Pinali a Njou‐Mboro‐Pinali 6 - Féké Testament 1947

¹ Ka name o̱kèo̱ ko̱ njou‐séna bongli mi taïnkon nyèta, Hellénisteli mi njaka jing hana kira Hébreuli baï ko̱ klime pènrèn baï hina fènli on ko̱ klime wal guèbassoko hi waïn‐soré klili.

² Da kli on botoulè‐séré mi di ro̱kè njou‐séna bongli guè mone kli, ka sa hi kli: Tane ga ti mabongkè ya, baï an name yèng sana bong baïnjaka Ouone baï ndingna ba pina tableli.

³ Mono on, yindi, oui nza njoukounali difala‐séré an woro baï on, ko̱ njoukouli mi sa bèla tiri baï bon toul kli, ko̱ klime mba ka Esprit da ka chokna, an name di kli baï onabong pina aïn.

⁴ Da ama, na ma pane laïna bi hiouna Ouone da ndingna bakara baïnjaka Ouone.

⁵ Da baï aïn mi bi wélé toula ro̱kè njoukouli on bon. Da klime sane Étienne, njoukou on ko̱ mi mba ka tounassaon da ka Saint‐Esprit, da Philippe, da Prochore, da Nicanor, da Timon, da Parménas, tèn Nicolas njou‐pou Antioche ko̱ féré tèn Juif.

⁶ Klime to̱ko̱ kli an nona njou‐mboro‐pinali, da ko̱ klime hiou Ouone o̱tou, kli goukou ndo̱ko̱ kli toul kli.

⁷ Da baïnjaka Ouone mi ti guèbambèl da njou‐séna bongli mi taïnkon nyèta an pou Jérusalem, da ro̱kè sacrificateurli nyèta mi la bilaou.

⁸ Da Étienne mi mba ka ndingna mbo̱l da ka njèran, nding loukou fèn sakamli da fèn to̱ko̱nakèli an wora njoukouli.

⁹ Da njoukou hanali an wora kli on ko̱ ba a synagogue, on ko̱ klime di ba synagogue a Affranchis da Cyrénéen hanali, da Alexandrin hanali, tèn njoukou hanali an guèl Cilicie da an guèl Asie, mi ourou siya ka njaka jing Étienne.

¹⁰ Da kli tane ga ma baï sana mba nè ya baï cho̱kna da Esprit ko̱ kème sa baï rou.

¹¹ Mono klime jo̱l njoukou hanali baï sana: Na lala ko̱ kème sa baïnjako̱ da poukou Moïse da Ouone.

¹² Da klime joukourou go̱ra njoukouli, da tangchidoli da njou‐to̱ko̱na guingnali mi guè monè ka ba nè, da ya nè gui guèl walabaï.

¹³ Da klime di njou‐sana bongbaï wo̱ko̱li gui guèl walabaï, da klime sa: Njoukou aïn mi koro ka sa baïnjaka aïn, baï pongna tangna fofoto guèl aïn da baï pongna guingna;

¹⁴ baï ko̱ na la ko̱ kème sa ba, yé Jésus on an pou Nazareth ma bèngnèrèn guèl aïn, da yé kè ma komo dofèn aïn ko̱ Moïse mi hi na.

¹⁵ Da kli on bon ko̱ mi kaou an guèl walabaï, mi ènrèn guè mona Étienne mbilili da klime ko̱ nonè mi mahana ka nona ange.