Jude 1 - Féké Testament 1947

¹ Jude koï a Jésus‐Christ da yine a Jacques mi dé takarata aïn hi kli on ko̱ Ouone di kli tèn kala tou, da ko̱ Ouone Baba mi sé hang kli nyèta, da kè pèng kli ka bila Jésus‐Christ.

² An ndingna haïo da go̱ro̱ iki da sénahang mi gui mone baï ka taïnkon guèbambèl.

³ Oui on ko̱ mème sé hang baï nyèta, da ko̱ mème nza mborokè baï déna takarata hi oui toula yana‐baï‐toul ama bon, on kara mi baï déna hi oui, an mème wara oui baï laïnabi pouta an tounassaon ko̱ mi hi njou‐lana‐bilaouli ka mborokè bo̱ko̱ mbéo mapélékè baï kambèlè.

⁴ Baï njoukou hanali ko̱ro an woro baï ka foli, da kli mini ko̱ takarata mi wal baï kon toul kli jinguèl ka titilikè, njoukouli on ko̱ pong Ouone ko̱ ki ndingna mbo̱l an Ouone ama ba ladidifèn da kli pong njou‐to̱ko̱nafèn mbéo on ama ko̱ ba Nanjou Jésus‐Christ.

⁵ Baï on mè bi hang ni baï déouna laou baï, tongna ouime toutou fènli on bon ka mborokè bo̱ko̱ mbéo baï kambèlè ko̱ Nanjou mi kou mèran njoukouli on an koukoula Égypte, da afal da kè i kli on ko̱ tane ga la bilaou ya.

⁶ Da angeli on ko̱ tane ga pèng njaka bara akli ambèl ya, da yèng dodok guèl kaouna akli fèn kli, kè pèng kli jing sal réme kambèlè an bil yilime baï vora barabaï a loukou name.

⁷ Mahana ka pou Sodome da Gomorrhe da loukou pouli ndo̱ko̱ba pouli on, kli mahana ka njoukouli on ko̱ hi mone kli fèn kli tèn ba fèn ndingna rome, da sé fal goni naïn‐mone toutoul, da kli ba mèrènkè baï to̱ko̱na guèl hèlè kambèlè hi njoukouli, hèlè on ko̱ kli ma to̱ko̱ssé an ndourou baï ko̱ barabaï lé toul kli.

⁸ Da mahana on kli on kéng mi hi dakame hi naïn‐mone ka lo̱la akli, da kli pong njaka bara, da pouk jonafènli.

⁹ Da Michel archange, ko̱ kè fa baï jing zabolo da njaka baï toula kli‐mona Moïse, kè tane ma baï wala baï kèkènafèn kon toulè ya, da kè sa: Yé Nanjou fènè mi to mo!

¹⁰ Da kli on, kli kèkè fèn ko̱ kli tane ga tou ya, fèn on ko̱ klime tou ka naïn‐mone, mahana ka naïnli tane tounafèn ya, kli bo mone kli an bil fèn on.

¹¹ Go̱ro̱ séta mi ba baï a kli! baï ko̱ kli sé fal mboro a Caïn, da ngou fal baï maï maï a Balaam baï jingna fèn, kli hou an mboro nzaou a Coré.

¹² Kli ba kli on ko̱ ba fèn dakame an woro laka a sénahang abaï ko̱ kli son jing oui, njou‐kora badouali ko̱ mbé kli‐mone kli ka son ka mba tane waou. Kli ba yiri mbame, ko̱ ti jing mbi ya, koukouna kou kli toutoul; kli ba di ka njaka kéou ko̱ ti jing lénakè ya, houl bo̱ko̱ séré, lourou ka saonkèli;

¹³ kli ba wouna mbi mingta an loukou mbi tome; kli nding foura chonron akli bi kala; kli ba mèssè ko̱ sé maï maï da yirikè a yilime pèng kambèlè baï akli.

¹⁴ Da Enoch mèran difala‐sérékè a Adam ko̱ to̱ko̱ bong njaka Ouone hi kli kéng, ka sa: Mo ko̱ Nanjou fènè mi gui jing wil njou‐tangna fofoto nèli ro̱ko̱ta,

¹⁵ baï ko̱na barabaï toula njoukouli bon, da wéré békéfèn a njoukouli on bon ko̱ pong Ouone bi kala, ndingna pina akli bon ko̱ pong nè, on ko̱ kli nding ka mboro pongna njakè, da baïnjaka njèrènta bon ko̱ njou‐békéfènli on ko̱ pong Ouone sa kon toulè.

¹⁶ Kli ba njou‐gnonron fènli, njou‐go̱ro̱ sétali ko̱ sé fal nzala mone kli, da baïnjaka kli fong ndoïna, kli dik njoukouli baï jingna toul ndo̱ko̱li.

¹⁷ Da oui on, ko̱ mème sé hang baï nyèta, oui bi hang baï toul baïnjaka on ko̱ njou‐mboro pinali a Nanjou na Jésus‐Christ mi sa jinguèl,

¹⁸ ko̱ klime sa hi oui: Ka sèkèrè name yé njou‐gaïna njoukouli makaou, kli sé fal nzala akli ko̱ pong Ouone.

¹⁹ Kli ba kli on ko̱ joukourou njoukouli ka wal hana njoukouli an koukoula, kli tane ti ka Esprit ya.

²⁰ Da oui on, ko̱ mème sé hang baï nyèta, oui pou mone baï ka mboro tangna fofoto tounassaon abaï da hiou Ouone ka Saint‐Esprit.

²¹ Oui pèng mone baï an bil sénahang a Ouone, ka voro ndingna haïo a Nanjou na Jésus‐Christ baï yana kambèlè.

²² Oui nding haïo hi njou‐hanali ko̱ nding ka ndouri.

²³ Da oui kou hanali, oui ba kli an none hèlè; da afékéli oui nding haïo hi kli ka waou, oui jèk la on ko̱ ba dakame ka naïn‐mone.

²⁴ Da a kè on ko̱ ma baï guéra oui, an oui mi bèn ya, da bi oui an none jonafèn amè, ka rongo ka wal nyèta,

²⁵ an Ouone mbéo bo̱l njou‐yana‐baï‐toul ama, ka mbora Jésus‐Christ Nanjou na, jonafèn mi guè monè, da gangna njaka bara tèn njèran, da jinguèl ka titilikè bon da kassénaï da kambèlè! Amen!