Philippienli 4 - Féké Testament 1947

¹ Mono baï on, yindi ko̱ mème sé hang baï ta, da mème bi hang ni toul baï maïya, oui ba jangnandaï da mbélé couronne ni, oui laïbi pou mahana on ka bila Nanjou, yindi ko̱ mème sé hang baï ta.

² Mè wara Évodie da mè wara Syntyche, an klime kèrè té bil hana mahana ka bila Nanjou.

³ Babaï da mème ndé sa jo̱jo̱ no kéng, njou‐ndo̱ko̱ba ni lodok, mo lé mbèla waïn aïnli baï ko̱ klime lé mbèli baï bèlabaï jinguèl, tèn Clément kéng, da tèn gara ndo̱ko̱ba ndingna pina nili kli on ko̱ ling kli mi dé bi takarata yana kambèlè.

⁴ Oui jangndaï ka bila Nanjou guèbassoko, da mème kaïn dala bongkè hi oui, oui kaou ka jangnandaï.

⁵ Oui yèng an njoukouli bon mi toutou pana go̱ro̱ baï, Nanjou mi hèdi tou.

⁶ Oui bi hang baï toul fèna mbéo ya, da toul fènli bon ko̱ ouime ji oui to̱ko̱ hi Ouone ka mboro hiouna nè, ka sa jo̱jo̱ nè, ka jone nè.

⁷ Da yé go̱ro̱ iki a Ouone, ko̱ mi ta toul tounafèn bon ma guéré go̱ro̱ baï tèn kèrafèn abaï ka bila Christ‐Jèsus.

⁸ Mono baï toul gara baï on yindi, fèn mi ko̱ ba babaï, fèn mi ko̱ ba fèn dikna, fèn mi ko̱ ba guédék, fèn mi ko̱ na tangta, fèn mi ko̱ ba sénahang, fèn mi ko̱ bèla tiri baïli kon toulkè, da tokoré mbonatoul mana, da mi ma baï jonakè, oui bi hang baï toul fènli on.

⁹ Oui nding fèn on ko̱ oui mi tou bongkè, da ya, da la, da ko̱ an bili tou. Da yé Ouone a go̱ro̱ iki makaou jing oui.

¹⁰ Da mè jangndaï nyèta ka bila Nanjou, baï ko̱ kassénaï oui bi hang touli ba aféké nyèta; da ka babaï oui kèrè ka laou baï ambèl da mborokè baï ndingnakè mi tane tiya.

¹¹ Ti baï an mème sa toul fèna ko̱ mi nak mi ya, baï ko̱ mème toutou baï kaouna bèlta ka sakanafèn jing mboro fèn on ko̱ mi tèn mi.

¹² Mè toutou mboro kaouna sé da mème ndé toutou mboro jingna fènli nyèta kéng. Jing fènli bon da an wora njoukouli bon, mè toutou mbana da mème toutou nzala, mè toutou jingna fènli nyèta da mème toutou foïna.

¹³ Mè ma baï ndingna fènli bon ka bila kè on ko̱ mi hi njèran hi mi.

¹⁴ Da mono on, oui nding bèlta jinguèl ko̱ oui mi vo jing mi an guèl to̱ko̱nassé.

¹⁵ Da oui fèn baï mi ndé toutou kéng oui njou‐Philippienli, ko̱ ka titili sana bèlabaï ko̱ mème ourou an guèl Macédoine, église hana mbéo tane ga chome bo̱ko̱ jing mi toul baï hina fèn maléba yana fèn ya, bo̱l ba oui ka ho̱ko̱ baï.

¹⁶ Da tongna an pou Thessalonique oui pi fèn on ko̱ mi nak mi guè hi mi bo̱ko̱ mbéo da ndé pi ba an bo̱ko̱ sérékè.

¹⁷ Tane ga ti ba ko̱ mème nza toul ndo̱ko̱ ya, da mème nza lénakè on ko̱ ma taïn nguèra abaï kon.

¹⁸ Da mème jing fènli bon ta toulkè tou. Fèn nili mi nyè maïya ko̱ mème ya an ndo̱ka Épaphrodite fènli on ko̱ oui mi pi gui hi mi mahana ka yombo ko̱ baïnkè fon bèlta, da sacrifice on ko̱ mapélékè jing Ouone, da ko̱ mi bi wélé toulè ta.

¹⁹ Da yé Ouone ni ma hi fèn mone baïli bon hi oui ko̱ mi nak oui, mapélékè nguèra nè jing jonafèn ka bila Christ‐Jésus.

²⁰ Mi hi jonafèn hi Ouone Baba na kambèlè go̱ kambèlè! Amen!

²¹ Oui name njou‐lana‐bilaouli bon ka bila Christ‐Jésus. Yindi on ko̱ kaou jing mi mi name oui bèlta.

²² Njou‐lana‐bilaouli bon an guèl aïn mi name oui, da kli on ko̱ kaou an bil voula César mi name oui nyèta.

²³ An ndingna mbo̱l a Nanjou na Jésus‐Christ mi na jing esprit abaï.