Romainli 15 - Féké Testament 1947

¹ Da na on ko̱ mi njèrèn ta, dadaon an name hol fèn ko̱ ta toula hèfèrè njoukou, da tane ti ba baï bina wélé toul kli‐mona fèna ya.

² Dadaon an njoukou mane mbéo mbéo bon an woro na mi bi wélé toula ba nè baï toul bèlafèn ko̱ ma pou monè.

³ Baï ko̱ Christ mi tane ga bi ba wélé toulè fènè ya, da mahana ko̱ mi dé: Poukounafèn on ko̱ klime poukou mo mi lé ba touli.

⁴ Baï fènli bon ko̱ mi dé jinguèl ka tang ambèl, on mi dé baï to̱ko̱na hi na. Mono on, ka mboro laïnabi, da ka mboro ikina go̱ro̱ ko̱ Takarata a Ouone mi hi an name jing oliya.

⁵ Da kassénaï, Ouone a laïnabi da ikina go̱ro̱, kème hi oui baï an ouime kèrè té bil hang mabahana jing hana ka mbora Christ‐Jésus.

⁶ Baï an oui bon ka go̱ro̱ mbéo mi jone Ouone da Baba a Nanjou na Jésus‐Christ jing hana ka njaka mbéo.

⁷ Mono baï on oui pame hana, mahana ko̱ Christ mi ndé pame oui kéng, baï jonafèn a Ouone.

⁸ Baï ko̱ mè sa, mi hi Christ tèn ba njou‐bakara a njou‐ina gassali baï toul babaï a Ouone. Mono on an kème ma baï pouna bi bina gonjakali on ko̱ Ouone mi hi tangko nali tèn ba babaï.

⁹ Da mèran gentili mi jone Ouone baï toul ndingna haïo nè, mahana ko̱ mi dé: Mono on, yé mè ma sa bi kala toulo̱ an wora mèran pime pouli, Da mè ma di sing ka ba ling‐o̱.

¹⁰ Da kème kaïn sa ba aféké: Oui mèran pime pouli, oui jangndaï jing njoukou nèli!

¹¹ Da aféké: Oui mèran pime pouli bon, oui jone Nanjou, Da yé njoukouli bon mi jone nè guè siya!

¹² Da Ésaïe mi ndé sa on kéng: Yé saonkè ma tèn kala ka Isaï, Da kè on ko̱ ma ourou siya baï name gangna toula mèran pime pouli; Yé mèran pime pouli ma oli nè.

¹³ Da kassénaï Ouone oliya on mi kon oui ka mba ka jangnandaï bon tèn go̱ro̱ iki ka mboro tounassaon, baï an ouime oli guèbambèl ka njèran a Saint‐Esprit!

¹⁴ Da on mi kara mi kéng yine nili, ko̱ go̱ro̱ baï fèn baï mi mba ka bèlafèn bon da mba ka tounafèn bon, da ouime ndé ma baï wara hana kéng.

¹⁵ Da toul baï aféké mbéo mbéo, mè dé takarata ndot hi oui, baï déouna laou baï ba aféké, toul ndingna mbo̱l, ko̱ Ouone mi hi mi.

¹⁶ Mono on, an mème tèn ba njou‐bakara a Christ‐Jésus hi mèran gentili, mahana ka pina sacrificateur, baï sana mboura bèlabaï a Ouone an gentili mi tèn ba offrande on ko̱ mapélékè, baï ko̱ Saint‐Esprit mi ko̱ wal kli bi aï a Ouone.

¹⁷ Mono on, jonafèn ni ka ba bila Christ‐Jésus, da fènli on ko̱ ba a Ouone.

¹⁸ Baï ko̱ mè ma sana baï toul fèna aféké tane tiya bo̱l ba fèn on ko̱ Christ mi nding baï ni, baï miran gentili baï lana baï ka mboro baïnjaka, da ka mboro ndingna fèn.

¹⁹ Jing njèran a fèn to̱ko̱nakèli tèn fèn sakamli ka mboro njèran a Esprit a Ouone, mono on mè tissaonkè an pou Jérusalem da an bil sél koukoula afékéli ko̱ mi diya an bèlkè bo̱l tèn an guèl Illyrie, da mè sa mboura toul bèlabaï a Christ yaïli manguèl bon.

²⁰ Ka babaï, mè nza mborokè baï sana mboura bèlabaï an guèl on ko̱ klime tane ga di ling a Christ an ndourou jinguèl ya, baï an mème za voulou bi toul bètè a njoukou aféké ya.

²¹ Da mahana ko̱ mi dé: Kli on ko̱ mi tane ga sa baï mè hi kli ya, yé kli ma ko̱, Da kli on ko̱ mi tane ga la ya, yé kli ma tou bon.

²² Mono on, ko̱ mi dèn mi guèbassoko baï guèna mone baï name bon.

²³ Da kassénaï guèl tane ti bil pou aïn ba aféké ya tou, da ma sakali nyèta kassénaï ko̱ mème bi hang ni nyèta baï guèna mone baï,

²⁴ da ko̱ mème guè séna guèl Espagne, mè oli baï ko̱na oui baï an ouime ba mi bi domboro baï séna guè ndourou, afal on ko̱ mème so̱ro̱ jing oui, da go̱ro̱ ni mi vo païn tou.

²⁵ Da kassénaï mè ma sé guè pou Jérusalem, baï ndingna bakara jing njou‐lana‐bilaouli.

²⁶ Baï ko̱ njoukouli an guèl Macédoine tèn guèl Achaïe ko̱ on bèl mone kli ta, baï pina toul ndo̱ko̱ hanali hi foïna njoukouli an wora njou‐lana‐bilaouli on ko̱ mi kaou an pou Jérusalem.

²⁷ Ka babaï, klime ko̱ on bèl mone kli ta, da kli ba njou‐ko̱dali jing kli. Da tokoré mi nding Gentili tèn ba ndo̱ko̱ba fèn a Esprit, dadaon an klime jing bakara hi Juifli jing fèn naïn‐mondi.

²⁸ Mono on, afal ko̱ mème nding fèn aïnli o̱tou, ka hi toul ndo̱ko̱ bon hi kli tou, yé mè ma sé guè mone baï, baï tana sé guè guèl Espagne.

²⁹ Da mè toutou ko̱ mème guè mone baï, yé mè ma guè jing mbana samnafèn a Christ.

³⁰ Da mè sa jo̱jo̱ baï, yindi, ka mbora Nanjou na Jésus‐Christ da ka mboro sénahang a Esprit, oui laïbi hiouna Ouone kon touli jing mi,

³¹ an mi lé mbèli an ndo̱ka kli on an guèl Judée, ko̱ mi kaou didissi, da an ndingna bakara ni ko̱ mana baï a pou Jérusalem mi mapélékè baï a njou‐lana‐bilaouli on ko̱ mème guè séna rou hi kli.

³² Mono on, an mème guè mone baï ka jangnandaï, tokoré on mi na mara fal toula Ouone, da an mème yan tana ni jing oui an mone baï.

³³ An Ouone a go̱ro̱ iki mi kaou jing oui bon! Amen!