1 Titili Takarata a Pierre ko̱ dé 4 - Féké Testament 1947

¹ Mono on, baï ko̱ Christ mi to̱ko̱ssé ka bil naïn‐monè, oui ndé bou mone baï kéng jing kèrafèn on mabahana. Baï kè on ko̱ to̱ko̱ssé ka bil naïn‐mone mi o̱ jing békéfèn tou,

² ko̱ oui mi yan ti ba oui mi yan ba aféké ka nzala naïn‐mona njoukouli ya, da baï kaouna mara fal toula Ouone.

³ Baï ko̱ name on mi mapélékè jinguèl tou, baï séna fal badinafèn on a mèran gentili, ko̱ ba séna ka laou doukou, nzala naïn‐mone toutoul, njona vone, baï ndoïna ka son fènli, ka njo vone pou, da pouna ngala ko̱ ba séla guingna.

⁴ Da baï on laou kli dou baï ko̱ oui tane ngou mahana jing kli ya, baï ndingna békéfèn nyèta ta mahana ko̱ klime nding, da kli sa bèlya kon toul baï.

⁵ Yé kli on ma foul falkè hi kè on ko̱ mosso monè baï wala baï hi njoukouli a yana kira houli.

⁶ Mono on, mi sa mboura bèlabaï tongna hi kli ko̱ hou, an klime wal baï hi kli ka babaï, mahana ka njoukouli ka bil naïn‐mone, da yan ka mboro a Ouone ka bila esprit.

⁷ Da sèkèrèkè a fènli bon mi hèdi tou. Mono, oui kaou ka ho̱ko̱na da mang mone baï, da laïbi hiouna Ouone.

⁸ Da mi ta fènli bon, oui sé hang hana nyèta, baï ko̱, Sènahang mi goukou békéfènli nyèta.

⁹ Oui nding ko̱ko̱ hi hana nyèta tane gnoran fèn.

¹⁰ Mahana ko̱ njoukouli mane mbéo mbéo bon mi ya toul ndo̱ko̱, mono on oui nding bakara hi hana jing rou mabahana ka bèla njou‐ona bong fènli a ndingna mbo̱l toutoul a Ouone.

¹¹ Tokoré njoukouna mi sa baï; an kè mi sa toul baïnjaka a Ouone; tokoré njoukouna mi nding bakara, an kè mi nding bakara ba mboro njèran on ko̱ Ouone mi hi, mono on, an Ouone mi jing jonafèn an bil fènli bon ka mbora Jésus‐Christ, ko̱ ba jonafèn da njaka bara kambèlè go̱ kambèlè. Amen!

¹² Oui on ko̱ mème sé hang baï nyèta, laou baï mi dou ya ko̱ to̱ko̱nassé hèlè mana an woro baï, on ko̱ mi gui mone baï baï léna oui, mahana ko̱ guènè?-?fèna mi tèn oui.

¹³ Da mahana ko̱ oui ba ndo̱ko̱ba to̱ko̱nassé a Christ on ko̱ kème to̱ko, oui kaou ka jangnandaï, mono on, ka name guina jing jonafèn nè, oui ma jangndaï ka wala nyèta kéng.

¹⁴ Jangnandaï mi ba baï abaï ko̱ tokoré klime sa bèlya kon toul baï, baï ling a Christ, baï ko̱ Esprit a jonafèn, da Esprit a Ouone mi na toul baï.

¹⁵ An njoukouna an woro baï mi to̱ko̱ssé ya mahana ka njou‐ina njoukou, maléba njou‐riya, maléba njou‐ndingna bèlya, maléba njoukou ko̱ joukourou pina a njou‐afékéli.

¹⁶ Da tokoré njoukouna mi to̱ko̱ssé baï ko̱ kè ba chrêtien, dadaon chonron mi sé nè ya, an kème jone Ouone ka ling aïn.

¹⁷ Baï namkè mi gui tou, ko̱ mi tissaon barabaï an voula Ouone. Da tokoré on mi tissaon jing na ka titilikè, yé sèkèrèkè a kli on ko̱ la bèlabaï a Ouone ya an handé?

¹⁸ Da tokoré mi lata an njou‐guédék mi jing yana‐baï‐toul, yé njoukouli ko̱ pong Ouone da njou‐békéfèn, kli ma kan guèl hane dé?

¹⁹ Baï on, an kli on ko̱ to̱ko̱ssé ka mboro kaouna mara fal toula Ouone mi do̱li hi laou akli hi lodok Njou?-?mossonafèn, ka mboro ndingna fèn ko̱ bélta.