Romainli 12 - Féké Testament 1947

¹ Mono on yindi, mè sa jo̱jo̱ baï, ka mboro haïo a Ouone, oui hi kli‐mone baï hi Ouone mahana ka sacrifice ko̱ yan, tangna fofoto, ko̱ mi mapélékè jing Ouone, on ko̱ ba bouna fal fèn aïn ko̱ mi mangna oui.

² Da oui tane féré laou baï ka mbora sakanaï ya, da oui komo, baï an ouime kaïn tèn jing féké laou‐kèrafèn, mono on, an ouime lé baï touna fèn on ko̱ mi na mara fal toula Ouone, fèn on ko̱ bèlta da mapélékè jing nè, da na guédék.

³ Mbo̱l ndingna mbo̱l on ko̱ mi hi mi, mè sa hi oui mane mbéo mbéo bon, ko̱ ka u jing oui, an kème bi hang‐è fènè ka tane joung monè ta guèlkè ya, da kème bi hang‐è baï bouna monè guè koukoula, mabong tounassaon on ko̱ Ouone mi lé hi njoukouli mane mbéo mbéo bon.

⁴ Baï mahana ko̱ name jing fèn kli monali nyèta an bil kli‐mone mbéo, da fèn mondi bon mi tane ga nding pina mabahana ya.

⁵ Mono on, na on ko̱ mi nyèta, na ba kli‐mone mbéo bo̱l, ka bila Christ, da na mane mbéo mbéo bon ba fèn mone mbéo jing hana.

⁶ Da baï ko̱ name jing toul ndo̱ko̱ toutoul ka mboro ndingna mbo̱l on ko̱ mi hi na, kong ba ka mboro baïnjaka on ko̱ Ouone mi pi, dadaon an name to̱ko̱ bong njaka Ouone mabong tounassaon na,

⁷ maléba pina, dadaon an name bi hang na toul pina aïn; maléba kè on ko̱ to̱ko̱ fèn, dadaon an kème bi hang‐è ba toul to̱ko̱nafèn nè;

⁸ maléba kè on ko̱ mi wara, dadaon an kème bi hang‐è ba toul warafèn amè; maléba kè on ko̱ mi hi fèn, dadaon an kème hi ka laou‐è; maléba kè on ko̱ mi obong fèn, dadaon an nonè mi sènta jing rou. Kè on ko̱ mi nding haïo, dadaon an kème nding ka wala.

⁹ Oui yèng an sénahang abaï mi tèn ba gba sénahang ka laou. Oui pong békéfèn ka foura mone; oui ching fèn on ko̱ bèlta.

¹⁰ Baï toul sénahang hana yindi, hang baï mi na toul hana nyèta; baï toul dikna, oui dik yine baïli ta mone baï fèn baï.

¹¹ Ka mboro sèna none ndingna fèn, oui tane yan mone jing rou ya. Laou baï mi zang bèlta. Oui kaou koï hi Nanjou.

¹² Ka mboro oliya oui kaou ka wala. Oui joung hang baï an bil to̱ko̱nassé. Oui laïbi hiouna Ouone.

¹³ Oui hi fèn mone baïli, ko̱ mi nak njou‐lana‐bilaouli hi kli. Oui nding ko̱ko̱ guèbassoko.

¹⁴ Oui same kli on ko̱ mi sène oui, oui same kli bèlta ka tane kèkè kli ya.

¹⁵ Oui jangndaï jing kli on ko̱ mi jangndaï; da oui lé léou jing kli on ko̱ mi yé léna léou.

¹⁶ Oui kèrè té bil hana mabahana. Oui tane bi hang baï toul loukou fèn ya, da sé fal kli on ko̱ mi kaou lome. Oui tane bi hang baï toul tounafèn abaï fèn baï ya.

¹⁷ Oui kaïn ka nding bèlya jing njoukou on ko̱ mi nding bèlya jing oui ya. Oui bi hang baï baï ndingna fèn on ko̱ bèlta an nona njoukouli bon.

¹⁸ Tokoré mi mabongkè baï no mana ndourou baï kaouna ka go̱ro̱ iki jing njoukouli bon.

¹⁹ Yindi on ko̱ mème sé hang baï ta, oui tane féré gnana abaï fèn baï ya, da oui yèng mboro hi hèrè a Ouone; baï ko̱ mi dé: Nanjou mi sa: Baï ni baï féra gnana, yé mème ko̱ féré gnanakè.

²⁰ Da mono, tokoré nzala mi i bakèo̱ jing mo mo hi laka hi nè; da tokoré po̱ko̱ mbi mi i nè, mo hi mbi njona hi nè; baï ko̱ tokoré mome nding on, yé mo ma mang kèngnènrèn hèlè kon toulè.

²¹ Mo yèng an békéfèn mi tane ta toulo̱ ya, da mo ta toul békéfèn jing bèlafèn.