Romainli 6 - Féké Testament 1947

¹ Da mono on, yé na ma sa ba fèn lé? Yé na ma pane kaouna bo̱ko̱ békéfèn an ndingna mbo̱l mi taïnkon guèbambèl lé?

² Tane ti on ya: Na on ko̱ mi hou jing békéfèn tou, yé na ma pane bo̱ko̱ békéfèn ba aféké ane ndé?

³ Maléba oui tane ga touya, na bon ko̱ mi ya baptême ka bila Christ‐Jésus ka ba mboro houlè mi ko̱ name ya baptême ya lé?

⁴ Mono on, mi goro na jing nè, ka mboro baptême an bil houl, baï mahana ko̱ Christ mi tome an wora houli ka mboro jonafèn a Baba fènè, mono on na ma baï ndé séna ka féké mboro yana kéng.

⁵ Baï tokoré name gui mbéo jing nè mahana ka ba mboro houlè, yé na ma ndé gui mbéo jing nè mahana ka ba mboro tomnahoul amè kéng.

⁶ Baï ko̱ yé name toutou baï aïn, ko̱ mi bara tang njoukou na an di‐croix jing nè tou, mono on, njèran kli‐mone a békéfèn mi limna guèfal, da mono an name pane kaouna koï békéfèn ba aféké tane tiya.

⁷ Baï njoukou on ko̱ mi hou tou, barabaï békéfèn mi o̱ an toulè tou.

⁸ Da tokoré name ndé hou jing Christ tou, na la bilaou ko̱ yé na ma ndé yan jing nè kéng,

⁹ na toutou ko̱ mi tome Christ an wora houli, kè ma hou ba aféké ya; da houl ba name gangna toulè ba aféké tane tiya.

¹⁰ Baï houl aïn ko̱ kème hou tou, kè hou ba baï toul békéfèn bo̱ko̱ mbéo bo̱l kambèlè tou, da yana on ko̱ kème yan, kème yan ba baï a Ouone.

¹¹ Mono on, oui ndé ko̱ mone baï fèn baï, ko̱ mi hou jing békéfèn kéng, da oui fèn baï mi yan ba baï a Ouone ka bila Christ‐Jésus.

¹² Mono on, oui yèng an békéfèn mi tane na gangna toul kli‐mone poumna abaï ya, baï an ouime ma baï lana nzalakè ya.

¹³ Da oui tane jol fèn mone baïli hi békéfèn ya, mahana ka fèn béré a ndingna maï maï; da oui hi kli‐mone baïli fèn baï hi ba Ouone, mahana ka njoukouli on ko̱ mi tome an wora houli, da hi fèn mone baïli mahana ka fèn béré a ndingna guédék baï a Ouone.

¹⁴ Baï ko̱ békéfèn mi tane ma baï name gangna bi toul baï ya, baï ko̱ oui tane ga kaou bo̱ko̱ guingna ya, da oui kaou ba bo̱ko̱ ndingna mbo̱l.

¹⁵ Mono on, ba fèn lé? Yé na ma nding békéfèn baï ko̱ name tane ga kaou bo̱ko̱ guingna ya, da kaou ba bo̱ko̱ ndingna mbo̱l lé? Tane ti on ya.

¹⁶ Oui tane ga tou ya, ko̱ kè on ko̱ ouime jo̱l mone baï fèn baï hi nè mahana ka koïli, baï lana baïnjakè, oui ba koïli a kè on ko̱ ouime la baïnjakè mahana ka koïli a békéfèn ko̱ kan houl, maléba koïli baï lana baï ko̱ kan ndingna guédék lé?

¹⁷ Da name kaou koukoula hi Ouone, baï ko̱ oui ba koïli a békéfèn jinguèl, da kassénaï oui ji bo̱ko̱kè jing mèrèn to̱ko̱nafèn on, ko̱ mi to̱ko̱ an bil go̱ro̱ baï.

¹⁸ Da afal ko̱ mi sél oui an bil békéfèn tou, oui tèn ba koïli a ndingna guédék.

¹⁹ Mè sa mahana ka mbora njoukouli, baï ko̱ naïn‐mone baï mi na hèfèrè. Mahana ka on ko̱ ouime jo̱l fèn kli‐mone baïli jinguèl, tèn koï a ladidifèn da séla guingna, ko̱ kan baï séla guingna, mono on, oui ndé hi fèn mone baïli kassénaï tèn koï baï ndingna guédék, ko̱ mi kan baï wala mone baï bi baï a Ouone.

²⁰ Da ko̱ ouime pane ba koïli a békéfèn jinguèl, oui tane ga tèn koï ka mboro ndingna guédék ya.

²¹ Mono ka séssé o̱kèo̱ léna abaï ba fèn jing fènli on ko̱ mi hi chonron hi oui kassénaï lé? Baï ko̱ sèkèrè a fènli on ba houl.

²² Da kassénaï baï ko̱ mi sél oui an bil békéfèn tou, da ouime tèn ba koï a Ouone, léna abaï ba baï wala mone baï bi baï a Ouone da sèkèrèkè ba yana kambèlè.

²³ Baï ko̱ cho̱ko̱kè a békéfèn ba houl; da toul ndo̱ko̱ ka bavè a Ouone ba yana kambèlè ka bila Christ‐Jésus, Nanjou na.