Romainli 1 - Féké Testament 1947

¹ Paul, koï a Jésus‐Christ, ko̱ Ouone mi di nè ba njou‐mboro‐pina, da walè bi baï bèlabaï a Ouone,

² Bèlabaï on ko̱ kème bi gonjakè jinguèl ka mbora prophète nèli an bil tangna fofoto Takarata a Ouone,

³ baï toula Goune nè ko̱ tèn ka mèran David ka mboro naïn‐mone.

⁴ Kè on ko̱ mi badi ba Goune a Ouone, jing njèran ka bong esprit a tangna fofoto go̱ro̱, ka mboro tomnahoulkè an wora houli, Jésus‐Christ Nanjou na,

⁵ mbo̱lkè da name jing ndingna mbo̱l da pina a njou‐mboro‐pina, baï jingna njoukouli an wora mèran pime pouli bon an klime la ka mboro tounassaon, baï toul ling‐è.

⁶ Da an woro kli on Jésus‐Christ mi ndé di oui kéng.

⁷ Mème pi takarata aïn hi kli on bon ko̱ bi an pou Rome, kli on ko̱ Ouone mi sé hang kli ta, da di kli ba njou‐lana‐bilaouli: An Ouone Baba na da Nanjou Jésus‐Christ mi hi ndingna mbo̱l da go̱ro̱ iki hi oui!

⁸ Ka titilikè, mè kaou koukoula hi Ouone ni, baï toul baï bon, ka mbora Jésus‐Christ, baï ko̱ klime sa toula tounassaon a baï ko̱ mi ti manguèl an mona njou‐koukoulali bon.

⁹ Baï ko̱ Ouone ko mème nding bakara hi nè, ka laou ni baï toul bèlabaï a Goune, nè, mi ko̱ sa bongbaï ni, ko̱ mème hanran di ling baï guèbassoko ko̱ mème hiou nè.

¹⁰ Mè sa jo̱jo̱ a Ouone, baï ko̱ tokoré mi na mara fal toulè kassénaï, kème bourou domboro hi mi, an mème guè mone baï, ka name hana.

¹¹ Baï ko̱ mème bi hang ni baï ko̱na oui nyèta, mono on an mème hi toul ndo̱ko̱ a Esprit hanali hi oui, an mone baï mi pou oui.

¹² On mi sa, an name bi hang na guè tiya jing hana, an woro baï ka mboro tounassaon, ko̱ name do̱li hi hana mane na bon, abaï tèn ami.

¹³ Yindi, mè ji an ouime toutou, ko̱ mème badi bo̱ko̱ nyèta jinguèl, baï guèna mone baï, an mème ndé jing lénakè an woro baï kéng, mahana ka on an wora mèran pime pou afékéli; da mi dèn mi bi bo̱l tèn kassénaï.

¹⁴ Mé ba njou‐ko̱da jing Grecli da ndé jing njou‐woro pali mabahana kéng, jing chokna njoukouli da jing njou‐ngawali mabahana.

¹⁵ Mono mè bi hang ni maïya baï sana mboura bèlabaï hi oui kéng ko̱ bi an pou Rome.

¹⁶ Baï ko̱ chonron tane ga sé mi baï a bèlabaï ya, baï ko̱ on ba njèran a Ouone, baï jingna yana‐baï‐toul hi njoukouli on bon ko̱ mi la bilaou, da hi Juifli ka titilikè da ndé hi Grecli kéng.

¹⁷ Baï ko̱, an bil baï on, mi to̱ko̱ guédék a Ouone bi kala mbo̱l tounassaon mi kan tounassaon, mahana ko̱ mi dé: Da yé njou‐guédék ma yan mbo̱l tounassaon.

¹⁸ Baï ko̱ hèrè a Ouone mi tèn gui ka nonkala, ka diri kon toul pongna Ouone bon, da ndingna maï maï a njoukouli bon on ko̱ mi moungnourou mboro babaï, ka mboro ndingna maï maï aklili,

¹⁹ baï ko̱ fèn a Ouone ko̱ njoukou mi ma baï tounakè mi wéré nonkè bi kala an woro kli, baï ko̱ Ouone mi to̱ko̱ on hi kli tou.

²⁰ Baï fèn nèli on ko̱ none mi tane ko̱ ya, njèran nè kambèlè da Ouone nè, njoukou mi tissaon baï ko̱na on tang guédék jinguèl ka titili name mossona koukoula, baï ko̱ njoukou ko̱ on ka mboro fèn on ko̱ kème mosso, mono on kli tane ga ma baï pariyabaï ya.

²¹ Da ko̱ klime tou Ouone tou, kli tane ga jone nè mahana ko̱ kè ba Ouone ya, maléba kli tane ga kaou koukoula hi nè ya; da baï ko̱ kèrafèn kli mi wol tou, da go̱ro̱ kli mi na ba ngawa, klime bine an bil yilime.

²² Kli joung mone kli, ka kèrè ba klime cho̱kta da klime tèn ngawa;

²³ da klime komo jonafèn a Ouone on ko̱ mi ba poumna tane tiya, tèn tétéme a njoukou on ko̱ poume, ndo̱ïli, da naïnli ko̱ bo̱ko̱ kli nèng, tèn saïnli on ko̱ koro.

²⁴ Baï fèn on mi ko̱ Ouone yèng kli bi, baï ndingna ladidifèn ko̱ ma nzala go̱ro̱ kli; baï an klime nding fèn chonron an woro kli‐mone kli jing hana;

²⁵ baï ko̱ klime komo babaï a Ouone ba fèn wo̱ko̱, da klime hiou da nding bakara hi ba fèn mossona ta Njou?-?mossonafèn, kè on ko̱ jing samnafèn kambèlè. Amen!

²⁶ Baï fèn on mi ko̱ Ouone yèng kli bi béké nzala naïn‐mone; baï ko̱ waïn klili mi komo kli‐mone kli toutoul jing bo̱ko̱di akli;

²⁷ tèn wonron njoukouli kéng, baï ko̱ klime yèng baï ndingna fèn jing waïn kli ka mborokè bèlta, da nzala mi i kli jing hana mahana ka hèlè an mona ndo̱ko̱ba klili, wonron njoukouli mi nding fèn chonron jing wonron njoukouli, da klime jing chokokè an mone kli ko̱ mabong ndingna maï maï akli.

²⁸ Da mahana ka on ko̱ klime tane ga ji baï touna Ouone ya, Ouone mi yèng kli bi laou‐kèrafèn on ko̱ mi tane mabongkè ya, baï ndingna fènli on ko̱ ba chonron.

²⁹ Kli mba rou ka ndingna maï maï bon, békéfèn, fanahang béké go̱ro̱, go̱ro̱ mi mba jing sènafèn, ina njoukou, njakana, mongnafèn, sèna bo̱ko̱ go̱ro̱;

³⁰ kèkènafèn, fana baïli, jèkna Ouone, béké baïli, gnaïnali, joungna mondi, kèra békéfènli, fana bo̱ko̱ njaka baba da ma kli,

³¹ tane touna fèn ya, séla bina gonjakali jing hana, tane séna hang ndo̱ko̱ba klili ya, ka tane nding haïo ya.

³² Kli on ko̱ mi toutou walabaï a Ouone ko̱ kli on ko̱ mi pane ndingna fèn mahana ka on mi ma houl, da kli ma baï ndingna ba fèn on ka ho̱ko̱ kli tane tiya, da kli ndé ji bo̱ko̱kè jing njoukouli on ko̱ mi nding fèn mahana ka on.