Pinali a Njou‐Mboro‐Pinali 1 - Féké Testament 1947

¹ O Théophile, mè sa an bil titili takarata ni on, ko̱ mème ti dénakè ambèl toul fènli on bon ko̱ Jésus mi ti ndingnakè, da to̱ko̱ fèn hi njoukouli,

² ka titilikè bo̱l tèn name on ko̱ kème hé sé guè siya, da afal ko̱ kème bi baïnjaka, ka mbora Saint‐Esprit hi njou‐mboro‐pinali on ko̱ kème sane kli tou.

³ Da afal on ko̱ kème to̱ko̱ssé tou, kè ndé to̱ko̱ monè ka none hi kli kéng, ka mboro to̱ko̱na saonkè nyèta, kè tèn gui none kli mane name hanali bongkè‐nèng da sa baï toul fènli an bilkaou a Ouone.

⁴ Da ko̱ kème ndoï jing kli, kè sa bi njaka kli baï an klime tane ourou an pou Jérusalem ya, da voro bina gonjaka Baba, on ko̱ mè sa hi oui tou;

⁵ baï Jean mi nding baptême ka babaï jinguèl ka mbi, da pane name gounfènakè on, da yé oui ma ya baptême ka Saint‐Esprit.

⁶ Da mono on, ko̱ njou‐mboro‐pinali mi ndoï jing hana, kli oui nè, ka sa: Nanjou, ka name aïn yé mo ma féré kaïn mosso bilkaou a Israël lé?

⁷ Kè sa hi kli: Tane ga ti ba baï abaï baï touna name maléba sakali ya, ko̱ Baba fènè mi badi ka dodok njèran nè fènè.

⁸ Da yé oui ma ya njèran ko̱ Saint‐Esprit mi gui toul baï, da yé oui ma sa bongbaï ni pou Jérusalem, da an guèl Judée, da an guèl Samarie, da do̱li sé bo̱l tèn sèkèrè guèl ndèk an koukoula aïn.

⁹ Da on, ko̱ kème sa baï aïn o̱tou, ko̱ kli pane ko̱na nè, kè hé sé guè siya, da yiri mbame mi goukou nè, da kème bo̱l guè worokè an none kli.

¹⁰ Da ko̱ kli laïbi ènran falè ko̱ kème sé guè nonkala, mono njoukouli séré mi tèn gui ko̱ bou pouki la, da o jing kli,

¹¹ da sa hi kli: Oui njoukouli an guèl Galilée, baïfèn da ouime o ka zaili none baï ènrèn sé guè nonkala on lé? Jésus aïn ko̱ mi hé sé guè nonkala an woro baï, yé kè ma kaïn féré ba aféké mahana ka on ko̱ ouime ko̱ nè baï séna guè nonkala.

¹² Da on, kli ourou an toul souraguèl on ko̱ lingkè ba Oliviers, da féré sé guè pou Jérusalem, ko̱ domboro mi di guè Jérusalem mahana ka séna ma name sabbat.

¹³ Da ko̱ klime kan tou, kli hé sé guè laou gangna bil voulou, da guèl kaouna akli, ko̱ ba Pierre, Jean, Jacques, André, Philippe, Thomas, Barthélemy, Matthieu, Jacques goune a Alphée, Simon Zélote da Jude, yine a Jacques.

¹⁴ Kli on bon ka laou mabahana mi pane laïnabi hiouna Ouone jing hana, jing waïnli, da Marie ma a Jésus, da jing yine nèli.

¹⁵ Ka séssé o̱kèo̱ Pierre mi ourou siya an wora yindi, ro̱ko̱na njoukouli on ko̱ mi ndoï, kli mane ténakè‐mbéo‐faltoulè‐bongkè‐séré, kè sa:

¹⁶ Njoukouli yindi, yé tènrèn none Takarata a Ouone mi tèn kala ka babaï, baï on ko̱ Saint‐Esprit mi sa ka njaka David jinguèl toula Judas, kè ko̱ ba njou‐danambèl a njoukouli on ko̱ mi ba Jésus.

¹⁷ Kli ndé kèn nè jing na kéng, da kème ndé ya mbé guèl ndingna bakara aïn kéng.

¹⁸ Njoukou aïn mi zé goune sél koukoula jing mbo̱ri toul ndo̱ko̱ békéfèn nè, da kè lé ka go̱ro̱ hanguèl bilè da kanran bilè bon mi tèn kon kala tou.

¹⁹ Da njoukouli bon ko̱ bi an pou Jérusalem mi toutou on, da kli bi ling an goune sél koukoula on ka njaka kli ba Hakeldama, on ko̱ sa ba, sél koukoula séme.

²⁰ Baï ko̱ mahana ka on ko̱ mi dé an takarata a Psaumeli: Yèng an voulè mi na bo̱on, Da an njoukouna mi bi an bilkè ya! Da: An njoukou aféké mi ya guèl onabong pina nè da!

²¹ Da mono on, an woro na, njoukou afékéli ko̱ sé jing na guèbassoko, ka name on ko̱ Nanjou Jésus mi pane jing na,

²² tinassaonkè jing baptême a Jean bo̱l tèn name on ko̱ kème hé sé guè siya an woro na, an zéng akli on, dadaon njoukouna mbéo mi gui ba njou‐sana bongbaï jing na toul tomnahoul amè.

²³ Da klime ya njoukouli séré an woro kli, Joseph ko̱ kli bi ling‐è ba Barsabbas, da kène ling‐è aféké ba Justus, da Matthias.

²⁴ Da klime hiou Ouone, ka sa: Nanjou, mo mi ko̱ toutou go̱ra njoukouli bon, mo to̱ko̱ nona hana mbéo an wora njoukou aïnli séré ko̱ mome sane tou,

²⁵ baï an kème ya guèl ndingna bakara da onabong pina on ko̱ Judas mi yèng baï séna guèlè fènè tou.

²⁶ Da kli lou da lé ba toula Matthias, da klime kèn nè jing njou‐mboro‐pinali botoulè‐mbéo.