Philippienli 1 - Féké Testament 1947

¹ Paul kira Timothée, njou‐koïli a Christ‐Jésus, mi pi takarata aïn hi njou‐lana‐bilaouli bon an bila Christ‐Jésus ko̱ bi an pou Philippes, jing njou‐ona toul pinali a église da njou‐bakara a église.

² An Ouone Baba na da Nanjou Jésus‐Christ mi hi ndingna mbo̱l da go̱ro̱ iki hi oui!

³ Mè kaou koukoula hi Ouone ni guèbassoko, ko̱ mème bi hang ni toul baï.

⁴ Ko̱ mème sa jo̱jo̱ Ouone baï toul baï bon, mè sa jo̱jo̱ nè ka jangnandaï guèbassoko,

⁵ baï ko̱ oui mi chome bo̱ko̱ pina bèlabaï jing mi, ka titilikè bo̱l tèn kassénaï.

⁶ Go̱ro̱ ni mi iki toul fèn aïn baï kè on ko̱ mi tissaon bèla pina aïn an bil baï, yé kè ma nding fèn aïn guédék bo̱l tèn name a Jésus‐Christ.

⁷ On mi na guédék ko̱ mème bi hang ni mahana ka on toul baï bon, baï ko̱ oui mi na hang ni, da toul kaouna jo̱bo̱ ni, da baï ko̱ mème guéré bèlabaï pou bi, da mi na ba babaï, oui bon mi ya mbé ndingna mbo̱l o̱kéo̱ jing mi.

⁸ Baï ko̱ Ouone mi sa bongbaï ni baï ko̱ mème bi hang ni toul baï bon nyèta ka bèla haïo a Christ‐Jésus.

⁹ Da mème hiou Ouone kon toul baï aïn an mi ma an sénahang abaï mi taïnkon guèbassoko ka tounafèn da walabaï.

¹⁰ Mono on, an ouime ma baï léna fènli ka toul sél kakaïyakè, baï ko̱ oui mi kaou déléng da baï ko̱ tènrèn none ndingna fèn abaï mi na bèlta bo̱l tèn name a Christ.

¹¹ Da an ouime mba ka léna a guédék on ko̱ mi ba ka mbora Jésus‐Christ, baï hina jonafèn ka jone Ouone.

¹² Yindi, mè ji ba an ouime toutou fèn on, ko̱ mi tèn mi, mi ko̱ yé yaïli bèlabaï, da on mi tane ga dèn mborokè ya.

¹³ Mono tourougouli bon an njaka voula nanjoukaou tèn gara njou‐afékéli bon, mi toutou ko̱ mè ba njou‐jo̱bo̱ baï toula Christ.

¹⁴ Da yindi nyèta ka bila Nanjou, go̱ro̱ kli mi vo baï toul jo̱bo̱ ni, da klime noung sél ta guèbambèl baï sana baïnjaka a Ouone ndo̱t tane waou.

¹⁵ Ka babaï, njoukou hanali mi sa mboura Christ ka fanahang da nzana baï, da afékéli mi sa mboura baï ko̱ mi na hang kli bèlta.

¹⁶ Da kli on ko̱ mi sa mboura ka sénahang kli sa baï ko̱ klime toutou ko̱ mi hi mi baï guéré bèlabaï pou bi.

¹⁷ Da afékéli on ko̱ mi nza baï, kli ji baï sana mboura Christ ka laou ko̱ ba babaï ya, da klime kèrè baï taïna to̱ko̱nassé ni kon an bil jo̱bo̱.

¹⁸ Baï on ba fèn lé? Sana mane mboro bon, ka mboro séna fong rou maléba ka mboro babaï, kli mi sa mboura Christ da baï on mè jangndaï da yé mè ma jangndaï jing rou.

¹⁹ Baï ko̱ mème toutou ba fèn aïnli ma féré baï ni ba yana‐baï‐toul, mbo̱l sana jo̱jo̱ Ouone abaï da lénambèl a Esprit a Jésus‐Christ.

²⁰ Ka mboro douna go̱ro̱ ni jing fèn on ko̱ mème oli, baï ko̱ yé chonron ba séna mi tane tiya, da tane waou ndo̱t kassénaï mahana ka guèbassoko mè ji jona Christ ka bil kli‐moni, tongna mème yan, maléba tokoré mème hou;

²¹ baï ko̱ an noni, baï kaouna ka none ba Christ, da baï houl ba jingnafèn.

²² Da tokoré mème kaou ka none ka naïn‐mone ndingna pina ni mi lé lénakè, mono mème tane tou fèn on ko̱ laou ni mi ji name rou ya.

²³ Da mè kaou hanguèl zéng fèn aïnli séré; mè ji oura ka sé kaou jing Christ, baï ko̱ fèn on mi bèl maïya;

²⁴ da baï kaouna ka naïn‐mone mi bèl maïya baï toul baï.

²⁵ Da baï ko̱ go̱ro̱ ni mi vo jing rou mè toutou yé mè ma kaou ka none ka laïbi rou jing oui bon, an ouime taïn kon guèbambèl jing tounassaon da jangnandaï,

²⁶ baï an jangnandaï abaï baï touli mi ti guèbambèl an bila Christ‐Jésus, baï ko̱ yé mè ma kaou jing oui ba aféké.

²⁷ Dadaon bong séna abaï mi mabong bèlabaï a Christ, baï ko̱, tokoré mème guè baï ko̱na oui, maléba mème tane tiya, mè voro baï lana bong pina abaï ko̱ oui mi laïbi jing esprit mbéo, ka laou mbéo ka chomna bo̱ko̱ tounassaon bèlabaï jing hana.

²⁸ Da an bakèlio̱ jing oui mi hi waou hi oui toul fèna mbéo ya, baï fèn on ko̱ mi na jing kli ba fèn houl an guèl hèlè, da abaï ba yana‐baï‐toul, da on mi gui ka Ouone.

²⁹ Da mi hi baï a Christ hi oui, ti ba baï lana nè bilaou ka ho̱kè ya, da baï ndé to̱ko̱nassé baï toulè kéng.

³⁰ Da oui pou bi, mahana ko̱ mème pou bi baï rounakè jinguèl, da kassénaï oui lala ko̱ mème pou bi jing rou.