2 Tim 1 - Féké Testament 1947

¹ Paul, njou‐mboro‐pina a Christ‐Jésus, baï kaouna mara fal toula Ouone, ka mboro bina gonjaka a yana on ko̱ mi na ka bila Christ‐Jésus,

² mi pi takarata aïn hi Timothée goune ni, ko̱ mème sé hang‐è ta: an Ouone Baba da Christ‐Jésus, Nanjou na, mi hi ndingna mbo̱l da haïo tèn go̱ro̱ iki hi mo!

³ Mè kaou koukoula hi Ouone, kè on ko̱ mème nding bakara hi nè jing laou‐tounafèn tang fofoto, mahana ko̱ tangko nili mi ti nding bakara hi nè jinguèl, baï ko̱ mème bi hang ni toulo̱ da sa jo̱jo̱ Ouone ka hangnachoung tèn séssé.

⁴ Mè bi hang ni baï ko̱na mo nyèta, baï ko̱ mème tane ga yangnaran mbiléou no ya, mono on, an jangnandaï ni mi mba.

⁵ Ko̱ laou ni mi déou toul tounassaon on ko̱ mi na an bilo̱ lodok, on ko̱ mi bi ka titilikè an bila za no Loïs, tèn an bila ma no Eunice da on mi kara mi ka babaï ko̱ mi ndé bi an bilo̱ kéng.

⁶ Baï on mi ko̱ mè déou laou‐o̱ an mo mi oul toul ndo̱ko̱ a Ouone on ko̱ mi gui mono ka mboro goukouna ndo̱ko̱ ni toulo̱.

⁷ Baï ko̱ Ouone mi tane ga hi esprit waou hi na ya, da ba laou ka njèran da sénahang tèn ho̱ko̱na.

⁸ Mono on, chonron mi tane sé mo baï toul bongbaï a Nanjou na gounfènakè ya, tèn mè ko̱ ba njou‐jo̱bo̱ nè, da mo bou toulo̱ to̱ko̱nassé jing mi baï toul bèlabaï ka mboro njèran a Ouone.

⁹ Kè on ko̱ mi kou na, da di na jing dina on ko̱ ba tangna fofoto ko̱ mi tane ti ba mboro pina na ya, da ka titilikè ka ba mboro dodok badinafèn nè, jing ndingna mbo̱l, ko̱ kème hi na ka bila Christ‐Jésus ka titilikè ambèl hi name mossona koukoula.

¹⁰ Da mi bi saonkè kala tou kassénaï ka mboro guina Njou‐yana‐baï‐toul ama Christ‐Jésus, kè on ko̱ mi gnèrèn houl tou, da bi none yana da fèn on ko̱ mi ba poumna tane tiya, kala ka mboro bèlabaï.

¹¹ Baï on mi ko̱ sane mi ba njou‐sana mboura bèlabaï, da njou‐mboro‐pina da njou‐to̱ko̱nafèn hi pime pouli.

¹² Da baï toul fèn on mi ndé to̱ko̱ssé hi mi kéng, da chonron mi tane ga sé mi ya, baï ko̱ mème tou kè on ko̱ mème la ilaou‐è da on mi kara mi ka babaï, ko̱ njèran nè mi ma baï pèngna fèn on ko̱ mème yèng hi nè baï pèngnakè bo̱l tèn name on.

¹³ Mo pèng mèran bèla baïnjaka on pou ko̱ mo mi la an njaka ni, ka tounassaon da sénahang on ko̱ mi na ka bila Christ‐Jésus.

¹⁴ Bèla fèn on ko̱ mi hi bi ndo̱ko̱ baï pèngnakè, mo pèng bèlta ka mboro Saint‐Esprit on ko̱ mi bi an bila.

¹⁵ Mo tou ko̱ kli on bon ko̱ mi bi an guèl Asie mi yèng mi tou, an wora kli on ba Phygelle da Hermogène.

¹⁶ An Nanjou mi nding haïo hi njou‐voula Onésiphore, baï ko̱ kème pou moni bo̱ko̱ nyèta, da chonron mi tane ga sé nè baï toul sal réme nili ya.

¹⁷ Da ko̱ kème gui pou Rome, kème laïbi nzana mi gata, da jing mi tou.

¹⁸ An Nanjou mi hi nè baï jingna haïo an ndo̱ka Nanjou ka name on. Da bakara on ko̱ kème nding nyèta hi mi an pou Éphèse mo mi ko̱ tou bèl honta njoukou aféké bon.