Galateli 6 - Féké Testament 1947

¹ Yindi, tokoré oui mi ko̱ njoukouna ko̱ mi lé ka mboro békéfèn, oui ko̱ ba a Esprit, oui sé ka ki nè gui bèla mboro jing esprit ndingna pan bil. Dadaon njoukou mane mbéo mbéo bon mi ènrèn monè fènè baï an kème ndé lé an guèl yaknafèn kéng ya.

² Oui hol hola a njoukou afékéli jing hana, da mahana on oui bou fal guèl njaka guingna a Christ bon tou.

³ Baï tokoré njoukouna mi kèrè ka laou‐è ko̱ kè ba loukou njoukou ko̱ kè ba njoukou bo̱on, kè mong monè fènè.

⁴ An njoukouli mane mbéo mbéo bon mi foul fal dodok pina nè, da mono on yé kè ma baï jangnandaï baï toul pina nè fènè ho̱kè, da tane ti ba baï pina a njoukou aféké ya;

⁵ baï ko̱ yé njoukouli mbéo mbéo bon ma hol dodok hola nè fènè.

⁶ Da an kè on ko̱ njoukouna mi to̱ko̱ baïnjaka hi nè, mi wal bèlafèn nèli bon hi njoukou on ko̱ mi to̱ko̱ hi nè.

⁷ Oui mong mone baï fèn baï ya: njoukouna tane ma baï gaïna Ouone ya! Baï fèn on ko̱ njoukou mi mèn, yé kè ma ndé lourou fèn on kéng.

⁸ Baï kè on ko̱ mi mèn fèn baï a naïn‐monè fènè, yé kè ma lourou ba poumnafèn a naïn‐monè; da kè on ko̱ mi mèn fèn baï a Esprit fènè, yé kè ma lourou ba fèn a Esprit on ko̱ ba yana kambèlè.

⁹ An name tan baï ndingna bèlafèn ya; baï ko̱ namkè mi mafalkè, yé na ma lourou tokoré name laïbi.

¹⁰ Mono on, mane mboro bon, dadaon name nding bèlafèn hi njoukouli bon, da ta maïya an name nding bèlafén jing yine tounassaonli.

¹¹ Oui ko̱ takarata ko̱ nonkè mi honta, ba mè fèni mi ko̱ dé jing dodok ndo̱ko̱ ni hi oui.

¹² Njoukouli on bon ko̱ mi ji to̱ko̱na mone kli ka mboro naïn‐mone, kli ma to̱ko̱ssé hi oui baï ina gassa on, baï ko̱ klime ngou mboro to̱ko̱nassé baï toul di‐croix a Christ.

¹³ Baï ko̱ tongna njoukouli ko̱ mi i gassa, kli fèn kli mi tane ga bou fal bong guingna ya; da klime ji an ouime i gassa, mono on an klime joung mone kli, baï toul naïn‐mone baï.

¹⁴ Da ami, on mi dita jing mi baï joungna moni gounfènakè ya, bo̱l ba di‐croix a Nanjou na Jésus‐Christ, baï ka mbora kè on koukoula aïn mi bara an ki‐croix baï ni tou, da mème bara an di‐croix an koukoula on tou.

¹⁵ Baï ko̱ ina gassa maléba ina gassa ya, mi na bo̱on; da fèn ko̱ bèlta ba tèna féké njoukou.

¹⁶ Go̱ro̱ iki da haïo mi gui mona kli on bon ko̱ mi sé ka mboro aïn, da toula Israël a Ouone!

¹⁷ Da afal aïn an njoukouna mbéo mi hi moni hou mbi ya, baï ko̱ done a Nanjou Jésus mana an toul kli‐moni.

¹⁸ Yindi, an ndingna mbo̱l a Nanjou na Jésus‐Christ mi na jing esprit a baï! Amen!