Romainli 11 - Féké Testament 1947

¹ Mono on mè sa: Ouone njomo njoukou nèli tou lé? Tane ti on ya! Baï ko̱ mè ba ndé njoukou a Israël kéng, ko̱ ba mèran Abraham, ka douk a Benjamin.

² Ouone mi tane ga njomo njoukou nèli ya, kli on ko̱ kème toutou kli ka tang ambèl, maléba oui tane ga tou baï on ko̱ Takarata a Ouone mi sa ka njaka Élie ya lé? ka mboro on ko̱ kème hiou Ouone kon toula Israël, ka sa:

³ Nanjou, kli i prophète noli, ka bèngnèrèn autel noli kon koukoula; pane ba mè ka ho̱ko̱ ni on, da klime ndé nza yana ni kéng.

⁴ Da Ouone féré ka sa ba fèn hi nè lé? Mè pèng njoukouli mane ténakè‐bongkè‐difala‐séré baï ni fèni, ko̱ klime tane ga houkou an mbèla Baal ya.

⁵ Mono mabahana on kassénaï hanali mbéo mbéo mi pane ka mboro on ko̱ Ouone mi sane kli mabong ndingna mbo̱l.

⁶ Da tokoré on mi yé ka ba mboro ndingna mbo̱l on mi tane ti ba baï pina ba aféké ya, maléba ndingna mbo̱l mi tane ti ba ndingna mbo̱l ba aféké ya. Da tokoré mi yé ka ba mboro pina, on mi tane ti ba ndingna mbo̱l ya, maléba pina mi tane ti ba pina ya.

⁷ Aféké ba fèn lé? Fèn on ko̱ Israël mi nza, kè tane ga jing fèn on ya, da njoukouli on ko̱ Ouone mi sane kli ba amè tou, mi jing fèn on, da go̱ra garakèli na wang.

⁸ Mahana ko̱ mi dé: Ouone mi hi esprit nana name hi kli, Kè hi none kli baï an klime tane ko̱ guèl ya, Da hi soukou kli baï an klime tane la baï ya, Bo̱l tèn kassénaï.

⁹ Da David mi sa: Yèng table kli mi hol ba ndaou hi kli, Da ri ko̱ bi kli, da fèn bèna, ko̱ ba fèn féra gnana kli!

¹⁰ An none kli mi foukourou baï an klime ko̱ guèl ya. Ko̱ kaïn kli mi biri kambèlè!

¹¹ Mono on, mè sa: Klime bèn baï an klime lé lé? Tane ti on ya! Baï ko̱ klime lé, yana‐baï‐toul mi gui mona mèran gentili baï zara kli an klime passèra.

¹² Da tokoré léna akli mi hi nguèra hi njou‐koukoulali, da fèn on ko̱ klime pènrèn tou, mi hi nguèra hi mèran gentili, yé komona mboro kli ma hi nguèra ta guèbambèl hi kli ya lé?

¹³ Da mè sa baï hi oui on ko̱ ba Gentili; ko̱ mè ba njou‐mboro‐pina a mèran gentili mè jone bong bina ni.

¹⁴ Mono ka touya mè ma zara mèran njou‐naïn monili an klime passèra, da mè ma kou hanali an woro kli.

¹⁵ Baï ko̱ tokoré baï njomona kli mi tèn ba baï ko̱na ndo̱ko̱ fal hana a njou‐koukoulali jing Ouone baï yana kli aféké ba fèn lé? on ba yana an wora houli ya lé?

¹⁶ Da tokoré titili lénakèli mi na ba tangna fofoto, yé garakè bon ba tangna fofoto kéng; da tokoré saonkè mi yé ba tangna fofoto wana ndo̱ko̱kèli ba tangna fofoto kéng.

¹⁷ Da tokoré mi koung wana ndo̱ko̱kè hanali tou, da mo ko̱ ba di olivier woropa, mi ba mo mbo̱lo̱ jing kli, da mome gui ba mbé saonkè jing kli, da jing nome di olivier on.

¹⁸ Mo jone mono an wana ndo̱ko̱kèli on ya. Da tokoré mome jone mono fèno, tane ti ba mome ko̱ hol saonkè ya da ba saonkè mi ko̱ ho̱l mo.

