1 Timothée 1 - Féké Testament 1947

¹ Paul, njou‐mboro‐pina a Christ‐Jésus ka mboro bina baïnjaka Ouone Njou‐yana‐baï‐toul ama, da Christ‐Jésus ko̱ ba oliya na,

² mi pi takarata aïn hi Timothée, ko̱ ba dodok goune ni ka tounassaon; an Ouone Baba da Christ‐Jésus Nanjou na mi hi ndingna mbo̱l da haïo tèn go̱ro̱ iki hi mo!

³ Ko̱ mème wara mo jinguèl baï kaouna pou Éphèse, ko̱ mè ji séna guèl Macédoine, baï an mo mi ba baï hi njoukou hanali an klime tane to̱ko̱ to̱ko̱nafèn toutoul ya,

⁴ maléba pèngna bong baï ya, tèn sarang bongbaï a tangkoli on ko̱ saonkè mi tane ga tiya baï on mi to̱ko̱ mboro njakana, da mi tane ga to̱ko̱ mboro pouna mone na a nona Ouone ko̱ ba ka tounassaon ya.

⁵ Da hina bina baïnjaka on ba sénahang ko̱ mi gui ka tangna go̱ro̱, da bèla laou‐tounafèn tèn tounassaon ka babaï.

⁶ Da njoukou hanali, baï ko̱ klime sé maï maï ka pènrèn fèn aïnli, kli ki mboro akli baï sana baï bo̱on;

⁷ ko̱ klime ji baï tèna njou‐to̱ko̱na guingnali, tongna on, kli tane ga tou baï on ko̱ klime sa ya, maléba mboro baï on ko̱ klime ji bo̱ko̱kè bo̱on.

⁸ Da name toutou ko̱ guingna mi bèlta, tokoré njoukouna mi sa baï toul guingna ka ba mborokè,

⁹ baï na toutou on ko̱ mi tane ga koung guingna baï toula njou‐guédék ya, da ba baï toula njou‐séla guingnali, da baï toula njou‐fana baïli, baï toula njou‐pongna Ouone, baï toula njou‐békéfènli, baï toula njou‐vaïnafènli, tèn njoukouli ko̱ poukou ling a Ouone, baï toula njou‐ina baba klili da ma klili, baï toula njou‐ina njoukouli,

¹⁰ baï toula njou‐ndingna romli, baï toula njou‐name ka louwa njoukouli, baï toula njou‐jo̱la njoukouli, baï toula njou‐bana wo̱ko̱li, baï toula njou‐hanafèn kon toula njoukouli, tèn baï toula fènli on bon ko̱ mi pong bèla to̱ko̱nafèn,

¹¹ ka mboro bèlabaï a jonafèn a Ouone jing jangnandaï bèlabaï on ko̱ mi hi bi ndo̱ko̱ ni baï pèngnakè.

¹² Mè kaou koukoula hi kè on ko̱ mi hi njèran hi mi ko̱ ba Christ‐Jésus Nanjou na, baï ko̱ kème ko̱ mi ba njou‐lodok ka di mi baï ndingna bakara nè,

¹³ tongna on ko̱ mè ba njou‐poukounafèn jinguèl, da njou‐to̱ko̱nassé hi njoukouli, tèn njou‐pongna njoukouli. Da mème jing haïo baï ko̱ mème nding on tane tounafèn da ka kaouna ka ndouri.

¹⁴ Da ndingna mbo̱l a Nanjou na mi taïnkon nyèta guèbambèl jing tounassaon da sénahang on ko̱ mi na ka bila Christ‐Jésus.

¹⁵ Baïnjaka aïn mi na lodok, da mi ma an njoukouli bon mi ya, ko̱ Christ‐Jésus mi gui koukoula aïn baï yana baï toula njou‐békéfènli, da ko̱ mème ba titili njou‐békéfèn an woro kli.

¹⁶ Da baï on mi ko̱ mème jing haïo, baï ko̱ an bili mahana ka titili njou‐békéfèn, Jésus‐Christ ma bi saon pana monè bon baï touli, baï an mème tèn mahana ka njou‐to̱ko̱na mboro hi kli on, ko̱ mi gui fal, ko̱ yé kli ma la bilaou‐è baï yana kambèlè.

¹⁷ Da an nanjoukaou a saka kambèlè, kè on ko̱ ba poumna tane tiya da ko̱ none mi ko̱ ya, ko̱ ba Ouone mbéo bo̱l, ko̱ ba baï dikna da jonafèn hi nè kambèlè go kambèlè! Amen!

¹⁸ Mè yèng bina baïnjaka on bi njako̱ goune ni Timothée, ka mboro bong njaka a Ouone ko̱ mi to̱ko̱ mboro hi mo ka titilikè, baï ko̱ ka mboro baï on, mo ma baï rouna bèla rouna béré on.

¹⁹ Mo pèng tounassaon jing bèla laou‐tounafèn baï ko̱ njoukou hanali mi bo mbora kli tou, baï toul tounassaon, mahana ka kombone ko̱ mi bine an bil mbi.

²⁰ Da an wora kli on ba Hyménée da Alexandre ko̱ mème souti kli on hi Satan. Mono on an klime ma baï touna poukouna Ouone ya.