2 Pierre 1 - Féké Testament 1947

¹ Simon Pièrre, koï da njou‐mboro‐pina a Jésus‐Christ mi pi takarata aïn hi kli on ko̱ ba mbéo jing na jing kakaïya tounassaon ka mboro guédék a Ouone da Njou‐yana‐baï‐toul ama ko̱ ba Jésus‐Christ:

² an ndingna mbo̱l da go̱ro̱ iki abaï mi taïnkon ka mboro touna Ouone da Jésus Nanjou na!

³ Ko̱ na ko̱ njèran a Ouone mi hi fènli bon hi na, on ko̱ hi yana da pèngna baïnjaka a Ouone ka mboro touna nè, kè on ko̱ di na jinguèl ka mboro dodok jonafèn da mbonatoul amè,

⁴ ka mboro on kè hi loukou bèla kakaïya bina gonjaka nèli hi na, mono on ka mboro bina gonjaka on oui ma baï tèna njou‐yana bo̱ko̱di a Ouone, baï ko̱ oui ngou fèn poumna ko̱ mana a koukoula baï nzala naïn‐mone baï.

⁵ Babaï, tongna baï fèn aïn oui bon nza mborokè baï chomna mbonatoul toul tounassaon abaï, da toul mbonatoul oui chome baï tounafèn,

⁶ da toul tounafèn oui chome njèran baï gnèran nzala naïn‐mone, da toul njèran baï gnèran nzala naïn‐mone oui chome laïnabi, da toul laïnabi, oui chome baï pèngna baïnjaka a Ouone,

⁷ da toul pèngna baïnjaka a Ouone oui chome baï pana bil jing yindi, da toul pana bil jing yindi oui chome sénahang.

⁸ Da tokoré fèn aïnli mi na bil baï da ti guèbambèl, on ma yèng oui tèn jo̱jo̱ ya, malèba oui ti ba tou ya, baï touna Nanjou na Jésus‐Christ.

⁹ Da kè ko̱ tane ti jing fèn aïnli ya ba njou‐foukoura, kè ko̱ ba fèn on ko̱ na diya, da yangnaran ko̱ kè tourou tang békéfèn nèli guè fal jinguèl tou.

¹⁰ Mono baï on, yindi, oui nza go̱ro̱ baï nyèta baï touna dina a baï tane ka babaï, da baï touna mboro on ko̱ Ouone sane hi oui ka babaï; baï ko̱ tokoré ouime nding fèn aïnli oui ma bèn ya.

¹¹ Baï on kè ma yèng mborokè ko̱ hi nguèra hi oui baï rina jing rou bilkaou kambèlè a Nanjou na da njou‐yana‐baï‐toul ama ko̱ ba Jésus‐Christ.

¹² Mono baï on, mè ma pènrèn baï déouna laou baï ya toul fèn aïnli guèbassoko, tongna oui mi tou nè, da mone baï pou oui ka mboro babaï on ko̱ na jing oui.

¹³ Da mè ko̱ on guédék, ko̱ mè pane bila tente aïn, baï tomna oui ka mboro déouna laou baï guèbassoko,

¹⁴ baï ko̱ mè toutou name yèngna tente aïn mi hèdi tou, mahana ko̱ Nanjou na Jèsus‐Christ to̱ko̱ hi mi jinguèl tou.

¹⁵ Babaï, yé mè nza mborokè baï ndingna, tokoré mème hou tou, oui ma baï bina laou baï toul fèn aïnli guèbassoko.

¹⁶ Baï ko̱ na tane ga sé fal bounabong tang baï ya, ko̱ na to̱ko̱ hi oui njèran da guina a Nanjou na Jésus‐Christ, da na ba njou‐ko̱na gangna nè ka dodok nona.

¹⁷ Baï ko̱ kè jing dikna da jonafèn an ndo̱ka Ouone Baba jinguèl, ko̱ baïnjaka Gangna Jonafèn sa hi nè mono: Kè ba Goune ni ko̱ mè sé hang‐è nyèta, ko̱ bi wélé touli ta.

¹⁸ Da na la mbo̱ko̱ aïn ko̱ ba gui ka nonkala, ko̱ na makaou jing nè toul tangna fofoto souraguèl.

¹⁹ Da na jing baïnjaka a bong njaka Ouone, on ko̱ tèn ka babaï guèbambèl; da oui nding bèlta ko̱ oui pèng baï on bèlta, mahana ka lampe ko̱ taka an bil yilime bo̱l tèn guèlapélé, da mèssè guèlapélé tèn an bil go̱ro̱ baï;

²⁰ baï ko̱ oui toutou fèn aïnli ti dambèl, ko̱ bong njaka Ouone tane ti an bil takarata a Ouone ya, ko̱ njoukouna ma baï to̱ko̱na falkè bo̱on ka laou‐è fènè.

²¹ Baï ko̱ bong njaka Ouone jinguèl tane ga gui mara fal toula njoukou ya, da tangna fofoto njoukouli a Ouone sa baï mahana ko̱ Saint‐Esprit mi chome kli.