Apocalypse 1 - Féké Testament 1947

¹ Wéra none Jésus‐Christ bi kala, ko̱ Ouone mi hi nè baï to̱ko̱na hi koï nèli, fènli on ko̱ ma baï guina koukoulion; da kè pi, da kè to̱ko̱ fèn on hi njou‐bakara nè Jean, ka mboro ange nè.

² Kè on ko̱ sa bongbaï a baïnjaka a Ouone da bongbaï a Jésus‐Christ, toul fènli on bon ko̱ kè ko̱.

³ Jangnandaï ba baï a kè on ko̱ kèn, da kli on ko̱ la baïnjaka on ko̱ ba bong njaka Ouone, da kli pèng fènli on bon ko̱ dé an takarata on, baï ko̱ namkè hèdi tou.

⁴ Jean pi takarata aïn hi égliseli difala‐séré on ko̱ bi an guèl Asie: an ndingna mbo̱l da go̱ro̱ iki mi hi oui, da on ko̱ ourou an kè on ko̱ mi yé, da kè on ko̱ yé jinguèl, da kè on ko̱ ma gui o, da on ko̱ mi ourou an Espritli difala‐séré on ko̱ mi yé bèl kangala njaka bara nè,

⁵ da on ko̱ mi ourou an Jésus‐Christ, ko̱ ba lodok gba sana bongbaï, ko̱ ba boutaïn tomna an wora houli da zaworo a nanjoukaouli an koukoula! Da kè on ko̱ sé hang na ta, ko̱ sél na guè fal an békéfèn nali ka séme nè,

⁶ da kè nding na an name gui bilkaou da sacrificateurli baï a Ouone da Baba nè, mi hi jonafèn da name gangna hi nè guèbassoko kambèlè! Amen!

⁷ Oui ko̱, kè gui an bil yiri mbame. Da yé none a njoukouli bon ma ko̱ nè, da kli on ko̱ toung nè jinguèl; da yé mèran njoukouli kadouk bon an koukoula ma lé léou baï toulè. Mahana ka on, Amen!

⁸ Mè ba Alpha da Oméga, Nanjou, Ouone mi sa, kè on ko̱ mi yé, da kè ko̱ yé jinguèl, da kè on ko̱ ma gui o, Njèran‐honta‐bon.

⁹ Mè, Jean yine baï da ndo̱ko̱ba baï an guèl to̱ko̱nassé da bilkaou da laïnabi on ko̱ mi na an bila Jésus, mè makaou jinguèl an bil koua on ko̱ kli bi lingkè ba Patmos, baï a baïnjaka a Ouone da bongbaï a Jésus.

¹⁰ Mè makaou an bila Esprit ka name a Nanjou, da mè la bounaka guè siya mahana ka gaga mbo̱sso̱ an kaïn ni,

¹¹ mi sa: Fèn on ko̱ mome ko̱ mo dé an takarata, da mo pi on hi égliseli difala‐séré on, hi Éphèse, da hi Smyrne da hi Pergame, da hi Thyatire, da hi Sardes, da hi Philadelphie, da hi Laodicée.

¹² Da mè ki moni baï ko̱na bounaka on ko̱ mi sa hi mi. Da ko̱ mème ki moni, mè ko̱ gangnaguèl lampeli difala‐séré a l’or.

¹³ Da an woro gangnaguèl lampe aïnli mè ko̱ njoukou mbéo mahana ka goune a njoukou, kè bou la on ko̱ péta kon toul bo̱kè, da ga l’or ko̱ mi gna hang‐è.

¹⁴ Da an toulè da pouran toulè mi poukou mahana ka pouki pouran mona badouali, da poukou mahana ka neige; da nonè mi na mahana ka léme sél hèlè;

¹⁵ da bo̱kè mi na mahana ka mbo̱sso̱ ko̱ mi o̱ nyèta, mahana ko̱ mi bi nè an bil loukou hèlè; da baïnjakè mi na mahana ka tiri mbi ko̱ ou mingta.

¹⁶ An mboro wonron ndo̱kè ba mèssèli difala‐séré da gamba ko̱ mi outa mbora séré bon, mi tèn kala an njakè; da nonè mi na mahana ka séssé ko̱ jang jing njèran nè.

¹⁷ Da ko̱ mème ko̱ nè, mè lé bou mbèlè, mahana ka njoukou ko̱ mi hou tou. Da kè goukou wonron ndo̱kè touli, ka sa: Mo ngou waou ya! Mè ba titilikè da sèkèrèkè bon,

¹⁸ da njou‐yana. Da mè hou jinguèl tou, da mo ko̱, mè yan kambèlè, da clélé a houl da guèl a houli mana ndo̱ko̱ ni.

¹⁹ Mono on, mo dé an takarata fènli on bon ko̱ mome ko̱ tou, fènli ko̱ mi yé, da fènli ko̱ ma gui afal kassénaï on,

²⁰ ko̱ ba didissi fèn a mèssè aïnli difala‐séré ko̱ mo ko̱ an wonron ndo̱ko̱ ni, da gangnaguèl lampeli difala‐séré a l’or. Mèssè aïnli difala‐séré ba angeli a égliseli difala‐séré, da gangnaguèl lampeli aïnli difala‐séré ba égliseli difala‐séré.