1 Titili Takarata a Pierre ko̱ dé 3 - Féké Testament 1947

¹ Mono on, waïnli oui kaou bo̱ko̱ ndo̱ka dodok wa abaïli, da tokoré njou‐hanali mi tane ga la baïnjaka on ya, tongna kli tane ga la baïnjaka on ya mbo̱l mbora séna waïn klili, mi ma baï jingna laou kli baï a Ouone,

² ko̱ klime ko̱ mboro séna abaï, ko̱ oui pèng séna abaï tang ta ka ngou waou.

³ Da baï bouna fèn ling abaï, waïnli, ti ba oui, an ouime bou fèn ling an kala ya, ko̱ ba déna toul baï da bouna fèn ling l’or an mone baï, maléba bouna bèla la toutoul toutoul.

⁴ Da oui mi bou ba fèn ling, ko̱ mou an bil go̱ra njoukou, fèn bouna on ko̱ ma baï poumna ya, ko̱ ba laou vonamboï da kaouna jang ka njaka on ko̱ jing nyè maïya an nona Ouone.

⁵ Baï jinguèl tangna fofoto waïnli on ko̱ oli ba Ouone, bou fèn ling akli mahana ka on, ka kaou bo̱ko̱ ndo̱ka wa klili.

⁶ Mahana ka Sara ko̱ la baï a Abraham da di nè ba nanjou; ko̱ oui ba goune nèli kassénaï tokoré oui mi nding bèlta, da mone baï tane ga hou mbi baï waou mbéo ya.

⁷ Mabahana oui wa‐waïnli oui kaou jing waïn abaïli ka mboro cho̱kna, ka dik waïn mahana ka ili on ko̱ mi njèrèn ya; oui dik kli, ko̱ kli ba ndé njou‐yana pélé ndingna mbo̱l an yana jing oui kéng. Mono on, an fèna mi gui ka dèn hiouna Ouone abaï ya.

⁸ Baï aféké on mi pane, oui bon bi hang baï toul laou kèrafèn mbéo, ka ko̱ hana passé, oui sé hang hana ta mahana ka yindi, ka ko̱ssé hi hana, da bou mone baï guè koukoula.

⁹ Oui féré békéfèn baï a békéfèn ya; maléba féré ka kèkèfèn da baï a kèkènafèn ya; da oui nding toutoul, oui féré hi samnafèn, baï ko̱ kè di oui baï on, an oui mi ya pélé samnafèn.

¹⁰ Baï kè on ko̱ sé hang yana, Da kè ji ko̱na séssé ko̱ bèlta, An kème dèn léme sélè baï békéfèn; An kème dèn njakè baï sana rokonafèn.

^11-12 An kème pong békéfèn da nding bèlafèn. An kème nza go̱ro̱ iki da sé mborokè. Baï ko̱ nona Nanjou na toula njou‐guédék, Da soukè la sana jojo akli, Da an nona Nanjou mi pong ba kli on ko̱ nding békéfèn.

¹³ Da guème ma nding bèlya jing oui tokoré none baï mi sènta baï fèn on ko̱ bèlta lé?

¹⁴ Da tongna oui mi to̱ko̱ssé baï toul ndingna guédék, jangnandaï mi ba a baï. Oui ngou waou fèn on ko̱ kli ngou waoukè ya, maléba mone baï mi hou mbi ya.

¹⁵ Da oui wal Christ bi an bil go̱ro̱ baï, yé ba Nanjou. Oui mosso mone baï guèbassoko baï féra sana hi njoukouli mbéo mbéo bon, ko̱ mi oui oui baï wéra none bong oliya on ko̱ na bil baï, da ka mboro bouna mone guè koukoula da ka waou.

¹⁶ Da oui kaou jing bèla laou‐tounafèn, baï on ko̱ klime sa bèlya kon toul baï, chonron ma sé kli on ko̱ poukou bèla mboro séna a baï ka bila Christ.

¹⁷ Baï on bèl honta tokoré mi na mara fal toula Ouone, an ouime to̱ko̱ssé baï ndingna bèlta, ta ndingna bèlya.

¹⁸ Baï ko̱ Christ kéng mi hou baï a békéfènli bo̱ko̱ mbéo, kè ko̱ ba njou‐guédék baï toula njou‐maï maïli, mono on, an kème lang na guè mona Ouone, baï ko̱ mi i nè jing naïn‐mone, da mi féré nding hi nè da kè yan ka bila esprit.

¹⁹ Ka bila Esprit kéng kè sé ka sa mboura espritli on an bil jo̱bo̱,

²⁰ kli on ko̱ nding ka ndouri jinguèl, ko̱ Ouone vomboï ka voro, ka name an Noé, ko̱ kè pane mossona kombone, ko̱ njoukouli nyè ya, ko̱ kli ba laou difala‐saï on ko̱ kou ka mboro mbi.

²¹ Gba mèrèn mbi on mi kou oui kassénaï on kéng, on mi sa ba yana baptême, ko̱ tane ti ba toura dakame an naïn‐mone ya, da ba sana bongbaï a bèla laou tounafèn an nona Ouone, ka mboro tomnahoul a Jésus‐Christ, an woro houli,

²² kè on ko̱ makaou mboro wonron ndo̱ka Ouone baï ko̱ kème hé sé nonkala tou, da kè bou angeli da nanjoukaouli da njèranli baï kaouna bo̱ko̱ ndo̱kè.