Éphésienli 1 - Féké Testament 1947

¹ Paul, njou‐mboro‐pina a Christ‐Jésus ka mboro kaouna mara fal toula Ouone, mi pi takarata aïn hi njou‐lana‐bilaouli on ko̱ mi kaou an pou Éphèse, da kli on ko̱ mi kaou lodok ka bila Jésus‐Christ.

² An Ouone Baba na da Nanjou Jésus‐Christ mi hi ndingna mbo̱l da go̱ro̱ iki hi oui!

³ Samnafèn mi hi Ouone Baba a Nanjou na Jésus‐Christ, kè on ko̱ mi hi samnafènli bon a Esprit hi na an guèli an nonkala ka bila Christ!

⁴ Mahana ka on ko̱ kème ti sane na an bilè ambèl ka titilikè hi name mossona koukoula, baï an name gui tang fofoto, tane bila guè monè ka bil sénahang.

⁵ Baï ko̱ kème ti sane na ka tang ambèl baï tèna ba dodok goune nèli ka mbora Jésus‐Christ baï nè fènè, ko̱ mi na hang‐è bèlta ka kaou mara fal toulè,

⁶ baï jona jonafèn a ndingna mbo̱l nè, ko̱ kème hi na bo̱on ka bila kè on ko̱ kème sè hang‐è maïya.

⁷ Da an bilè ko̱ name jing fèn chona na, ka mboro séme monè, da yèngna bi mboro békéfèn nali ma bong nguèra ndingna mbo̱l nè,

⁸ ko̱ Ouone mi si nyèta guèbambèl kon toula jing mèrèn cho̱kna bon da tounafènli bèlta,

⁹ da kème to̱ko̱ hi na didissi baï on ko̱ mi na mara fal toulè, ko̱ mi na hang‐è bèlta ko̱ kème badi ti dambèl ka bilè fènè,

¹⁰ baï wéra none pina onatoul bi kala ko̱ namkè mi mafalkè tou, baï mangna fènli bon ka bila Christ, fènli an nonkalali tèn fènli an koukoula, ka bilè.

¹¹ Name ndé tèn ba njou‐yana péléli ka bilè kéng, baï ko̱ mi ti sane na ka tang ambèl ka mboro badinafèn nè ko̱ kème nding fènli bon ka bong kèrafèn nè ko̱ mi na mara fal toulè,

¹² baï an name tèn ba fèn jona a jonafèn nè, na on ko̱ mi oli ka bila Christ ti dambèl.

¹³ Da an bilè ko̱ oui kéng afal ko̱ ouime ndé la baïnjaka babaï, bèlabaï a yana‐baï‐toul abaï, da ouime ndé la bilaou‐è kéng ko̱ mi baka oui bi jing fèn mbo̱la Saint‐Esprit a bina gonjaka,

¹⁴ on ko̱ ba fèn banabo̱ko̱ fèn yanapélé na bo̱l tèn name on ko̱ Ouone mi cho dodok fèn nèli baï jonafèn nè.

¹⁵ Baï toul baï on mè kéng afal ko̱ mème la baï toul tounassaon a Nanjou Jésus, ko̱ mi na an bil baï da sénahang abaï baï toula njou‐lana‐bilaouli bon,

¹⁶ mè laïbi kaouna koukoula hi Ouone baï toul baï, ka di ling baï ko̱ mème hiou nè,

¹⁷ baï an Ouone a Nanjou na Jésus‐Christ ko̱ ba Baba a jonafèn mi hi esprit cho̱kna tèn esprit tounafèn hi oui baï an ouime tou nè;

¹⁸ mono on an none a go̱ro̱ baï mi bourou baï ko̱na guèl bèlta, baï an ouime tou fèn on ko̱ ba fèn oliya baï ko̱ kème di oui, da an ouime tou fèn on ko̱ ba nguèra jonafèn an fèn yana pélé nè ka bila njou‐lana‐bilaouli,

¹⁹ da ko̱ ba bassana kakaïya njèran nè baï toula, ko̱ mi la bilaou, ka mboro ndingna bakara bassana njèran nè,

²⁰ ko̱ kème nding ka bila Christ jinguèl da ko̱ kème tome nè an wora houli, da kème bi nè an mboro wonron ndo̱kè an guèli an nonkala,

²¹ ko̱ mi gangta guè siya ta njaka barali bon, da nanjoukaouli bon, da njèranli bon, tèn gangna pouli bon, da ta ling afékéli bon ko̱ mi jing ling kli tane ti ba ka saka naï ho̱kè ya, da ka saka on ko̱ mi nding baï guina kéng.

²² Da kème bou fènli bon guè bo̱ko̱ bo̱kè, da hi zaworo hi nè baï ona toul fènli bon a église,

²³ ko̱ ba kli‐monè, nguèra a kè on ko̱ mi mba bil fènli bon jing fènli bon.