ kè pi dodok Goune nè ka tétéme naïn‐mone békéfèn, da baï toul békéfèn.

⁴ Mono on, an do baïnjaka guingna mi bi nonkè kala an bila on, ko̱ mi tane ga sé fal naïn‐mone ya, da sé ba fala Esprit.

⁵ Baï kli on ko̱ sé ba fala naïn‐mone, klime bi hang kli toul fènli a naïn‐mone, da kli on ko̱ sé ba fala Esprit, klime bi hang kli toul fènli a Esprit.

⁶ Baï ko̱ bina laou kèrafèn a naïn‐mone ba houl, da bina laou kèrafèn a Esprit ba yana da go̱ro̱ iki;

⁷ baï ko̱ bina laou a naïn‐mone ba pongna Ouone, baï ko̱ kème ji baï kaouna bo̱ko̱ guingna a Ouone ya, da ka babaï kè tane ga mabongkè ya.

⁸ Da kli on ko̱ ba an bil naïn‐mone mi tane ma baï bina wélé toula Ouone ya.

⁹ Da abaï, oui tane ga ti an bil naïn‐mone ya, da an bil Esprit, tokoré Esprit a Ouone mi bi an bil baï. Da tokoré njoukouna mi tane ti ka Esprit a Christ ya, njoukou aïn mi tane ti ba amè ya.

¹⁰ Da tokoré Christ mi yé an bil baï ka babaï, kli‐mone on mi hou baï toul békéfèn, da esprit ba yana baï toul ndingna guédék.

¹¹ Da tokoré Esprit a kè on ko̱ mi tome Jésus an wora houli mi bi an bil baï, kè on ko̱ tome Jésus‐Christ an wora houli, yé kè ma ndé hi yana hi kli‐mone poumna abaï kéng, mbo̱l Esprit a kè on ko̱ mi bi an bil baï.

¹² Mono, yindi, na tane ti ba njou‐ko̱dali a naïn‐mone ya, baï kaouna ka mboro naïn‐mone.

¹³ Da tokoré ouime yan ka ba fala naïn‐mone, oui ma hou; da tokoré ouime i pina kli‐mone baïli ka mbora Esprit, yé oui ma yan.

¹⁴ Baï kli on bon ko̱ Esprit a Ouone mi miri kli, kli on ba goundi a Ouone.

¹⁵ Baï ko̱ oui tane ga ya esprit koï baï féra ndingna waou ba aféké ya; da ouime ya ba esprit féra tèn dodok goune, ka bila Esprit on ko̱ name wan njaka guè siya ka sa: Abba! Baba!

¹⁶ Esprit fènè mi sa bongbaï jing esprit na ko̱ na ba goundi a Ouone.

¹⁷ Da tokoré na ba goundi a Ouone, na ba goune yana fèn péléli; goune yana fèn péléli a Ouone, da ndo̱ko̱ba yana fèn péléli jing Christ; tokoré name ndé to̱ko̱ssé jing nè, mono on, na ma ndé ya jonafèn mabahana jing nè kéng.

¹⁸ Baï ko̱ laou ni mi kèrè ko̱ to̱ko̱nassé on kassénaï ba mangna bong jonafèn on tane tiya, ko̱ mi nding baï guina baï hina na.

¹⁹ Baï ko̱ bina hang a fèn mossona mi voro maïya name bina nona goundi a Ouone kala.

²⁰ Baï ko̱ kème ba fèn ko̱ kème mosso tèn koï a fèn ko̱ na bo̱on, da tane ti ba ka laou‐è fènè ya, da ba baï a kè on ko̱ mi ba nè tèn koï.

²¹ Baï fèn mossona mi oli an mi sélè an bil poumna on ko̱ mi ba nè ba ko̱ï, da bou nè bil séna ka laou jing jonafèn a goundi a Ouone.

²² Baï ko̱ name toutou fèn mossona bon mi lé hang kli da bonra jingna séta mi lé toul kli jing hana bo̱l tèn kassénaï.