¹⁹ Mono, yé mo ma sa: Mi koung wana ndo̱ko̱kèli baï an mi ba mi mbo̱lo̱ jing rou.

²⁰ On bèlta; ko̱ mi koung kli guèfal baï ko̱ klime kaou ka ndouri da amo, mo o mbo̱l tounassaon no. Mo tane kèrè joungna mono ya, da ngou waou.

²¹ Da tokoré Ouone mi tane ga mbé dodok wana ndo̱ko̱kèli jinguèl ya, yé kè ma ndé mbé mo ya kéng.

²² Mono mo ko̱ bèla go̱ro̱ da pouna go̱ra Ouone: ko̱ mi pou go̱rè jing kli on ko̱ mi lé, da bèla go̱ra Ouone jing mo tokoré mome bi ka mboro bèla go̱rè pou; maléba kè ma ndé koung mo guèfal kéng.

²³ Da ndé kli kéng, tokoré klime tane ga pane kaouna ka ndouri akli ya, yé ma ba kli mbo̱lo̱ bi bilkè; baï ko̱ Ouone ma baï bana kli mbo̱lo̱ bi bilkè ba aféké.

²⁴ Baï ko̱ tokoré mi koung mo guèfal an di on ko̱ ba di olivier woropa ka bo̱ko̱dikè, da ba mo mbo̱lo̱ bi jing bèla di olivier, on ko̱ bo̱ko̱dikè ka toul, kli on ko̱ ba dodok wana ndo̱ko̱kèli ka bo̱ko̱dikè yé ma ba kli mbo̱lo̱ bi jing dodok di olivier nyèta guèbambèl ya lé?

²⁵ Baï ko̱ mè ji an ouime toutou didissi baï on yindi, mono an ouime tane bi hang baï toul tounafèn abaï fèn baï ya, baï ko̱ go̱ra njoukou hanali an wora njou‐Israëli mi na wang bo̱l tèn ko̱ Gentili mi mba bilkè nyè mabongkè tou.

²⁶ Da mono on, yé Israël bon ma kou mahana ko̱ mi dé: Yé njou‐yana‐baï‐toul ma tèn gui ka Sion, Da yé kè ma kon baï pongna Ouone an bila Jacob guèfal;

²⁷ Da on ba bina gonjaka ni an none hana jing kli, Ko̱ yé mè ma kon békéfèn klili pa.

²⁸ Baï toul bèlabaï kli ba bakèlio̱ baï toul baï; da ka mboro on ko̱ Ouone mi sane kli, kème sé hang kli ta baï toula titili tangkoli.

²⁹ Baï ko̱ toul ndo̱ko̱li a Ouone da dina on ko̱ kème di njoukouli mi tane ma baï komonakè ya.

³⁰ Baï mahana ko̱ oui fa njaka Ouone jinguèl, da kassénaï oui jing haïo ko̱ klime kaou ka ndouri.

³¹ Mono on kéng mahana ko̱ klime fa baï kassénaï, baï an klime ma baï ndé jingna haïo kassénaï kéng, ka mboro haïo on ko̱ mi nding hi oui.

³² Baï ko̱ Ouone mi tou kli bon bi an bil kaouna ka ndouri, baï an klime nding haïo hi kli bon.

³³ O dina saon nguèra cho̱kna da tounafèn a Ouone nyè maïya! Guème ko̱ ma baï touna saon walabaï a Ouone ndé? da guème ko̱ ma baï touna saon mboro fèn ndingna nè an hane dé?

³⁴ Baï guème ko̱ toutou laou‐kèrafèn a Nanjou lé? Maléba guème ko̱ wara nè jinguèl lé?

³⁵ Maléba guème ko̱ hi fèn hi nè ka titilikè, ba yé kè ma féré toul ndo̱ko̱ hi nè lé?

³⁶ Baï ko̱ fènli bon mi gui ka monè, da fènli bon mi gui ka mboro nè, da fènli bon ba amè. Mi hi jonafèn hi nè, kambèlè! Amen!