²³ Da tane ti ba on ka ho̱kè ya; da na fèna kéng ko̱ jing titili léna a Esprit, na fèna mi ndé lé hang na jing esprit na kéng, ka voro baï fèra tèn dodok goune, on ko̱ ba cho̱kna kli‐mona.

²⁴ Mbo̱l oliya mi kou na. Da tokoré njoukouna mi ko̱ fèn on ko̱ kème oli, on mi tane ti ba oliya fèn ya. Da guème ko̱ ma oli fèn on ko̱ kème ko̱ tou lé?

²⁵ Da tokoré name oli fèn on ko̱ name tane ga ko̱ ya, na voro fèn on ka laïnabi.

²⁶ Mono, ndé on kéng, Esprit fènè mi ndé lé mbèla, an guèl on ko̱ name kaou hèfèrè, baï ko̱ name tane ga tou fèn bèlta baï hiouna Ouone ka mborokè ya. Da Esprit fènè mi ko̱ hiou Ouone kon toula, ka léna hang‐è on ko̱ njoukou mi tane ma baï sanakè ya.

²⁷ Da kè on ko̱ mi guèk go̱ra njoukouli, kème toutou laou‐kèrafèn a Esprit, baï ko̱ kème hiou Ouone kon toula njou‐lana‐bilaouli ka mboro kaouna mara fal toula Ouone.

²⁸ Da name toutou kli on ko̱ sé hang a Ouone, fènli bon mi ndoï jing hana baï ndingna bèlafèn jing kli on ko̱ kè di kli ka mboro badinafèn nè.

²⁹ Baï kli on ko̱ kème toutou ka tang ambèl, ko̱ kème ndé sane kli ka tang ambèl kéng, baï an klime tèn mahana ka tétéme a Goune nè, mono on, an kème tèn ba boutaïn an wora yindi nyèta.

³⁰ Da kli on ko̱ kème sane ka tang ambèl, kème ndé di kli kéng; da kli on ko̱ kème di, kème ndé nding kli gui guédék kéng; da kli on ko̱ kème nding kli gui guédék; kème ndé hi jonafèn hi kli kéng.

³¹ Mono on, yé na ma sa ba fèn baï toul fèn aïnli lé? Tokoré Ouone mi yé jing na guème ko̱ ma baï pongna na lé?

³² Kè on ko̱ mi tane ga dèn dodok Goune nè ya, ka hi nè baï toula bon, yé kè ma hi fènli bon bo̱on hi na guèbambèl mahana jing nè kéng ya lé?

³³ Yé guème ko̱ ma sa kita kon toula njoukouli on, ko̱ Ouone mi sane kli tèn kala tou lé? Kè ba Ouone fènè ko̱ mi nding kli gui guédék.

³⁴ Guème ko̱ ma kon barabaï toul kli lé? Kè ba Christ ko̱ mi hou tou; da ta on mi tome nè an wora houli, da kème kaou an mboro wonron ndo̱ka Ouone, ka hiou nè kon toula.

³⁵ Yé guème ko̱ ma baï wala na jing sénahang a Christ lé? Fèn to̱ko̱nassé mabongkè lé? maléba go̱ro̱ séta lé? maléba sènafèn lé? maléba bana lé? maléba kaouna bo̱on tane la lé? maléba guèl houl lé? maléba loukou gamba lé?

³⁶ Mahana ko̱ mi dé: Baï toulo̱ mi ko̱ name bou mona houl name bon, Kli ko̱ na mahana ka badouali on ko̱ klime guè baï ina kli.

³⁷ Da an bil fèn aïnli bon name ta toula fèn gnèran fènli, mbo̱l kè on ko̱ mi sé hang na ta.

³⁸ Baï ko̱ on mi kara mi maïya ko̱ houl, maléba yana, maléba angeli, maléba fèn gangnali, maléba fènli on ko̱ na kassénaï, maléba fènli on ko̱ nding baï guina, maléba njèranli.

³⁹ Maléba gangnafèn guè siya, maléba dinafèn guè tiya, maléba fèn mossona afékéli ka toul mi tane ma baï wala na jing sénahang a Ouone ya, on ko̱ mi na ka bila Christ‐Jésus, Nanjou na.